CAB. XIV

1As loayr y Chiarn rish Moses, gra, 2Shoh vees y leigh mychione y lourane, ayns laa yn ghlenney echey: bee eh er ny chur lesh gys y taggyrt. 3As hed y saggyrt magh ass y champ as nee’n saggyrt jeeaghyn, as cur-my-ner, my ta doghan yn loihrey er ny lheihys ayns y lourane, 4Eisht nee’n saggyrt goardaghey dy ghoaill er y hon-syn ta dy v’er ny ghlenney, daa eean bio as glen, as fuygh-cedar, as scarleod, as hyssop. 5As nee’m saggyrt goardaghey, unnane jeh ny eeanlee dy v’er ny varroo harrish ushtey-farrane, ayns saagh craie. 6Agh son yn eean bio, nee eh goaill eh, as y fuygh-cedar, as y scarleod, as thummey ad shen as yn eean bio, ayns fuill yn eean v’er ny varroo harrish yn ushtey-farrane. 7As nee eh spreih shen ersyn, ta dy v’er ny ghlenney veih’n louraanys, shiaght keayrtyn, as eh y vriwnys glen, as lhiggee eh yn raad da’n eean bio fud y vagher feayn. 8As nee eshyn, ta dy v’er ny ghlenney, niee e eaddagh, as baarey jeh ooilley e olt, as niee eh hene ayns ushtey, dy vod eh ve glen: as ny lurg shen hig eh stiagh ’sy champ, agh cha jed eh stiagh ’sy chabbane echey hene, son shiaght laa. 9As er y chiaghtoo laa nee eh baarey ooilley e olt jeh e chione, as e aasaag as e volleeyn, eer ooilley yn slane fynney nee eh baarey jeh; marish shoh nee eh e chorp y niee ayns ushtey, as bee eh glen. 10As er yn hoghtoo laa, nee eshyn goaill daa eayn fyrryn fegooish lheamys, as un eayn bwoirryn jeh’n chied vleïn gyn lheamys, as mysh daa chaart jeig dy flooyr meein son oural-arran, lesh ooil ny chione, as lieh phunt dy ooil. 11As y saggyrt ta jannoo glen jeh, nee eh soiaghey magh yn dooinney hene, as ny reddyn shoh fenish y Chiarn, ec dorrys y chabbane-agglish. 12As nee’n saggyrt goaill un eayn fyrryn, as chebbal eh son oural-loght, as y lieh phunt dy ooil, as chebbal ad son oural-criht fenish y Chiarn. 13As nee eh yn eayn y varroo raad t’eh marroo yn oural-peccah, as yn oural-losht, ’syn ynnyd casherick: son myr ta’n oural-losht cair y taggyrt, myr shen ta’n oural-loght: te slane casherick. 14As nee’n saggyrt goaill kuse jeh fuill yn oural-loght, as ver yn saggyrt shen er baare y chleaysh yesh echeysyn ta dy v’er ny ghlenney, as er ordaag e laue yesh, as er ordaag vooar e chass yesh. 15As nee’n saggyrt goaill kuse jeh’n log dy ooil, as deayrtey eh ayns bass e laue chiare hene. 16As nee’n saggyrt thummey corrag e laue yesh ayns yn ooil t’ayns e laue chiare, as spreih yn ooil lesh e vair, shiaght keayrtyn fenish y Chiarn. 17As yn chooid elley jeh’n ooil, t’ayns e laue, ver y saggyrt er baare y chleaysh echeysyn ta dy ve glennit, as er ordaag e laue yesh, as er ordaag vooar e chass yesh, er fuill yn oural-loght. 18As fooilliagh yn ooil t’ayns laue y taggyrt, nee eh deayrtey er y chione echeysyn ta dy ve glennit: as nee’n saggyrt jannoo lhiasaghey er e hon fenish y Chiarn. 19As nee’n saggyrt chebbal yn oural-peccah, as jannoo lhiasaghey er y hon-syn ta dy v’er ny ghlenney veih e ghoghan; as ny lurg shen nee eh marroo yn oural-losht. 20As nee’n saggyrt chebbal yn oural-losht, as yn oural-arran er yn altar: as nee’n saggyrt jannoo lhiasaghey er e hon, as bee eh glen. 21As my t’eh boght, as nagh vod e laue roshtyn; eisht nee eh goaill un eayn son oural-loght-criht, dy yannoo lhiasaghey er e hon, as mysh kiare chaart dy flooyr meein, lesh ooil ny chione, son oural-arran, as punt dy ooil. 22As daa chalmane-turtle, ny da eean calmane, lheid as oddys eh gheddyn; as bee’n derrey yeh oural-peccah, as y jeh elley oural-losht. 23As ver eh lesh ad er yn hoghtoo laa, gour e ghlenney, gys y taggyrt, gys dorrys y chabbane-agglish, fenish y Chiarn. 24As nee’n saggyrt goaill eayn yn oural-loght, as y punt dy ooil, as nee’n saggyrt chebbal ad son oural-criht fenish y Chiarn. 25As nee eh marroo eayn yn oural-loght, as nee’n saggyrt goaill kuse jeh fuill yn oural-loght, as cur shen er baare y chleaysh yesh echeysyn ta dy ve glennit, as er ordaag e laue yesh, as er ordaag vooar e chass yesh. 26As nee’n saggyrt deayrtey jeh’n ooil ayns bass e laue chiare hene. 27As nee’n saggyrt spreih lesh e chorrag kuse jeh’n ooil, t’ayns e laue chiare, shiaght keayrtyn, fenish y Chiarn. 28As ver y saggyrt jeh’n ooil t’ayns e laue er baare y chleaysh yesh echeysyn ta dy ve glennit, as er ordaag e laue yesh, as er ordaag vooar e chass yesh: er ynnyd fuill yn oural-loght. 29As yn chooid elley jeh’n ooil, t’ayns laue y taggyrt, ver eh er y chione echeysyn ta dy v’er ny ghlenney, dy yannoo lhiasaghey er e hon, fenish y Chiarn. 30As nee eh chebbal unnane jeh ny calmaneyn-turtle, ny jeh ny calmaneyn aegey, lheid as oddys eh gheddyn; 31Eer lheid as oddys eh cheet huggey, yn derrey yeh son oural-peccah, as y jeh elley son oural-losht, marish yn oural-arran. As nee’n saggyrt jannoo lhiasaghey er y hon-syn ta dy v’er ny ghlenney, fenish y Chiarn. 32Shoh yn leigh t’er y hon-syn, ta’n doghan dy louraanys er, nagh vel fort echey dy gheddyn lheid as ta cooie gour e ghlenney.

