CAB. XVII

1As loayr y Chiarn rish Moses, gra, 2Loayr rish Aaron, as rish e vec, as rish ooilley cloan Israel, as abbyr roo; Shoh’n red ta’n Chiarn er harey, gra, 3Dooinney erbee jeh thie Israel, ta marroo dow, ny eayn, ny goayr, ayns y champ, ny dy varroo eh ass y champ, 4As nagh vel dy choyrt lesh eh gys dorrys y chabbane-agglish, dy hebbal oural gys y Chiarn kiongoyrt rish cabbane y Chiarn: bee fuill er ny choyrt gys lieh yn dooinney shen; t’eh er gheayrtey fuill; as bee’n dooinney shen er ny yiarey jeh veih mastey e phobble: 5Er coontey dy vod cloan Israel cur lhieu nyn ourallyn, t’ad dy hebbal ayns y vagher foshlit, eer dy der ad lhieu ad gys y Chiarn, gys dorrys y chabbane-agglish gys y taggyrt, as y hebbal ad son ourallyn-shee gys y Chiarn. 6As nee’n saggyrt spreih yn uill er altar y Chiarn, ec dorrys y chabbane-agglish, as lostey yn eeh son soar millish gys y Chiarn. 7As cha jeb ad ny-sodjey nyn ourallyn gys jouyil, roo t’ad er n’yannoo maarderys [spyrrydoil:] Bee shoh slattys kinjagh daue, trooid nyn sheelogheyn.

8As nee oo gra roo, Dooinney erbee jeh thie Israel, ny jeh’n joarree ta troailt ny mast’ eu, ta chebbal oural-losht ny toyrtys-casherick, 9As nagh vel coyrt lesh eh gys dorrys y chabbane-agglish dy hebbal eh gys y Chiarn: bee’n dooinney shen eer er ny yiarey jeh veih mastey e phobble. 10As dooinney erbee jeh thie Israel, ny jeh’n joarree ta troailt ny mast’ eu, ta gee monney erbee dy uill; soie-yms m’eddin noi’n annym shen ta gee fuill, as eshyn y yiarey jeh veih mastey e phobble. 11Son ta bioys yn eill ’syn uill; as ta mish er chur eh diu er yn altar, dy yannoo lhiasaghey son nyn anmeenyn: son she’n uill ta jannoo lhiasaghey son yn annym. 12Shen-y-fa dooyrt mee rish cloan Israel, Cha jean annym erbee jiuish gee fuill, chamoo nee joarree erbee, ta goaill aaght ny-vud eu, gee fuill. 13As dooinney erbee jeh cloan Israel, ny jeh ny joarreeyn ta ny-vud eu, ta shelg, as tayrtyn baagh erbee, ny eean, ta lowit dy ve eeit; nee eh dy shickyr deayrtey magh yn uill echey, as shen y choodaghey lesh joan. 14Son ayns yn uill ta bioys dy chooilley eill, ta’n uill son y vioys echey: shen-y-fa dooyrt mee rish cloan Israel, Cha jean shiu gee fuill keint erbee dy eill: son ayns yn uill ta bioys dy chooilley eill: quoi-erbee ta gee shen, vees giarit jeh. 15As dy chooilley annym, ta gee shen hooar baase jeh hene, ny va raipit ec beishtyn (edyr eh ve fer jeh’n cheer eu hene, ny joarree) nee eh niee e eaddagh, as faarkey eh hene ayns ushtey, as ve neu-ghlen derrey’n astyr; eisht bee eh glen. 16Agh mannagh jean eh niee ad, ny faarkey e chorp; eisht nee eh gymmyrkey e pheccah.