CAB. XXIII

1As loayr y Chiarn rish Moses, gra, 2Loayr rish cloan Israel, as abbyr roo, Mychione feaillaghyn y Chiarn, ta shiuish dy ockley magh son imbaghyn casherick, shoh myr nee shiu freayll ad. 3Shey laa vees obbyr er ny yannoo: agh ta’n chiaghtoo laa doonaght dy aash, as son meeiteil casherick; cha jean shiu veg yn obbyr er: she doonaght y Chiarn eh ayns ooilley nyn gummallyn.

4Ad shoh feaillaghyn y Chiarn, eer ny meeiteilyn casherick, nee shiuish nyn eam, ayns nyn imbaghyn cooie. 5Er y chiarroo laa yeig jeh’n chied vee, ayns yn astyr, ta caisht y Chiarn. 6As er y wheiggoo laa yeig jeh’n vee cheddin, ta feailley yn arran gyn soorit gys y Chiarn: shiaght laghyn nee shiu gee arran gyn soorit. 7Er y chied laa, vees eu meeiteil casherick: er cha jean shiu veg yn obbyr cadjin. 8Agh nee shiu chebbal oural jeant lesh aile gys y Chiarn, shiaght laa: er y chiaghtoo laa ta meeiteil casherick: er cha jean shiu veg yn obbyr cadjin.

9As loayr y Chiarn rish Moses, gra, 10Loayr rish cloan Israel, as abbyr roo, Tra vees shiu er jeet stiagh ’sy cheer ta mish dy chur diu, as erreish diu v’er droggal y fouyr ayn, eisht ver shiu lhieu bunney jeh toshiaght messyn y fouyr eu, gys y taggyrt: 11As nee eshyn craa noon as noal yn vunney fenish y Chiarn, dy vod soiagh ’ve jeant jeh er nyn son: er laa-ny-vairagh lurg y doonaght, nee’n saggyrt shen y hroggal seose. 12As nee shiuish chebbal er y laa, ta shiu craa yn vunney, eayn fyrryn gyn lheamys, jeh’n chied vleïn, son oural-losht gys y Chiarn. 13As bee’n oural-arran echey hoght chaart dy flooyr meein lesh ooil ny chione, oural jeant lesh aile gys y Chiarn, son soar millish: as bee’n oural-jough echey dy feeyn, yn chiarroo ayrn jeh hin [ny mysh kaart]. 14As cha jean shiu gee arran, ny arroo greddanit, ny jeeassyn glassey, derrey’n laa ta shiu er chur lhieu oural gys y Jee eu: bee shen slattys kinjagh trooid nyn sheelogheyn, ayns ooilley nyn gummallyn.

15As nee shiu yn coontey ghoaill veih laa-ny-vairagh lurg y doonaght, veih’n laa heb shiu yn vunney-criht; slane shiaght shiaghtinyn: 16Eer gys laa-ny-vairagh lurg y chiaghtoo ghoonaght, nee shiu coontey jeih laa as da-eed; as nee shiu chebbal oural-arran noa gys y Chiarn. 17Ver shiu lhieu ass nyn gummallyn daa willeen-ourallagh, jeh hoght chaart dy flooyr meein, bee ad shoh jeant lesh soorit, t’ad toshiaght ny messyn gys y Chiarn. 18As nee shiu chebbal marish yn arran shiaght eayin gyn lheamys, jeh’n chied vleïn, as un dow aeg, as daa rea: bee ad son oural-losht gys y Chiarn, marish yn oural-arran as nyn ourallyn-jough, oural jeant lesh aile son soar millish roish y Chiarn. 19Eisht chebbee shiu un vannan jeh ny goair, son oural-peccah, as daa eayn jeh’n chied vleïn, son ourallyn-shee. 20As nee’n saggyrt chebbal seose ad marish arran ny chied-vessyn, son oural-criht fenish y Chiarn, marish y daa eayn: bee ad casherick da’n Chiarn son y taggyrt. 21As ver shiu eam er y laa cheddin, dy vod shoh ve diuish son meeiteil casherick: cha jean shiu veg yn obbyr cadjin er; bee shen ny slattys kinjagh ayns ooilley nyn gummallyn, trooid nyn sheelogheyn.

