CAB. III

1As my vees e hoyrtys son oural-shee, my t’eh chebbal eh jeh’n chelloo, edyr eh ve fyrryn ny bwoirryn, nee eh y hebbal eh fegooish lheamys roish y Chiarn. 2As ver eh e laue er kione yn oural, as y varroo eh ec dorrys y chabbane-agglish, as nee mec Aaron ny saggyrtyn spreih yn uill er yn altar ooilley mygeayrt. 3As nee eh chebbal jeh’n toyrtys casherick dy oural-shee, oural jeant liorish aile gys y Chiarn; yn eeh ta coodaghey yn mynnagh, as ooilley yn eeh t’er y vynnagh. 4As yn daa aarey, as yn eeh t’orroo liorish ny shleaystyn, as y skairt erskyn yn aane marish ny aaraghyn; shen nee eh goaill ersooyl. 5As nee Aaron as e vec shen y lostey er altar yn oural-losht ta er y fuygh: ta shoh chebbal dy hoar millish jeant lesh aile gys y Chiarn.

6As my vees y chebbal echey jeh’n chioltane, fyrryn ny bwoirryn, son toyrtys casherick dy oural-shee gys y Chiarn, nee eh chebbal eh gyn lheamys. 7My hebbys eh eayn son yn oural echey, eisht nee eh chebbal eh roish y Chiarn. 8As ver eh e laue er kione yn oural echey, as y varroo eh kiongoyrt rish y chabbane-agglish: as nee mec Aaron yn uill echey y spreih mygeayrt er yn altar. 9As nee eh chebbal jeh toyrtys casherick yn oural-shee, oural jeant lesh aile gys y Chiarn; yn eeh echey, as yn slane curpin, shen nee eh ’ghoaill jeh rish y chraue drommey: as yn eeh ta coodaghey yn mynnagh, as ooilley’n muinney. 10As yn daa aarey, as yn eeh t’orroo, shen ta liorish ny bleanyn, as y skairt ta erskyn yn aane, lesh ny aaraghyn, shen nee eshyn y ghoaill ersooyl. 11As nee’n saggyrt shen y lostey er yn altar: ta shen bee yn oural jeant lesh aile gys y Chiarn.

12As my ta’n oural echey goayr, eisht nee eh chebbal eh kiongoyrt rish y Chiarn. 13As ver eh e laue er e chione, as y varroo eh kiongoyrt rish y chabbane-agglish: as nee mec Aaron spreih yn uill er yn altar ooilley mygeayrt. 14As jeh shen nee eh chebbal yn oural echey, eer oural jeant lesh aile gys y Chiarn; yn eeh ta coodaghey yn mynnagh, as ooilley’n eeh t’er y vynnagh. 15As yn daa aarey, as yn eeh t’orroo, shen ny ta liorish ny bleanyn, as y skairt erskyn yn aane, marish ny aaraghyn, shen nee eh y ghoaill ersooyl. 16As nee’n saggyrt lostey ad er yn altar: ta shoh bee yn oural ta jeant lesh aile, son soar millish. Ta ooilley’n eeh lesh y Chiarn. 17Bee shoh slattys kinjagh da nyn sheelogheyn trooid ooilley nyn gummallyn, nagh jean shiu gee yn eeh, ny’n uill (jeh baagh erbee.)