CAB. XXVI

1Cha jean shiu diu hene jallooyn, ny jeeghyn grainnit; ny troggal diu hene pillar, ny soiaghey seose clagh-hoit ayns y cheer eu, dy chroymmey sheese huggey: son mish y Chiarn y Jee eu. 2Nee shiu freayll my ghooneeyn, as cur onnor da my ynnyd casherick. Mish y Chiarn.

3My nee shiu shooyl ayns my lattyssyn, as freayll m’annaghyn, as jannoo ad; 4Eisht ver-yms fliaghey diu ’syn imbagh cooie, as ver y thalloo magh e bishagh, as nee biljyn y vagher gymmyrkey nyn mess. 5As nee’n bwoalley eu roshtyn gys y fouyr-feeyney, as y fouyr-feeyney gys y traa-correy: as bee nyn saie arran eu, as nee shiu baghey dy sauchey ayns y cheer. 6As ver-yms shee ’sy cheer eu, as nee shiu lhie sheese, as cha bee aggle erbee erriu: as eiyr-ym ersooyl drogh veishtyn ass y cheer, chamoo hed y cliwe [caggee] trooid y cheer. 7As hed shiuish er-eiyrt’s nyn noidyn, as tuittee ad rhymbiu liorish y chliwe, 8As nee queig jiuish keead y eiyrt ersooyl, as ver keead jiu er jeih thousaneyn cur cooyl: as nee nyn noidyn tuittym rhymbiu liorish y chliwe. 9Son neem’s soiaghey jiuish, as jannoo shiu messoil, as bishaghey shiu, as niartaghey my chonaant riu. 10As nee shiu baarail yn chenn stoyr, dy chur ass y raad eh, son room da’n troar noa. 11As nee’m soiaghey my chabbane casherick nyn mastey: as cha bee dwoaie ec m’annym erriu. 12As neem’s gimmeeaght mêriu as beem’s y Jee eu, as bee shiuish my phobble. 13Mish y Chiarn y Jee eu, hug lhiam shiu magh veih cheer Egypt, nagh beagh shiu fo’n vondiaght oc; as ta mee er vrishey kianglaghyn y whing eu, as er lhiggey diu shooyl dy jeeragh. 14Agh mannagh jean shiu m’y chlashtyn, as nagh gooilleen shiu ooilley ny oardaghyn shoh; 15As my nee shiu soiaghey beg jeh my lattyssyn, as cur cooyl rish my vriwnyssyn, as nagh jean shiu cooilleeney m’annaghyn, agh brishey my chonaant; 16Shoh myrgeddin neem’s y yannoo riuish, ver-yms lhiam erriu atchim, consumption, as crayn-losht, ver naardey’n soilshey, as cur sneih er y chree; nee shiu cuirr nyn sheel ayns fardail, son nee nyn noidyn gee eh. 17As nee’m soiaghey m’eddin nyn ’oï, as bee shiu er nyn stroie roish nyn noidyn: as nee ad reill harrishdiu, as nee shiu roie er-chea, tra nagh bee fer erbee er nyn eiyrt’s. 18As mannagh jean shiu foast, son ooilley shoh, geaishtagh rhym, eisht nee’m kerraghey shiu shiaght keayrtyn smoo son nyn beccaghyn. 19As brish-yms mooaralys nyn booar; as nee’m yn aer harrish nyn ghing myr yiarn, as yn ooir eu myr prash: 20As bee’n niart eu baarit ayns fardail son cha jean y thalloo eu cur magh e bishagh, ny biljyn y thallooin nyn mess.

