CAB. XIX

1As loayr y Chiarn rish Moses, gra, 2Loayr rish slane sheshaght chloan Israel, as abbyr roo, Bee-jee shiuish casherick: son ta mish y Chiarn y Jee eu casherick.

3Nee shiu dy chooilley ghooinney cur arrym da e voir as e ayr, as freayll my ghooneeyn: Mish y Chiarn y Jee eu. 4Cha chyndaa shiu gys jallooyn, ny jannoo diu hene jeeghyn grainnit: Mish y Chiarn y Jee eu.

5As my vees shiu chebbal toyrtys-casherick dy ourallyn-shee gys y Chiarn, nee shiu chebbal eh, jeh nyn aigney arryltagh. 6Bee eh er ny ee yn laa cheddin ta shiu chebbal eh, as er laa-ny-vairagh: as my vees veg er-mayrn gys y trass laa, bee eh er ny lostey ’syn aile. 7As my vees eh er ny ee edyr er y trass laa, te feohdoil; cha bee soiagh jeant jeh. 8Shen-y-fa, nee eshyn ta gee eh gymmyrkey e pheccah, son dy vel eh er chur gys drogh ymmyd shen ny va casherick gys y Chiarn: as bee’n annym shen er ny yiarey jeh veih’n pobble.

9As tra ta shiu buinn yn troar-arroo ’syn ouyr, cha jean oo buinn dy bollagh corneilyn dty vagher, chamoo nee oo chaglym jeeassyn y fouyr ayd. 10As cha jean oo jeelym dty gharey-feeyney, chamoo nee oo chaglym dy bollagh dy chooilley verrish t’ayns dty gharey-feeyney; nee oo faagail ad gour y voght as y joarree: Mish y Chiarn y Jee eu.

11Cha jean shiu geid, ny dellal dy molteyragh, ny ginsh breg ry-cheilley.

12As cha jean shiu loo liorish m’ennym’s dy foalsey; chamoo ghoys oo ennym dty Yee ayns fardail: Mish y Chiarn.

13Cha jean oo molley dty naboo, ny tranlaase ’yannoo er: cha bee faill y labree ayns dty laue fud-ny-hoie, derrey’n voghrey.

14Cha jean oo gweeaghyn da’n bouyr, ny kiap-snapperal y choyrt roish y doal; agh gowee oo aggle roish Jee: Mish y Chiarn.

15Cha jean shiu veg y neu-chairys ayns briwnys; cha jean oo soiaghey jeh persoon y voght, ny cur geill da persoon y verchagh: agh ayns cairys nee uss briwnys dty naboo.

16Cha jed oo mygeayrt, myr skeealleyder mastey dty phobble: chamoo nee oo shassoo noi fuill dty naboo: Mish y Chiarn.

17Cha bee dwoaie ayd er dty naboo ayns dty chree: ver oo dy dooie oghsan da dty naboo, as gyn lhiggey da tannaghtyn ayns e pheccah.

18Cha gow cooilleeney ec dty laue hene, ny gymmyrkey drogh-aigney erbee noi cloan dty phobble: agh ver oo graih da dty naboo myr dhyt hene: Mish y Chiarn.

19Nee shiu freaylley my lattyssyn: cha lhig oo da dty ollagh gientyn rish maase jeh dooghys elley: cha jean oo cuirr dty halloo lesh caghlaa rass fud-y-cheilley: cha jean oo ceau garmad dy linsee-woolsee.

20As quoi-erbee ta lhie marish inney-veyl, nasht rish dooinney, as nagh vel ee dy slane feayshlit, ny e reamys eck; bee ish scuitchit: cha bee ad nyn goyrt gy-baase, er-yn-oyr nagh row e slane seyrsnys eck. 21As ver y dooinney lesh e oural-loght gys y Chiarn, gys dorrys y chabbane-agglish; ta shen, rea son oural-losht. 22As nee’n saggyrt lhiasaghey ’yannoo er e hon, lesh rea yn oural-loght, fenish y Chiarn, son e pheccah t’eh er n’yannoo: as bee e pheccah er ny leih da.

23As tra vees shiu er jeet gys y cheer, as er hoiaghey dy chooilley cheint dy viljyn, gour beaghey; eisht nee shiu coontey yn mess oc myr neu-ghlen: three bleeaney bee eh myr shoh diu neu-ghlen: cha bee eh er ny ee. 24Agh ayns y chiarroo vleïn, bee’n slane mess echey casherick, gys moylley’n Chiarn. 25As ayns y wheiggoo vleïn, nee shiu gee jeh’n mess oc, dy vod bannaght smoo ve er y vishagh oc: Mish y Chiarn y Jee eu.

26Cha jean shiu veg y ee vees yn uill ayn: chamoo nee shiu obbeeys y chliaghtey, ny geill (faase-chredjuagh) ’choyrt da traaghyn. 27Cha jean shiu baarey nyn ghing runt mygeayrt, chamoo nee oo mhilley cummey dty aasaag. 28Cha jean shiu giaraghyn y choyrt ayns yn eill eu son ny merriu, ny cronnyn erbee y choyrt erriu: Mish y Chiarn.

29Ny jean dty inneen y injillaghey, dy chur urree dy ve ny streebagh; er-aggle dy duitt y cheer gys maarderys, as y cheer cheet dy ve lane dy olkys.

30Nee shiu freaylley my ghooneeyn, as graih onnoroil y hoilshaghey da m’ynnyd casherick: Mish y Chiarn.

31Ny cur-jee geill dauesyn ta cur-rish faishnys; chamoo eiyr-jee er fir-obbee, dy ve cleaynit lioroo: Mish y Chiarn y Jee eu.

32Nee uss girree seose kionfenish y chione lheeah, as ooashley y choyrt da’n chenndeeaght, as aggle y ghoaill roish dty Yee: Mish y Chiarn.

33As my ta joarree cummal mayrt ’sy cheer, cha jean shiu tranlaase er. 34Agh bee’n joarree, ta cummal mêriu, diuish myr fer ruggit ny mast’ eu, as ver oo graih da myr dhyt hene; son va shiuish nyn yoarreeyn ayns cheer Egypt: Mish y Chiarn y Jee eu.

35Cha jean shiu neu-chairys erbee ayns briwnys, ayns towse-lhiurid, ny towse-trimmid, ny ayns towse-saagh. 36Meihaghyn corrym, weightyn corrym, as siyn-towse kiart, vees eu: Mish y Chiarn y Jee eu, hug lhiam shiu magh as cheer Egypt. 37Shen-y-fa nee shiuish freaylley ooilley my lattyssyn, as ooilley my vriwnyssyn, dy chooilleeney ad: Mish y Chiarn.