22As tra ta shiu buinn fouyr y thallooin eu, cha jean oo buinn dy bollagh corneilyn dty vagher, chamoo nee oo chymsaghey ny jeeassyn: nee oo faagail shen da’n voght, as da’n joarree: Mish y Chiarn y Jee eu.

23As loayr y Chiarn rish Moses, gra, 24Loayr rish cloan Israel, gra, Ayns y chiaghtoo vee, er y chied laa jeh’n vee, bee doonaght eu, sheidey trumpetyn son imraa; bee shoh meeiteil casherick. 25Cha jean shiu veg yn obbyr cadjin er; agh nee shiu chebbal oural jeant lesh aile gys y Chiarn.

26As loayr y Chiarn rish Moses, gra, 27Myrgeddin er y jeihoo laa jeh’n chiaghtoo vee shoh, vees laa yn lhiasaghey, son meeiteil casherick diu; as ver shiu nyn anmeenyn fo trimshey, as chebbal oural jeant lesh aile gys y Chiarn. 28As cha jean shiu veg yn obbyr er y laa cheddin: son laa dy lhiasaghey eh, dy yannoo lhiasaghey er nyn son, fenish y Chiarn y Jee eu. 29Son annym erbee nagh bee fo trimshey er y laa cheddin, bee eh er ny yiarey jeh veih mastey e phobble. 30As quoi-erbee ta jannoo veg yn obbyr er y laa shen, eshyn neem’s y stroie veih mastey e phobble. 31Cha jean shiu veg yn obbyr: Bee shen slattys son dy bragh, trooid nyn sheelogheyn, ayns ooilley nyn gummallyn. 32Bee shen doonaght dy aash diu, [myr y chiaghtoo laa] as ver shiu nyn anmeenyn fo trimshey er y nuyoo laa jeh’n vee, ec yn astyr: veih fastyr gy fastyr nee shiuish freaylley’n doonaght eu.

33As loayr y Chiarn rish Moses, gra, 34Loayr rish cloan Israel, gra, Yn wheiggoo laa yeig jeh’n chiaghtoo vee shoh, vees feailley ny cabbaneyn son shiaght laa, da’n Chiarn. 35Er y chied laa bee meeiteil casherick ayn: cha jean shiu veg yn obbyr cadjin er. 36Shiaght laa nee shiu chebbal oural jeant lesh aile da’n Chiarn: er yn hoghtoo laa bee meeiteil casherick eu; as nee shiu chebbal oural jeant lesh aile da’n Chiarn; te ard feailley, as cha jean shiu veg yn obbyr cadjin er. 37Ad shoh feaillaghyn y Chiarn: nee shiuish fockley magh son meeiteilyn casherick, dy hebbal oural jeant lesh aile da’n Chiarn, oural-losht, as oural-arran, oural-peccah, as ourallyn-jough: shirveish dagh laa er hene: 38Harrish as erskyn dooneeyn y Chiarn, as ny giootyn, as ooilley ny breearraghyn eu, as ooilley nyn ourallyn-arryltagh, ta shiu dy hebbal gys y Chiarn. 39Myrgeddin, er y wheiggoo laa yeig jeh’n chiaghtoo vee, tra ta shiu er haglym stiagh mess y thallooin, nee shiu feailley y reayll da’n Chiarn shiaght laa: er y chied laa vees doonaght (laa dy aash) as er y hoghtoo laa vees doonaght. 40As nee shiu goaill er y chied laa banganyn dy viljyn aalin, banglaneyn dy viljyn-palm, as banglaneyn dy viljyn duillagh, as shellagh ny strooanyn; as nee shiu goaill boggey fenish y Chiarn y Jee eu, shiaght laa. 41As nee shiu freayll eh feailley gys y Chiarn shiaght laghyn ’sy vleïn. Bee eh slattys kinjagh ayns nyn sheelogheyn: nee shiu freayll eh casherick ’sy chiaghtoo vee. 42Nee shiu cummal ayns cabbaneyn shiaght laa, ooilley ny ta Israeliteyn dooghyssagh nee ad cummal ayns cabbaneyn: 43Dy vod fys ’ve ec nyn sheelogheyn, dy dug mish er cloan Israel dy chummal ayns cabbaneyn, tra hug mish lhiam ad magh ass cheer Egypt: Mish y Chiarn y Jee eu. 44As ren Moses fockley magh da cloan Israel feaillaghyn y Chiarn.