CAB. XXV

1As loayr y Chiarn rish Moses, ayns slieau Sinai, gra, 2Loayr rish cloan Israel, as abbyr roo, Tra vees shiu er jeet gys y cheer ta mish dy chur diu, eisht bee doonaght (aash) ec y thalloo, da’n Chiarn. 3Shey bleeaney nee oo cuirr dty vagher, as shey bleeaney nee oo pollal dty gharey-feeyney, as chaglym stiagh yn mess echey: 4Agh er y chiaghtoo vleïn, vees doonaght dy aash ec y thalloo, doonaght da’n Chiarn: cha jean oo edyr cuirr dty vagher, ny pollal dty gharey-feeyney. 5Shen ny ta gaase jeh hene jeh’n fouyr ayd, cha jean oo buinn, ny chaglym messyn dty villey-feeyney gyn-pollal: son ta shen bleïn dy aash da’n thalloo. 6As bee doonaght y thallooin beaghey diu; dhyt’s, as da dty harvaant, as da dty inney-veyl, as da dty harvaant failt, as da’n joarree ta baghey mayrt, 7As son dt’ollagh as son ny beiyn t’er dty halloo, bee ooilley yn bishagh echey son beaghey.

8As nee uss coontey shiaght dooneeyn dy vleeantyn, shiaght keayrtyn shiaght bleeantyn; as bee earish ny shiaght dooneeyn dy vleeantyn dhyt’s nuy bleeaney as da-eed. 9Eisht nee oo trumpet yn 25:9 Bleïn dy voggey.Jubile y heidey, er y jeihoo laa jeh’n chiaghtoo vee; er laa yn lhiasaghey, bee’n trumpet er ny helm trooid y slane cheer eu. 10As nee shiu casherickey yn jeihoo vleïn as da-eed, as fockley magh reamys trooid ooilley’n cheer, gys ooilley ny cummaltee eck: bee shen Jubile diu; as nee dy chooilley ghooinney chyndaa gys e eiraght hene, as gys e chynney hene. 11Jubile vees yn jeihoo vleïn as da-eed shen diuish: cha jean shiu cuirr, ny buinn shen ny ta gaase jeh hene, ny chaglym messyn dty villey-feeyney gyn-pollal. 12Son te’n Jubile: bee eh casherick diu: nee shiu gee yn bishagh echey ass y vagher. 13Ayns bleïn y Jubile shoh, nee shiu chyndaa dagh dooinney gys e eiraght. 14As my t’ou creck veg rish dty naboo, ny kionnaghey veih laue dty naboo; cha jean shiu tranlaase er y cheilley. 15Cordail rish earroo ny bleeantyn lurg y jubile, nee oo kionnaghey veih dty naboo, as cordail rish earroo bleeantyn ny messyn, nee eshyn creck rhyt’s. 16Cordail rish earroo ny bleeantyn ta royd, wheesh shen smoo vees y phrice, as my sloo ta ny bleeantyn, my sloo vees y phrice: son lurg earroo bleeantyn ny messyn, t’eh creck rhyt. 17Shen-y-fa, cha jean shiu tranlaase er y cheilley; agh nee uss goaill aggle roish dty Yee; son mish y Chiarn y Jee eu.

18Shen-y-fa, nee shiu cooilleeney my lattyssyn, as freaylley my vriwnyssyn, as jannoo ad; as nee shiu cummal ’sy cheer ayns sauchys. 19As nee’n thalloo gymmyrkey magh e mess, as bee shiu jeant magh dy palchey, as baghey ayn dy sauchey. 20As my nee shiu gra, Cre nee mayd son beaghey er y chiaghtoo vleïn? cur-my-ner, cha vel shin dy chuirr, ny dy haglym stiagh nyn droar: 21Eisht ver-yms my vannaght erriu, ayns y cheyoo vleïn, as nee shen gymmyrkey mess cour three bleeaney. 22As nee shiu cuirr er y hoghtoo vleïn, as foast beaghey er y chenn troar, derrey’n nuyoo vleïn; derrey hig y fouyr noa stiagh, nee shiu gee jeh’n chenn stoyr.

23Cha jean shiu yn thalloo y chreck son dy bragh: son lhiam’s y thalloo; son cha vel shiu agh myr joarreeyn as jiuleanyn dooys. 24As ayns ooilley thalloo nyn eiraght, nee shiu lowal reamys-feaysley son y thalloo.