21As my hed shiu m’oï, as nagh n’eaisht shiu rhym; neem’s shiu y cherraghey shiaght filley, cordail rish nyn beccaghyn. 22Nee’m marish shoh cur beishtyn feïe ny-vud eu, nee spooilley shiu jeh nyn gloan, as stroie nyn maase, as jannoo shiuish beggan ayns earroo; as bee nyn raaidyn mooarey treigit. 23As mannagh bee shiu er ny lhiasaghey lioroo shoh, agh shassoo magh m’oï: 24Eisht beem’s myrgeddin noi euish, as kerraghey shiu foast shiaght keayrtyn son nyn beccaghyn. 25As ver-yms lhiam y chliwe erriu, nee cooilleeney ’ghoaill erriu son brishey my chonaant: as tra ta shiu er nyn jaglym cooidjagh ayns nyn ard-valjyn, ver-yms y plague ny-vud eu; as bee shiu er nyn livrey gys laueyn nyn noidyn. 26As tra ta mish er vrishey lorg nyn arran, nee jeih mraane gaarlaghey nyn arran ’syn un oghe, as ver ad diu nyn arran reesht liorish towse: as nee shiu gee, as cha bee shiu jeant magh. 27As mannagh jean shiu, son ooilley shoh, cur geill dooys, agh tannaghtyn kinjagh mee-viallagh; 28Eisht beem’s nyn ’oï eu eer ayns dewlys: as mish, mee hene, nee shiuish y smaghtaghey shiaght keayrtyn smoo son nyn beccaghyn. 29As bee shiu êginit dy ee feill nyn mec, as feill nyn inneenyn. 30As nee’m stroie nyn ard-ynnydyn, as giarey sheese ny jallooyn eu, as tilgey nyn gallinyn er callinyn ny jallooyn eu, as ver m’annym feoh diu. 31As ver-yms naardey nyn ard-valjyn, as stroie-ym ny chiambleyn eu: as cha jean-ym soiagh jeh nyn ourallyn-millish. 32As neem’s y cheer eu follym-faase: as nee nyn noidyn cummal ayn, as gowee ad yindys. 33As nee’m nyn skeayley fud ny ashoonyn-quaagh, as y cliwe y hayrn nyn yeï: as bee’n cheer eu treigit, as nyn ard-valjyn follym-faase. 34Eisht yiow yn thalloo ny dooneeyn dy aash, choud as te ny lhie treigit, as shiuish ayns cheer nyn noidyn; eisht yiow’n thalloo fea dy gheddyn e ghooneeyn. 35Choud as te ny lhie bane, bee aash echey, er-yn-oyr nagh dooar eh aash e ghooneeyn, as shiuish cummal ayn. 36As orroosyn vees faagit bio jiuish, ver-yms annooinid cree ayns cheer nyn noidyn; as nee feiyr duillag criht ad y agglaghey; as nee ad chea, myr veih’n chliwe: as nee ad tuittym, tra nagh bee fer er nyn eiyrt’s. 37As nee ad tuittym harrish y cheilley myr roish y chliwe, tra nagh vel fer erbee er nyn eiyrt’s: as cha bee veg y vree ayndiu dy hassoo roish nyn noidyn. 38As nee shiu cherraghtyn fud ny ashoonyn-quaagh, as nee thalloo nyn noidyn shiuish y stroie. 39As nee adsyn, vees faagit er-mayrn, shymley ersooyl fo nyn mee-chraueeaght, ayns cheer nyn noidyn; as myrgeddin, ayns mee-chraueeaght nyn ayraghyn, nee ad shymley ersooyl mâroo. 40My nee ad goaill-rish nyn beccaghyn, as peccaghyn nyn ayraghyn, marish ny loghtyn t’ad er n’yannoo m’oï, as myrgeddin dy vel ad er n’irree magh m’oï; 41As dy vel mish neesht er choyrt cooyl roosyn, as er chur lhiam ad gys cheer nyn noidyn; my vees eisht nyn greeaghyn mee-viallagh er nyn injillaghey, as ad dy ghoaill rish kerraghey nyn beccaghyn: 42Eisht neem’s cooinaghtyn er my chonaant rish Jacob, as my chonaant neesht rish Isaac, as my chonaant myrgeddin rish Abraham cooin-yms er; as nee’m cooinaghtyn er y cheer. 43Yn thalloo neesht ta treigit lioroo, yiow eh e ghooneeyn (e aash,) choud as te ny lhie feayn nyn vegooish: as nee ad goaill-rish kerraghey nyn beccaghyn; eer er-yn-oyr, dy dug yn annym oc feoh da my lattyssyn. 44Agh ny-yeih, tra vees ad ayns cheer nyn noidyn, cha jean-ym ad y hilgey ersooyl, chamoo ver-ym feoh daue, dy stroie ad dy bollagh, dy vrishey my chonaant roo: son mish y Chiarn y Jee oc. 45Agh nee’m er y ghraih oc, cooinaghtyn er conaant nyn shenn-ayryn, ad chur mish lhiam magh ass cheer Egypt, ayns shilley ny ashoonee, dy ve yn Jee oc: Mish y Chiarn. 46Shoh ny slattyssyn as ny briwnyssyn as ny leighyn, ren y Chiarn goardaghey eddyr eh hene as cloan Israel, ayns slieau Sinai, liorish laue Voses.