CAB. XVIII

1As loayr y Chiarn rish Moses, gra, 2Loayr rish cloan Israel, as abbyr roo, Mish y Chiarn y Jee eu. 3Cha n’eiyr shiu er cliaghtaghyn cheer Egypt, raad va shiu cummal; as lurg cliaghtaghyn cheer Chanaan, raad ta mee dy choyrt shiu, cha jean shiu; chamoo nee shiu gimmeeaght lurg nyn oardaghyn. 4Nee shiu cooilleeney my vriwnyssyn, as freaylley my leighyn, dy immeeaght ayndoo: Mish y Chiarn y Jee eu. 5Nee shiu er-y-fa shen, freayll my lattyssyn as my vriwnyssyn, ad shoh my nee dooinney ’chooilleeney, bee ad bioys da: Mish y Chiarn.

6Cha jig fer erbee eu er-gerrey jeeish ta faggys caardys da, dy phoosey ee: Mish y Chiarn. 7Nearey dty ayr, ny nearey dty voir, cha jean oo roostey: dty voir ee, cha jean oo roostey yn nearey eck. 8Nearey ben dt’ayrey cha jean oo roostey: te rooishtid dt’ayrey. 9Nearey dty huyr, ta inneen dt’ayrey, ny inneen dty vayrey, ruggit ec y thie, ny ruggit veih’n thie, yn nearey oc cha jean oo roostey. 10Nearey inneen dty vac, ny inneen dty inneen hene, cha jean oo roostey; son te myr dty nearey hene. 11Nearey inneen ben dt’ayrey, er ny gheddyn jeh dty ayr, (dty huyr ee) yn nearey eck cha jean oo roostey. 12Cha jean oo roostey nearey shuyr dt’ayrey: ish ben-vooinjerey faggys dt’ayrey. 13Cha jean oo roostey nearey inneen dty vayrey: son ish ben-vooinjerey faggys dty voir. 14Cha jean oo roostey nearey braar dt’ayrey, cha jig uss er-gerrey da’n ven echey: dty naunt ee. 15Cha jean oo roostey nearey dty inneen-’sy-leigh: ben dty vac ee, yn nearey eck cha rooisht oo. 16Cha jean oo roostey nearey ben dty vraarey: nearey dty vraar eh. 17Cha jean oo roostey nearey ben as e inneen, chamoo ghoys oo inneen e mac, ny inneen e inneen, dy roostey yn nearey eck: son ad ny mraane-mooinjerey faggys eck: she croiaght eh. 18Chamoo ghoys oo ben as e shuyr, dy choyrt seaghyn urree, dy phoosey ee, ayns lhing y chied ven. 19Myrgeddin, cha jig uss er-gerrey da ben, dy roostey’n nearey eck, choud as t’ee fo’n neu-ghlennid eck. 20Marish shoh, cha bee ayd dy yannoo rish ben dty naboo, dy yannoo oo hene foiljagh mâree. 21Cha lhig oo veg jeh dty luight goll trooid yn aile gys Molech, chamoo nee oo tayrn mee-ooashley er ennym dty Yee: Mish y Chiarn. 22Cha jean oo lhie marish dooinney, myr marish ben: shen feohdys. 23Chamoo nee oo lhie marish baagh erbee, dy hayrn oo hene fo neu-ghlennid eajee: chamoo nee ben erbee shassoo roish baagh, dy lhie sheese huggey: te noi dooghys. 24Ny jean-jee shiu hene neu-ghlen lesh veg jeh ny peccaghyn dwoaiagh shoh; son lesh lheid ny reddyn ta ny ashoonyn, ta mish er n’imman magh rhymbiu, er n’yannoo ad hene eajee ayns my hilley. 25As ta’n cheer fo slane broïd: shen-y-fa, ta mish goaill kerraghey er ny peccaghyn eck, as ta’n cheer hene skeeah magh e cummaltee. 26Nee shiuish, er-y-fa shen, freayll ny slattyssyn as ny briwnyssyn aym’s, as cha jean shiu cur-rish veg jeh ny peccaghyn eajee shoh; chamoo veg jeh’n ashoon eu hene, ny joarree erbee ta nyn mastey; 27(Son ooilley ny obbraghyn eajee shoh ta cummaltee yn cheer, va reue, er n’yannoo; as ta’n cheer fo mollaght.) 28Nagh jean y cheer shiuish y skeeah magh myrgeddin, tra ta shiu broghey ee, myr ren ee skeeah ny ashoonyn v’ayn rhymbiu. 29Son quoi-erbee nee cur-rish veg jeh ny peccaghyn dwoaiagh shoh, bee’n annym shen er ny yiarey jeh veih mastey’n pobble. 30Shen-y-fa nee shiu freayll my oardagh, nagh jean shiu cur-rish veg jeh ny cliaghtaghyn eajee, hug adsyn roo va reue, nagh jean-jee dwoaiagh jeu hene lioroo: Mish y Chiarn y Jee eu.