33As loayr y Chiarn rish Moses, as rish Aaron, gra, 34Tra vees shiu er jeet gys cheer Chanaan, ta mish dy choyrt diu son eiraght, as dy der-yms y doghan dy louraanys, ayns thie erbee jeh cheer nyn eiraght; 35As dy jig eshyn, s’liesh y thie, as ginsh da’n taggyrt, gra, Er-lhiam dy vel caslys y doghan dy louraanys ayns y thie: 36Eisht ver y saggyrt sarey, dy jean ad folmaghey yn thie roish my hed y saggyrt stiagh ayn, dy vriaght mychione y doghan; nagh bee ooilley ny t’ayns y thie jeant neu-ghlen: as eisht hed y saggyrt stiagh dy akin y thie. 37As nee eh jeeaghyn son y doghan, as cur-my-ner, my ta’n doghan ayns voallaghyn y thie, lesh schimmeigyn dowiney; geayney ny jiarg, ry-akin dowin ’sy voalley; 38Eisht hed y saggyrt magh er dorrys y thie, as nee eh jeigh seose y thie shiaght laa. 39As hig y saggyrt reesht kione y chiaghtoo laa, as jeeaghyn; as cur-my-ner, my ta’n doghan er skeayley er voallaghyn y thie; 40Eisht nee’n saggyrt sarey ad dy ghoaill ersooyl ny claghyn ta’n doghan ayndoo, as ad y hilgey ayns ynnyd neu-ghlen, cheu-mooie jeh’n ard-valley. 41As ver y saggyrt er y thie dy ve scrapit cheu-sthie ooilley mygeayrt, as deayrtee ad magh y joan hig jeu, cheu-mooie jeh’n ard-valley, ayns boayl neu-ghlen. 42As gowee ad claghyn elley, dy choyrt ayns ynnyd ny claghyn shen; as gowee ad mortar noa, dy phlastrail y thie. 43As my hig y doghan reesht, as brishey magh ’sy thie, lurg ny claghyn ve goit ersooyl, as lurg da’n thie ve scrapit, as lurg y phlastrail; 44Eisht hig y saggyrt as jeeaghyn, as cur-my-ner, my ta’n doghan er skeayley ayns y thie, te louraanys dewil ayns y thie: te neu-ghlen. 45As nee eh yn thie y lhieggal, ny claghyn, as y fuygh, as ooilley mortar y thie: as ver eh lesh ad magh ass yn ard-valley, gys boayl neu-ghlen. 46Bee eshyn myrgeddin, hed stiagh ’sy thie, choud as te dy ve jeight seose, neu-ghlen gys yn astyr. 47As eshyn lhie-ys ’sy thie, lhig da niee e eaddagh: as eh ta goaill beaghey ’sy thie, lhig da niee e eaddagh. 48As my hig y saggyrt stiagh, as jeeaghyn er, as cur-my-ner, nagh vel y doghan er skeayley ’sy thie, lurg da’n thie v’er ny phlastrail: eisht nee’n saggyrt briwnys y thie dy ve glen, er-yn-oyr dy vel y doghan er ny lheihys. 49As nee eh goaill, dy ghlenney yn thie, daa eean, as fuygh-cedar, as scarleod, as hyssop. 50As nee eh marroo unnane jeh ny eeanlee ayns saagh craie, harrish ushtey-farrane. 51As nee eh goaill yn fuygh-cedar, as yn hyssop, as y scarleod, as yn eean bio, as thummey ad ayns fuill yn eean marroo, as ayns yn ushtey-farrane, as spreih yn thie shiaght keayrtyn. 52As nee eh glenney yn thie lesh fuill yn eean as lesh yn ushtey-farrane, as lesh yn eean bio, as lesh y fuygh-cedar, as lesh yn hyssop, as lesh yn scarleod. 53Agh lhiggee eh yn raad da’n eean bio, ass yn ard-valley, gys reamys ny magheryn, as lhiasaghey ’yannoo son y thie: as bee eh glen. 54Shoh’n leigh son dy chooilley cheint dy ghoghan, dy louraanys, as carrid, 55As son louraanys garmad, as thie, 56As son askaid, as son screb, as son cron sollys, 57Dy hoilshaghey tra te neu-ghlen, as tra te glen: shoh’n leigh mychione y loihrey.