CAB. XX

1As loayr y Chiarn rish Moses, gra, 2Nee oo gra, ny sodjey, rish cloan Israel, Quoi-erbee eh jeh cloan Israel, ny jeh’n joarree ta cummal ayns Israel, ta chebbal veg jeh e luight da Molech: bee eh dy shickyr er ny choyrt gy-baase; nee sleih ny cheerey eshyn y chlaghey. 3As neem’s soiaghey m’eddin noi’n dooinney shen, as eshyn y yiarey jeh veih mastey’n pobble; er-yn-oyr dy vel eh er hebbal jeh e luight da Molech, dy chur cooyl rish my ynnyd, casherick, as dy hoiaghey beg jeh m’ennym casherick. 4As my ta sleih ny cheerey jeh nyn yoïn follaghey nyn sooillyn veih’n dooinney, tra t’eh chebbal jeh e luight da Molech, as nagh vel ad dy stroie eh; 5Eisht neem’s soiaghey m’eddin noi’n dooinney shen, as noi e chynney; as nee’m eh y yiarey jeh, as ooilley ny ta geiyrt er ayns e pheccah, dy hebbal e luight gys Molech, veih mastey’n pobble.

6As yn annym ta geiyrt orroosyn ta cur-rish obbeeys, as buitcheraght, as jannoo maarderys [spyrrydoil] roo, neem’s soiaghey m’eddin noi’n annym shen, as eshyn y yiarey ersooyl veih mastey’n pobble. 7Jean-jee shiu hene y casherickey er-y-fa shen, as bee-jee casherick: son mish y Chiarn y Jee eu. 8As nee shiuish freaylley my lattyssyn, as y chooilleeney ad: Mish y Chiarn ta dy chasherickey shiu.

9Quoi-erbee ta gwee mollaght da e ayr, ny e voir, bee eh er ny choyrt gy-baase; er hene vees yn uill echey.

10As y dooinney ta foiljagh jeh brishey poosey rish ben ghooinney elley, eer eshyn ta brishey poosey rish ben e naboo, bee’n maarderagh as y streebagh dy shickyr er nyn goyrt gy-baase. 11As y dooinney ta lhie marish ben e ayrey t’eh er roostey nearey e ayrey: bee ad nyn-neesht er nyn goyrt gy-baase: orroo hene vees yn uill oc. 12My nee dooinney lhie marish e inneen-’sy-leigh, bee ad nyn-neesht er nyn goyrt gy-baase: t’ad er vrishey’n oardagh cooie; bee’n uill oc orroo hene. 13My ta dooinney lhie marish dooinney, myr marish ben, t’ad nyn-neesht er n’yannoo peccah feohdagh: bee ad dy shickyr er nyn goyrt gy-baase: orroo hene vees yn uill oc. 14My ta dooinney goaill huggey ben as e moir, te peccah trome; bee ad er nyn lostey ’syn aile, chammah eshyn as adsyn; son nagh bee lheid y drogh-yannoo ny-vud eu. 15As my ta dooinney lhie marish baagh, bee eh, son shickyrys, er ny choyrt gy-baase. 16As my ta ben lhie sheese roish baagh erbee, nee uss yn ven as y baagh y varroo: bee ad, son shickyrys, er nyn goyrt gy-baase: bee’n uill oc orroo hene. 17My nee dooinney goaill e huyr, inneen e ayrey, ny inneen e vayrey, as ad dy lhie cooidjagh; te red feer peccoil; as bee ad er ny yiarey jeh ayns shilley’n pobble oc: t’eh er roostey nearey e huyr; nee eh e pheccah y ymmyrkey. 18As my nee dooinney lhie marish ben, as e chingys dooghyssagh urree, as roostey yn nearey eck; t’eh er vrah yn roie-folley eck, as ish myrgeddin: as bee ad nyn-neesht er ny yiarey jeh veih mastey’n pobble. 19As cha jean oo roostey nearey shuyr dty vayrey, ny shuyr dty ayrey: son t’eh roostey nearey yn kynney faggys echey: nee ad gymmyrkey nyn loght. 20As my nee dooinney lhie marish ben e naim, t’eh er roostey nearey e naim: nee ad gymmyrkey nyn beccah; yiow ad baase gyn sluight. 21As my nee dooinney goaill ben e vraarey, te red neu-ghlen: t’eh er roostey nearey e vraar; bee ad gyn sluight.

22Nee shiu, er-y-fa shoh, freaylley ooilley my lattyssyn, as my vriwnyssyn, as jannoo ad, nagh jean y cheer huggey ta mish dy choyrt lhiam shiu dy chummal, shiu y skeeah magh. 23As cha n’eiyr shiu er cliaghtaghyn ny ashoonyn, ta mish tilgey magh rhymbiu: son v’adsyn kyndagh jeh ooilley ny peccaghyn shoh, as myr shen hug mee feoh daue. 24Agh ta mee er ghra riu, Nee shiu yn cheer oc y ghoaill son eiraght, as diuish ver-yms eh dy ghoaill eh diu hene; cheer ta palchey ayns bainney as mill: Mish y Chiarn y Jee eu, ta er scarrey shiu veih dy chooilley phobble elley. 25Shen-y-fa ver shiu scarrey eddyr beiyn glen as neu-ghlen, as eddyr eeanlee glen as neu-ghlen: as cha jean shiu shiu-hene feohdagh liorish baagh ny eean, ny liorish keint erbee dy red bio ta snaue er y thalloo, shen ta mish er lhiettal veue myr neu-ghlen. 26As bee shiu casherick dooys: son mish y Chiarn, ta casherick, as er scarrey shiu veih dy chooilley phobble elley, dy vod shiu ve lhiam pene.

27Dooinney neesht ny ben, ta cur-rish obbeeys, ny buitcheraght, vees dy feer er nyn goyrt gy-baase; bee ad er nyn glaghey: bee’n uill oc orroo hene.