CAB. IV

1As loayr y Chiarn rish Moses, gra, 2Loayr rish cloan Israel, gra, My nee persoon erbee peccah trooid mee-hushtey noi veg jeh annaghyn y Chiarn (ayns reddyn nagh lhisagh ve jeant) as dy jean eh noi veg jeu: 3My nee’n ard-saggyrt ta ooilit jannoo peccah lurg peccaghyn y phobble: eisht lhig da cur lesh, er son y peccah shen t’eh er n’yannoo, dow aeg gyn lheamys gys y Chiarn, son oural-peccah. 4As ver eh lesh y dow gys dorrys y chabbane-agglish, fenish y Chiarn: as ver eh e laue er kione y dow, as nee eh marroo yn dow fenish y Chiarn. 5As nee’n saggyrt t’er ny ooilaghey goaill jeh fuill y dow, as ver eh lesh eh gys y chabbane-agglish. 6As nee’n saggyrt cur e vair ayns yn uill, as spreih jeh’n uill shiaght keayrtyn fenish y Chiarn, kiongoyrt rish coodagh yn ynnyd casherick. 7As ver y saggyrt paart jeh’n uill er eairkyn altar yn oural-millish, fenish y Chiarn, t’ayns y chabbane-agglish; as ooilley fuill y dow nee eh deayrtey rish grunt altar yn oural-losht, ta ec dorrys y chabbane-agglish. 8As nee eh goaill ooilley eeh yn dow son oural-peccah; yn eeh ta coodaghey yn mynnagh, as ooilley yn eeh t’er y vynnagh. 9As yn daa aarey, as yn eeh t’orroo, liorish ny shleaystyn, as y skairt erskyn yn aane, marish ny aaraghyn, shen nee eh goaill ersooyl. 10As shen myr ve er ny ghoaill ass dow yn oural-shee: as nee yn saggyrt ad y lostey er altar yn oural-losht. 11As sheh yn dow, as ooilley yn eill echey, marish e chione, as e chassyn, as e vynnagh, as e eoylley, 12Eer yn slane dow ver eh lesh magh cheu-mooie jeh’n champ, gys ynnyd glen, raad ta’n leoie deayrtit magh, as y lostey eh er y fuygh lesh aile: raad ta’n leoie deayrtit magh, vees eh er ny lostey.

13As my nee slane sheshaght Israel jannoo peccah trooid mee-hushtey, as y red er ny cheiltyn veih sooillyn y phobble, as t’ad er n’yannoo red ennagh noi veg jeh annaghyn y Chiarn, mychione reddyn nagh lhisagh ve jeant, as ad foiljagh; 14Tra ta’n peccah t’ad er n’yannoo n’oï, er ny hoilshaghey, eisht nee’n slane sheshaght chebbal dow son y peccah, as ver ad lhieu eh kiongoyrt rish y chabbane-agglish. 15As ver shanstyr yn pobble nyn laueyn er kione y dow fenish y Chiarn, as bee’n dow er ny varroo fenish y Chiarn. 16As ver y saggyrt t’er ny ooilaghey lesh jeh fuill y dow gys y chabbane-agglish. 17As nee’n saggyrt thummey e vair ayns paart jeh’n uill, as spreih shiaght keayrtyn fenish y Chiarn, eer kiongoyrt rish yn coodagh. 18As ver eh paart jeh’n uill er eairkyn yn altar, ta fenish y Chiarn, ’sy chabbane-agglish, as deayrtee eh ooilley yn uill rish grunt altar yn oural-losht, ta ec dorrys y chabbane-agglish. 19As nee eh goaill ass ooilley’n eeh, as lostey shen er yn altar. 20As nee eh rish y dow shoh, myr ren eh rish dow yn oural-peccah; shen myr nee eh rish; as nee’n saggyrt jannoo lhiasaghey er nyn son, as bee shen er ny leih daue. 21As ver eh lesh y dow magh cheu-mooie jeh’n champ, as lostey eh, myr ren eh lostey yn chied dow: te oural-peccah son y slane pobble.

22Tra ta fer-reill er n’yannoo peccah, trooid mee-hushtey, noi veg jeh annaghyn y Chiarn e Yee, ayns reddyn nagh lhisagh ve jeant, as eh ve oolee; 23Ny my hig y peccah t’eh er n’yannoo gys e hushtey; ver eh lesh e oural, mannan jeh ny goair, fyrrynagh gyn lheamys. 24As ver eh e laue er kione y ghoayr, as y varroo eh, raad t’ad marroo yn oural-losht, fenish y Chiarn: te oural-peccah. 25As nee’n saggyrt goaill jeh fuill yn oural-peccah er e vair, as coyrt eh er eairkyn altar yn oural-losht, as deayrtey magh yn uill echey rish grunt altar yn oural-losht. 26As nee eh lostey ooilley’n eeh echey er yn altar, myr eeh yn oural-casherick son shee: as nee’n saggyrt jannoo lhiasaghey er e hon, mychione shoh e pheccah, as bee eh er ny leih da.

27As my ta fer erbee jeh’n theay er duittym ayns peccah trooid marranys, liorish jannoo red erbee noi veg jeh annaghyn y Chiarn, ayns reddyn nagh lhisagh ve jeant; as eh ve oolee; 28Ny my hig e pheccah t’eh er n’yannoo gys e hushtey, eisht ver eh lesh yn oural echey, mannan jeh ny goair, bwoirrinagh fegooish lheamys, son e pheccah t’eh er n’yannoo. 29As ver eh e laue er kione yn oural-peccah, as y varroo eh ayns boayl yn oural-losht. 30As nee yn saggyrt goaill jeh’n uill er e vair, as coyrt eh er eairkyn altar yn oural-losht, as deayrtey magh ooilley yn uill echey rish grunt yn altar. 31As nee eh goaill ass ooilley’n eeh, myr ta’n eeh er ny scarrey veih’n oural-casherick son shee; as nee yn saggyrt shen y lostey er yn altar son soar millish gys y Chiarn: as nee yn saggyrt lhiasaghey ’yannoo er e hon; as bee eh er ny leih da. 32As my ver eh lesh eayn son oural-peccah, ver eh lesh bwoirrinagh fegooish lheamys. 33As ver eh e laue er kione yn oural-peccah, as shen y varroo son oural-peccah, raad varr ad yn oural-losht. 34As nee yn saggyrt goaill jeh fuill yn oural-peccah er e vair, as coyrt eh er eairkyn altar yn oural-losht, as deayrtey magh ooilley yn uill echey rish grunt yn altar. 35As nee eh goaill ersooyl ooilley’n eeh, myr ta eeh yn eayn er ny scarrey veih ny ourallyn-shee, as nee’n saggyrt ad y lostey er yn altar, myr ny ourallyn jeant lesh aile gys y Chiarn: as nee’n saggyrt jannoo lhiasaghey son e pheccah t’eh er n’yannoo, as bee eh er ny leih da.