CAB. V

1My ta persoon er n’yannoo peccah, as ayns gymmyrkey feanish er bree e loo, my t’eh er vakin, ny er chlashtyn jeh, mannagh vel eh dy hoilshaghey shen, nee eh gymmyrkey e pheccah. 2Ny my vennys persoon rish red erbee neu-ghlen, edyr eh ve corp baagh neu-ghlen, ny corp maase neu-ghlen, ny corp reddyn snauee neu-ghlen, as my te gyn-yss da; bee eshyn neesht neu-ghlen, as oolee. 3My t’eh bentyn rish neu-ghlennid dooinney; cre-erbee’n neu-ghlennid eh, ta jannoo dooinney neu-ghlen, as te gyn-yss da: tra yiow eh fys er, eisht bee eh foiljagh. 4Ny my ta persoon breearrey, fockley magh ass e veillyn dy yannoo olk, ny dy yannoo mie; cre-erbee shen nee dooinney fockley magh lesh breearrey, as my t’eh er yarrood eh, tra yiow eh fys er, eisht bee eh foiljagh ayns unnane jeu shoh. 5As tra t’eh foiljagh ayns veg jeh ny reddyn shoh, t’eh dy ghoaill rish, dy vel eh er n’yannoo peccah ’sy red cheddin. 6As ver eh lesh yn oural-loght echey gys y Chiarn, son e pheccah t’eh er n’yannoo, bwoirrinagh veih’n chioltane, eayn ny mannan jeh ny goair son oural-peccah; as nee’n saggyrt lhiasaghey ’yannoo son e pheccah. 7As mannagh vel fort echey dy chur lesh eayn, eisht ver eh lesh son e loght t’eh er n’yannoo daa chalmane-turtle, ny daa eean calmane gys y Chiarn, unnane son oural-peccah, as unnane, son oural-losht. 8As ver eh lesh ad gys y taggyrt, nee chebbal shen ta son oural-peccah hoshiaght, as cassey yn kione echey jeh e wannal, agh cha bee eh er ny rheynn veih-my-cheilley. 9As nee eh spreih jeh fuill yn oural-peccah rish lhiattee yn altar; as bee’n chooid elley jeh’n uill er ny hilley ass ec grunt yn altar: te ny oural-peccah. 10As nee eh chebbal yn nah er son oural-losht, cordail rish y chliaghtey: as nee’n saggyrt jannoo lhiasaghey son y peccah t’eh er n’yannoo, as bee eh er ny leih da. 11Agh mannagh bee fort echey dy chur lesh daa chalmane-turtle, ny daa eean calmane, eisht ver eshyn ta er n’yannoo peccah lesh yn jeihoo ayrn dy ephah dy flooyr meein, son oural-peccah; cha der eh veg yn ooil er, chamoo ver eh veg y frankincense er: son oural-peccah t’ayn. 12Eisht ver eh lesh eh gys y taggyrt, as nee’n saggyrt goaill lane e ghurn jeh, eer sample jeh, as shen y lostey er yn altar, myr ny ourallyn jeant lesh aile gys y Chiarn: oural-peccah t’ayn. 13As nee’n saggyrt jannoo lhiasaghey son e pheccah t’eh er n’yannoo, ayns veg jeu shoh, as bee eh er ny leih da: as bee’n chooid elley lesh y taggyrt, myr oural-arran.

14As loayr y Chiarn rish Moses, gra, 15My ta persoon erbee kyndagh jeh loght, as er n’yannoo peccah trooid mee-hushtey, ayns cooid casherick y Chiarn; eisht ver eh lesh son y loght echey gys y Chiarn, rea fegooish lheamys ass ny shioltaneyn, lurg y phrice ver oo er, ayns shekelyn argid, cordail rish y shekel-casherick, son oural-loght. 16As nee eh lhiasaghey son yn aggair t’eh er n’yannoo ayns y red casherick, as yn wheiggoo ayrn smoo y choyrt huggey, as ver eh da’n saggyrt eh; as nee yn saggyrt lhiasaghey ’yannoo er e hon, lesh y rea son oural-loght, as bee eh er ny leih da.

17As my ta persoon jannoo peccah ayns veg jeh ny reddyn shoh, ta er nyn lhiettal liorish annaghyn y Chiarn; ga dy nee ayns marranys ve, foast t’eh oolee, as nee eh gymmyrkey e pheccah. 18As ver eh lesh rea gyn lheamys ass y chioltane, lurg y phrice ver oo er, son oural-loght, gys y taggyrt; as nee yn saggyrt jannoo lhiasaghey er e hon ayns e vee-hushtey, hug eh er-shaghryn, as nagh row toiggal echey jeh; as bee eh er ny leih da. 19Te ny oural-loght: t’eh dy shickyr er yannoo peccah noi’n Chiarn.