CAB. XXVII

1As loayr y Chiarn rish Moses, gra, 2Loayr rish cloan Israel, as abbyr roo, Tra ta dooinney jannoo breearrey casherick, bee’n phrice son feaysley ny persoonyn lesh y Chiarn, myr ver uss orroo. 3As my te son dooinney veih feed gys three-feed bleïn dy eash; bee’n phrice-feaysley echey jeih shekelyn as da-eed dy argid, lurg 27:3 Ta shekel mysh daa skilling as groat.shekel yn ynnyd casherick. 4As my te son ben, eisht bee eh jeih shekelyn as feed. 5As my vees eh son queig gys feed bleïn dy eash; eisht bee’n phrice son y fyrrynagh feed shekel dy argid, as son y bwoirrynagh jeih shekelyn. 6As my vees eh son mee, gys queig bleeaney dy eash; eisht bee’n phrice son y lhiannoo-mac queig shekelyn dy argid, as son inneen three shekelyn dy argid. 7As my vees eh son three-feed bleïn d’eash, as erskyn: my te son dooinney, bee’n phrice queig shekelyn jeig, as son ben jeih shekelyn. 8Agh mannagh vel fort echey dy eeck y phrice v’er ny choyrt er; eisht hig eh fenish y taggyrt, as nee’n saggyrt price y hoiaghey er: cordail rish y fort echeysyn ren breearrey, ver y saggyrt price er. 9As my she baagh t’ayn, jeh nyn lheid as ta sleih chebbal gys y Chiarn: cre-erbee y lheid ta dooinney dy choyrt da’n Chiarn, bee eh casherick. 10Cha jean eh caghlaa, ny coonrey eh, mie son sie, ny sie son mie; as my nee eh coonrey baagh son baagh; eisht bee ad ny-neesht casherick. 11As my she baagh neu-ghlen t’ayn, nagh vod ve chebbit gys y Chiarn; eisht ver eh lesh y baagh fenish y taggyrt: 12As nee’n saggyrt priceil eh, my she mie ny sie te; myr t’ou uss, O haggyrt, coyrt price er, shen myr vees eh. 13As my nee eh feaysley eh; eisht ver eh huggey yn wheiggoo ayrn jeh’n phrice hug uss er.

14As tra ta dooinney chebbal e hie dy ve casherick da’n Chiarn; eisht nee’n saggyrt y phriceil eh, my she mie ny sie te: myr nee’n saggyrt priceil eh, shen myr vees eh. 15As my ta aigney echeysyn, heb y thie, dy eaysley eh: eisht ver eh yn wheiggoo ayrn jeh’n phrice huggey, as bee eh lesh hene. 16As my nee dooinney chebbal da’n Chiarn ayrn jeh magher e eiraght; eisht bee’n phrice cordail rish yn arroo-correy echey; bee homer dy oarn-chorrey er ny phriceil ec jeih shekelyn as da-eed dy argid. 17My nee eh chebbal e vagher veih bleïn y jubile, corrym rish y phrice nee eh shassoo. 18Agh my t’eh chebbal e vagher lurg y jubile; eisht nee’n saggyrt coontey dasyn yn argid cordail rish ny bleeantyn ta ry-heet, eer derrey bleïn y jubile, as bee wheesh shen er ny ghoaill veih’n phrice. 19As my ta aigney echeysyn, ren chebbal y magher, dy eaysley eh; eisht ver eh huggey yn wheiggoo ayrn jeh argid y phrice, as bee eh lesh hene. 20As mannagh jean eh feaysley yn magher, ny’n magher ve creckit rish fer elley; cha bee eh er ny eaysley arragh. 21Agh tra te roie magh ayns y jubile, bee’n magher casherick da’n Chiarn, myr magher fo breearrey: bee’n eiraght echey lesh ny saggyrtyn. 22As my ta dooinney chebbal da’n Chiarn magher kionnit, nagh vel jeh magheryn e eiraght; 23Eisht nee’n saggyrt coontey dasyn yn phrice hug uss er, eer gys bleïn y jubile: as eeckee eh yn phrice er y laa cheddin, myr cooid casherick y Chiarn. 24Er bleïn y jubile, bee’n magher er ny hyndaa huggeysyn ve kionnit veih, eer huggeysyn, yn eiraght echey ve. 25As bee dy chooilley phrice jeu shoh cordail rish shekel yn ynnyd casherick: feed gerah gys un shekel.

26Agh y chied-ruggit jeh’n maase, ta dy ve cairys y Chiarn, cha jean dooinney erbee shen y vreearrey; lhig eh ve dow, ny keyrrey: te hannah lesh y Chiarn. 27As my te jeh baagh neu-ghlen, eisht nee eshyn geeck er y hon, cordail rish y phrice ver oo er, as ver eh yn wheiggoo ayrn jeh shen huggey, as mannagh bee eh er ny eaysley, eisht bee eh er ny chreck cordail rish y phrice ver oo er. 28Ny-yeih, cha vod nhee erbee t’er ny chasherickey gys y Chiarn, lhig da ve dooinney ny baagh, ny thalloo-eiraght, ve creckit ny feayshlit: ta dagh nhee fo breearrey, feer casherick gys y Chiarn. 29Cre-erbee vees [myr shoh] er ny chasherickey gys y Chiarn, cha bee eh er ny eaysley: agh bee eh dy shickyr er ny choyrt gy-baase. 30As ooilley jaghee’n thallooin, lhig eh ve jeh troar y vagheragh, ny jeh mess ny biljyn, te lesh y Chiarn: te casherick gys y Chiarn. 31As my nee dooinney erbee feaysley veg jeh’n jaghee echey; ver eh yn wheiggoo ayrn jeh ny sheeagh eh lesh. 32As mychione jaghee yn chelloo, ny’n chioltane, jeh cre-erbee ta cheet fo’n 27:32 Currym y vochilley.lorg bee’n jeihoo casherick da’n Chiarn. 33Cha jean eh briaght, nee mie ny sie te, chamoo nee eh coonrey eh: as my nee eh coonrey eh ec traa erbee, eisht bee shen as y coonrey ny-neesht casherick; cha bee eh er n’eaysley. 34Shoh ny oardaghyn ren y Chiarn sarey da Moses, son cloan Israel, ayns slieau Sinai.