CAB. II

1As tra nee fer erbee chebbal oural-arran da’n Chiarn ta’n oural echey dy ve flooyr meein: as nee eh deayrtey ooil er, as coyrt frankincense huggey. 2As ver eh lesh shen gys ny saggyrtyn mec Aaron: as nee fer jeu goaill ass lane e ghurn jeh’n flooyr, as jeh’n ooil marish ooilley yn frankincense; as nee’n saggyrt lostey ayrn jeh son cowrey er yn altar, dy ve oural jeant lesh aile gys yn Chiarn. 3As bee yn chooid elley jeh’n oural-arran lesh Aaron as e vec; te’n red smoo casherick jeh ourallyn y Chiarn jeant lesh aile.

4As my ver oo lhiat toyrtys dy oural-arran dy ve aarlit ’syn oghe, shegin da ve keeakyn gyn soorit dy flooyr meein lesh ooil ny chione, ny gyn soorit slaiyt lesh ooil. 5As my vees toyrtys yn oural-arran ayd’s dy ve aarlit ayns pan, shegin da ve flooyr meein slaiyt lesh ooil. 6Nee oo brishey eh ayns peeshyn as deayrtey ooil er: te oural-arran.

7As my vees toyrtys dty oural-arran dy ve aarlit ayns frynepan, shegin da ve jeant dy flooyr meein lesh ooil. 8As ver oo lhiat yn oural-arran, ta dy ve jeant jeh ny reddyn shoh, gys y Chiarn: as tra te er ny choyrt da’n saggyrt, ver eshyn lesh eh gys yn altar. 9As nee’n saggyrt goaill veih’n oural-arran sample jeh, as shen y lostey er yn altar: ta shoh oural jeant lesh aile dy hoar millish gys y Chiarn. 10As bee shen ny ta er-mayrn jeh’n oural-arran, lesh Aaron as e vec: te’n red smoo casherick, jeh ourallyn y Chiarn jeant lesh aile. 11Cha bee veg jeh’n oural-arran, ver shiu lhieu gys y Chiarn, jeant lesh soorit: son cha jean shiu lostey veg y soorit, ny veg y vill, ayns oural erbee gys y Chiarn jeant lesh aile.

12Agh son yn oural jeh toshiaght ny messyn, nee shiu chebbal ad gys y Chiarn: agh cha bee ad er nyn lostey er yn altar, son soar millish. 13As dagh toyrtys jeh dty oural-arran, nee uss y yannoo blaystal lesh sollan; chamoo faagys oo ass dty oural-arran sollan chonaant dty Yee: lesh ooilley dty ourallyn nee oo chebbal sollan. 14As my t’ou chebbal oural-arran jeh toshiaght dty vessyn da’n Chiarn, nee oo chebbal, son yn oural-arran jeh dty chied-vessyn, jeeassyn glass dy arroo, chyrmit rish yn aile, eer arroo bwoailt magh ass jeeassyn lane. 15As ver oo ooil er, as frankincense y choyrt gys shen; she oural-arran eh. 16As nee’n saggyrt lostey yn sample jeh, ayrn jeh’n arroo bwoailt, as ayrn jeh’n ooil, marish ooilley’n frankincense: ta shoh chebbal jeant lesh aile gys yn Chiarn.