CAB. XVI

1As loayr y Chiarn rish Moses lurg baase daa vac Aaron, tra heb ad [aile neu-chooie] fenish y Chiarn, as v’ad er nyn goyrt gy-baase: 2As dooyrt y Chiarn rish Moses, Loayr rish Aaron dty vraar, nagh jig eh ec dy chooilley hraa gys yn ynnyd casherick, cheu-sthie jeh’n choodagh, kiongoyrt rish stoyl y vyghin, ta er yn arg; nagh bee eh er ny varroo: son hig-yms kionfenish ayns y vodjal er stoyl y vyghin. 3Shoh myr hig Aaron stiagh ’syn ynnyd casherick: lesh dow aeg son oural-peccah, as rea son oural-losht. 4Ver eh mysh yn coamrey aanrit casherick, as bee e vreechyn aanrit er, as bee’n cryss aanrit mysh e vean, as lesh y mitre aanrit vees eh soit magh: t’ad shoh garmadyn casherick; shen-y-fa shegin da e chorp y niee ayns ushtey, as myr shoh vees eh coamrit. 5As nee eh goaill veih pobble cloan Israel, daa vannan jeh ny goair son oural-peccah, as un rea son oural-losht. 6As nee Aaron chebbal dow yn oural-peccah, ta er e hon hene, as jannoo lhiasaghey er e hon hene, as son e hie. 7As nee eh goaill y daa ghoayr, as chebbal ad fenish y Chiarn, ec dorrys y chabbane-agglish. 8As nee Aaron tilgey lottyn er y daa ghoayr; un lot son [oural] y Chiarn, as lot elley son y ghoayr-scaapit. 9As ver Aaron lesh y ghoayr, huittys lot y Chiarn er, as chebbal eh son oural-peccah. 10Agh y ghoayr huittys y lot er dy scapail, bee eh er ny hebbal bio roish y Chiarn, dy yannoo lhiasaghey lesh, as dy lhiggey’n raad da son goayr-scaapit gys yn aasagh. 11As ver Aaron lesh dow yn oural-peccah, ta ny chour hene, as jannoo lhiasaghey er e hon hene, as e hie, as y dow son oural-peccah y varroo, ta er e hon hene. 12As nee eshyn goaill lane censer dy smarageyn jiarg aile jeh’n altar, fenish y Chiarn, as lane e ghlaick dy incense millish jeant myn, as shen y chur lesh cheu-sthie jeh’n choodagh. 13As ver eh yn incense er yn aile, fenish y Chiarn, dy vod bodjal yn incense coodaghey stoyl y vyghin, t’er arg y chonaant, nagh vow eh baase. 14As gowee eh jeh fuill y dow, as shen y spreih lesh e vair er stoyl y vyghin, lesh y shiar: as roish stoyl y vyghin nee eh spreih lesh e vair shiaght keayrtyn. 15Eisht nee eh marroo goayr yn oural-peccah, ta son y pobble, as ver eh lesh yn uill echey cheu-sthie jeh’n choodagh, as jannoo rish shen, myr ren eh rish fuill y dow, as shen y spreih er stoyl y vyghin, as roish stoyl y vyghin. 16As nee eh lhiasaghey ’yannoo son yn ynnyd casherick, kyndagh rish neu-ghlennid chloan Israel, as kyndagh rish nyn loghtyn ayns ooilley nyn beccaghyn: as shen myr nee eh jannoo son y chabbane-agglish ta soit nyn mast’, ayns mean nyn neu-ghlennid. 17As cha bee dooinney erbee elley ’sy chabbane-agglish, tra t’eh goll stiagh dy yannoo lhiasaghey ayns yn ynnyd casherick, derrey t’eh er jeet magh, as er n’yannoo lhiasaghey er e hon hene, as son lught e hie, as son slane pobble Israel. 18As hed eh magh gys yn altar ta fenish y Chiarn, as jannoo lhiasaghey er y hon; as nee eh goaill jeh fuill y dow, as jeh fuill y ghoayr, as shen y choyrt er eairkyn yn altar ooilley mygeayrt. 19As nee eh spreih er jeh’n uill shiaght keayrtyn lesh e vair, as shen y ghlenney, as eh y chasherickey veih neu-ghlennid chloan Israel.

20As tra t’eh erreish jannoo lhiasaghey son yn ynnyd casherick, as y chabbane-agglish, as yn altar, ver eh lesh y ghoayr bio. 21As ver Aaron e ghaa laue er kione y ghoayr bio, as harrishyn goaill-rish ooilley peccaghyn chloan Israel, as ooilley nyn loghtyn ayns ooilley nyn voiljyn, coyrt ad er kione y ghoayr; as ver eh ersooyl eh liorish laue dooinney treishteilagh, gys yn aasagh. 22As ver y ghoayr lesh ersooyl er hene ooilley ny peccaghyn oc, gys cheer gyn cummaltee, as lhiggee eh yn raad da’n ghoayr ’syn aasagh. 23As hig Aaron stiagh ’sy chabbane-agglish, as ver eh jeh ny garmadyn aanrit v’eh coamrit lhieu, tra hie eh stiagh ’syn ynnyd casherick, as faagail ad ayns shen. 24As nee eh e chorp y niee lesh ushtey ’syn ynnyd casherick, as cur mysh e gharmadyn, as cheet magh, as chebbal e oural-losht hene, as oural-losht yn phobble, as nee eh lhiasaghey er e hon hene, as son y pobble. 25As eeh yn oural-losht nee eh y lostey er yn altar. 26As nee eshyn, lhig y raad da’n ghoayr-scaapit, niee e eaddagh, as faarkey e chorp ayns ushtey, as ny lurg shen hig eh stiagh ’sy champ. 27As y dow son oural-peccah, as y ghoayr son oural-peccah, yn uill oc v’er ny choyrt lesh stiagh dy yannoo lhiasaghey ’syn ynnyd casherick, ver fer lesh magh cheu-mooie jeh’n champ; as nee ad lostey ’syn aile ny craitnyn oc, yn eill, as yn eoylley oc. 28As nee eshyn ta lostey ad, niee e eaddagh, as faarkey e chorp ayns ushtey, as ny lurg shen hig eh stiagh ’sy champ.

29As shoh vees slattys kinjagh diu; ayns y chiaghtoo vee, er y jeihoo laa jeh’n vee, ver shiu nyn anmeenyn fo trimshey, as cha jean shiu veg yn obbyr, edyr eh ve fer jeh’n cheer eu hene, ny joarree ta cummal ny-vud eu. 30Son er y laa shen, bee lhiasaghey jeant er nyn son, dy ghlenney shiu, dy vod shiu ve glen veih ooilley nyn beccaghyn, fenish y Chiarn. 31Bee eh doonaght dy aash diu, as ver shiu nyn anmeenyn fo trimshey, liorish slattys kinjagh. 32As y saggyrt vees er ny ooilaghey, as er ny chasherickey, dy hirveish ayns y taggyrtys ayns ynnyd e ayrey, nee eh lhiasaghey ’yannoo, as ver eh mysh e choamraghyn aanrit, eer ny garmadyn casherick. 33As nee eh lhiasaghey son yn ynnyd casherick, as son y chabbane-agglish, as son yn altar: as nee eh jannoo lhiasaghey son ny saggyrtyn, as son y slane pobble. 34As bee shoh slattys kinjagh diu, dy yannoo lhiasaghey son cloan Israel, son ooilley nyn beccaghyn, keayrt ’sy vleïn. As ren eh, myr hug y Chiarn sarey da Moses.