25My ta dty vraar er jeet dy ve boght, as er chreck ersooyl kuse jeh e eiraght, as my hig veg jeh e chynney dy eaysley eh, eisht bee cairys-feaysley echeysyn jeh shen ny chreck e vraar. 26As mannagh vel carrey ec y dooinney dy eaysley eh, as eh hene er jeet dy ve fondagh dy eaysley eh; 27Eisht lhig da coontey ny bleeantyn neayr’s chreck eh eh, as chyndaa reesht ny ta harrish da’n dooinney chionnee eh: dy vod eh hene cheet reesht gys e eiraght. 28Agh mannagh vel y fort echey dy yannoo shen mie da, eisht, bee shen ny va creckit ayns laue y kionneyder gys bleïn y Jubile: as ayns y Jubile bee eh feayshlit, as nee eh chyndaa gys e eiraght. 29As my nee dooinney creck thie-vaghee ayns ard-valley voallit; eisht foddee eh shen y eaysley, cheu-sthie jeh slane bleïn lurg da ve creckit: cheu-sthie jeh slane bleïn foddee eh shen y eaysley. 30As mannagh bee eh er ny eaysley cheu-sthie jeh’n vleïn; eisht bee’n thie t’ayns yn ard-valley voallit leshyn chionnee eh, son dy bragh, trooid e heelogheyn: cha bee eh er ny eaysley ayns y Jubile. 31Agh bee thieyn ny baljyn gyn voallaghyn mygeayrt-y-moo, coontit myr magheryn ny cheerey: bee ad shen er nyn veaysley, as livreit seose ayns y Jubile. 32Ny-yeih, ard-valjyn ny Leviteyn, as thieyn ard-valjyn yn eiraght ocsyn, foddee ny Leviteyn feaysley ec traa erbee. 33As my ta dooinney kionnaghey veih ny Leviteyn; eisht bee’n thie va creckit, ayns ard-valley yn eiraght echey, er ny eaysley ayns bleïn y Jubile: son ta thieyn ard-valjyn ny Leviteyn yn eiraght oc mastey cloan Israel. 34Agh ny gleebyn, mysh ny ard-valjyn oc, cha vod ve creckit; son shen nyn eiraght shickyr.

35As my ta dty vraar er jeet dy ve boght, as gyn fort dy chooney lesh hene; eisht nee uss feaysley ’yannoo er: ga dy nee joarree ny troailtagh eh; dy vod eshyn baghey mayrt. 36Ny trog veg yn use ny bishagh jehsyn: agh gow aggle roish dty Yee: dy vod dty vraar baghey mayrt. 37Cha der oo dty argid da er use, ny dty veaghey y eeasagh da er-chee dy gheddyn cosney. 38Mish y Chiarn y Jee eu, hug lhiam shiu magh ass cheer Egypt, dy choyrt diu cheer Chanaan, as dy ve yn Jee eu.

39As my ta dty vraar ta baghey liort’s er jeet gys boghtynid, as er chreck eh hene rhyt (son beaghey;) cha der uss er shirveish myr sharvaant-bondiaght: 40Agh myr sharvaant failt, as myr jiulean, vees eh mayrt, dy hirveish oo gys bleïn y Jubile. 41As eisht lhiggee oo yn raad da, as e chloan mârish, as hed eh reesht gys e vooinjer hene, as gys eiraght e ayrey nee eh chyndaa. 42Son my harvaantyn’s ad, hug mish lhiam magh ass cheer Egypt: cha bee ad er nyn greck myr deiney-bondiaght. 43Cha jean oo reill harrish lesh dewlys, agh gowee oo aggle roish dty Yee. 44Bee chammah dty gheiney as dty vraane-bondiaght, jeh ny ashoonyn-quaagh ta mygeayrt-y-miu; jeusyn nee shiu kionnaghey deiney as mraane-bondiaght. 45Myrgeddin, jeh cloan y joarree ta baghey ny-vud eu, jeusyn nee shiu kionnaghey, as jeh’n sluight oc ta ruggit ’sy cheer eu: as bee adsyn myr nyn gooid. 46As nee shiu goaill ad myr eiraght da nyn gloan nyn yeï, son cooid eiraght: bee ad ny deiney-bondiaght eu son dy bragh: agh harrish nyn mraaraghyn cloan Israel, cha jean shiu reill lesh dewlys.

47As my nee troailtagh ny joarree cheet dy ve berchagh ny-vud eu, as dty vraar, ta cummal liorish, tuittym ayns boghtynid, as eh dy chreck eh hene rish y joarree ny’n troailtagh, ny rish veg jeh kynney’n joarree: 48Lurg da ve creckit, foddee eh v’er ny eaysley reesht; foddee fer jeh e gheiney eshyn y eaysley: 49Foddee e naim, ny mac e naim eshyn y casley, ny fer erbee jeh e chynney; ny my ta fort echey, foddee eh feaysley eh hene. 50As nee eh coontey rishyn chionnee eh, veih’n vleïn v’eh creckit rish, gys bleïn y Jubile: as bee price e chreck cordail rish earroo ny bleeantyn: myr traa sharvaant failt vees shen dasyn. 51My vees mooarane bleeantyn ergooyl; corrym roo shen ver eh reesht price y feaysley echey, ass yn argid v’eh kionnit lesh. 52As mannagh vel agh beggan dy vleeantyn ergooyl gys bleïn y jubile, eisht nee eh coontey rish, as corrym gys e vleeantyn ver eh dasyn reesht price e eaysley. 53Myr sharvaant failt gour y vleïn vees eh mârish: as cha vel eh dy reill harrish lesh dewlys ayns dty hilley’s. 54As mannagh bee eh er ny eaysley er yn aght shoh, eisht hed eh magh seyr ayns bleïn y Jubile; eh hene, as e chloan. 55Son ta cloan Israel my harvaantyn: my harvaantyn ad, hug mish lhiam ass cheer Egypt: Mish y Chiarn nyn Yee.