CAB. XXII

1As loayr y Chiarn rish Moses, gra, 2Loayr rish Aaron, as e vec, [ayns nyn neu-ghlennid], dy scarrey ad hene, veih reddyn casherick cloan Israel, as nagh jean ad beg y hoiaghey jeh m’ennym’s casherick, ayns shen ny t’ad dy chasherickey hym’s: Mish y Chiarn. 3Abbyr roo, Quoi-erbee eh jeh ooilley nyn sluight, mastey ny sheelogheyn eu, ta goll mysh ny reddyn casherick, shen ta cloan Israel dy chasherickey gys y Chiarn, lesh e neu-ghlennid er, bee’n annym shen er ny yiarey jeh veih m’enish: Mish y Chiarn. 4Dooinney erbee jeh cloan Aaron ta ny lourane, ny ta roie-folley er; cha jean eh gee jeh ny reddyn casherick, derrey vees eh glen. As fer erbee ta bentyn rish red erbee ta neu-ghlen liorish y varroo, ny roie-folley; 5Ny fer erbee vennys rish red snauee erbee, liorish oddys eh ve jeant neu-ghlen, ny dooinney neu-ghlen, cre-erbee’n neu-ghlennid t’er. 6Bee’n annym vennys rish y lheid, neu-ghlen gys yn astyr, as cha jean eh gee jeh ny reddyn casherick, mannagh jean eh niee e chorp lesh ushtey. 7As tra ta’n ghrian er n’gholl sheese, bee eh glen, as nee eh ny lurg shen gee jeh ny reddyn casherick; son dy nee shen e veaghey. 8Shen ny ta geddyn baase jeh hene, ny ta raipit lesh beishtyn cha jean eh gee, dy yannoo eh hene neu-ghlen lesh: Mish y Chiarn. 9Nee ad er-y-fa shen, freayll m’oardagh, er-aggle dy lhie ad fo peccah, as baase y gheddyn er y hon, my t’ad dy vrishey eh: Mish y Chiarn ta dyn gasherickey ad. 10Cha jean joarree erbee gee jeh’n red casherick: joarree ta goaill aaght marish y saggyrt, ny sharvaant failt, cha n’ee ad jeh ny reddyn casherick. 11Agh my ta’n saggyrt kionnaghey fer erbee lesh e argid, nee eh gee jeh, as eshyn ta ruggit ayns e hie: nee adsyn gee jeh e vee. 12Myrgeddin my vees inneen y taggyrt poost rish joarree, cha vod ish gee jeh oural ny reddyn casherick. 13Agh my ta inneen y taggyrt ny ben-treoghe, ny scarrit, as nagh vel lhiannoo eck, as er jyndaa reesht gys thie e ayrey, myr ayns yn aegid eck, nee ish gee jeh bee e ayrey; agh cha jean joarree erbee gee jeh.

14As my ta dooinney gee jeh ny reddyn casherick trooid mee-hushtey, eisht ver eh yn wheiggoo ayrn jeh shen huggey, as shen y choyrt da’n taggyrt, marish y red casherick. 15As cha jean ad ymmyd cadjin jeh reddyn casherick cloan Israel, t’ad dy hebbal gys y Chiarn: 16Ny lhiggey daue tuittym fo kerraghey loght, tra t’ad gee ny reddyn casherick: son mish y Chiarn ta dyn gasherickey ad. 17As loayr y Chiarn rish Moses, gra,

18Loayr rish Aaron, as e vec, as ooilley cloan Israel, as abbyr roo, Fer erbee jeh thie Israel, ny nyn yoarreeyn ayns Israel, ta son chebbal e hoyrtys son ooilley e vreearraghyn, as son ooilley e ourallyn-arryltagh, nee ad chebbal gys y Chiarn, son oural-losht: 19Nee shiu chebbal jeh nyn aigney hene, fyrrynagh gyn lheamys, jeh ny dew, jeh ny kirree, ny jeh ny goair. 20Agh cre-erbee ta lheamys er, cha jean shiu shen y hebbal: son cha bee soiaghey jeant jeh er nyn son. 21As quoi-erbee hebbys toyrtys-casherick dy oural-shee gys y Chiarn, dy yannoo e vreearrey mie, ny oural-aigney-arryltagh ayns dew, ny kirree; bee eh slane gyn cron, dy vod soiaghey ’ve jeant jeh: cha bee lheamys erbee er. 22Doal, ny brisht, ny baccagh, ny lesh sheane, ny brooan, ny screb, cha jean shiu ad shoh y hebbal gys y Chiarn, ny oural lesh aile y yannoo jeu, er altar y Chiarn. 23Dow, ny eayn ta olt erbee echey ny smoo na ny sloo, foddee oo shen y hebbal son oural-arryltagh; agh son breearrey cha bee soiagh jeant jeh. 24Cha jean shiu chebbal gys y Chiarn shen ny ta broojit, ny gortit, ny brisht, ny giarit; chamoo nee shiu shen y oural ayns y cheer eu. 25Chamoo veih laue joarree nee shiu chebbal arran y Jee eu jeh nyn lheid; er-yn-oyr dy vel y vroïd, as yn lheamys oc ayndoo: cha bee soiagh jeant jeu er nyn son.

26As loayr y Chiarn rish Moses, gra, 27Tra ta lheiy, ny eayn, ny mannan ruggit, eisht bee eh er e voir shiaght laa; as veih’n hoghtoo laa, as maghey shen, bee soiagh jeant jeh son oural jean lesh aile gys y Chiarn. 28As edyr eh ve bea, ny keyrrey, cha marr shiu ee, son oural, as yn unnane aeg eck, nyn-neesht ’syn un laa. 29As tra ta shiu chebbal oural dy wooise gys y Chiarn, cheb-jee shen jeh nyn aigney-mie hene. 30Er y laa cheddin bee eh er ny vaarail: cha bee veg jeh faagit gys y voghrey: Mish y Chiarn. 31Shen-y-fa nee shiu freaylley my annaghyn, as jannoo ad: Mish y Chiarn. 32Chamoo nee shiu mee-ooashley da m’ennym casherick; agh beem’s er my chasherickey mastey cloan Israel: Mish y Chiarn ta dy nyn gasherickey, 33Hug lhiam shiu magh ass cheer Egypt, dy ve yn Jee eu: Mish yn Chiarn.