CAB. VI

1Loayr y Chiarn rish Moses, gra, 2My ta persoon erbee jannoo peccah as loght noi’n Chiarn, as dy breagagh gobbal da e naboo shen ny va currit da, fo e churrym, ny ayns dellal, ny ayns nhee erbee t’er ny ghoaill ersooyl lesh tranlaase, ny ta er volley e naboo: 3Ny ta er gheddyn cooid chailjey, as lesh breg dy cheiltyn eh, as goaill loo oaiagh; jannoo peccah ayns veg jeh ooilley ny reddyn shoh: 4Eisht son dy vel eh er n’yannoo peccah, as dy vel eh oolee, nee eh chyndaa reesht shen ny ghow eh ersooyl lesh tranlaase, ny shen t’eh er gheddyn dy molteyragh ny shen va currit da dy hashtey, ny’n chooid chailjey t’eh er gheddyn, 5Ny ooilley shen, my-e-chione t’eh er loo dy oaiagh; shen hene nee eshyn dy slane chyndaa reesht, as yn wheiggoo ayrn smoo y chur huggey, as ver eh shen dasyn te cair, er laa’n oural-loght echey. 6As ver eh lesh yn oural-loght echey gys y Chiarn, rea gyn lheamys ass y chioltane, marish yn ooley, son oural-loght gys y taggyrt. 7As nee’n saggyrt lhiasaghey ’yannoo er e hon, fenish y Chiarn; as bee eh er ny leih da, son cre-erbee yn aggair t’eh er n’yannoo.

8As loayr y Chiarn rish Moses, gra, 9Oardee da Aaron as e vec, gra, Shoh leigh yn oural-losht: (she’n oural-losht eh, er-yn-oyr dy vel eh lostey er yn altar fud-ny-hoie gys y voghrey, as bee aile yn altar lostey er) 10As ver y saggyrt e gharmad aanrit mysh, as e vreechyn aanrit y choyrt er, as gowee eh ersooyl yn leoie ta’n aile er n’yannoo, lesh yn oural-losht er yn altar, as shen y choyrt rish lhiattee yn altar. 11As ver eh e gharmadyn jeh, as e gharmadyn elley y choyrt mysh, as ver eh lesh magh y leoie cheu-mooie jeh’n champ, gys boayl glen. 12As bee’n aile er yn altar lostey ayn; cha bee eh mooghit: as nee’n saggyrt lostey fuygh er shen dy chooilley voghrey, as kiartee eh yn oural-losht er, as nee eh eeh ny ourallyn-shee y lostey er. 13Bee’n aile kinjagh lostey er yn altar: cha bee eh dy bragh lhiggit ass.

14As shoh leigh yn oural-arran: Nee mec Aaron shen y hebbal fenish y Chiarn, roish yn altar. 15As nee eh goaill lane e ghurn jeh flooyr yn oural-arran, as jeh’n uill echey, as ooilley’n frankincense t’er yn oural-arran, as shen y lostey er yn altar, son cowrey dy hoar millish da’n Chiarn. 16As y chooid elley jeh shen nee Aaron as e vec gee: lesh arran gyn soorit vees shen er ny ee ’syn ynnyd casherick: ayns cooyrt y chabbane-agglish nee ad gee eh. 17Cha bee shen er ny aarlaghey lesh soorit: ta mish er choyrt shen daue son nyn ayrn jeh ny ourallyn aym’s jeant lesh aile; te smoo casherick, myr ta’n oural-peccah, as yn oural-loght. 18Nee ooilley ny fyrrynee mastey mec Aaron gee jeh: bee shoh slattys son dy bragh ayns nyn sheelogheyn mychione ourallyn y Chiarn jeant lesh aile: Bee dagh unnane vennys roo casherick.

19As loayr y Chiarn rish Moses, gra, 20Shoh oural Aaron as e vec, nee ad chebbal da’n Chiarn, er y laa vees eh er ny ooilaghey; yn jeihoo ayrn jeh ephah dy flooyr meein son oural-arran kinjagh, lieh jeh ’sy voghrey, as lieh jeh ec yn oie. 21Ayns pan vees eh jeant lesh ooil, as tra te aarlit, ver oo lhiat stiagh eh: as ny peeshyn aarlit jeh’n oural-arran nee oo chebbal son soar millish gys y Chiarn. 22As yn saggyrt jeh ny mec echeysyn, t’er ny ooilaghey ’syn ynnyd echey, nee shen y hebbal: Te slattys kinjagh gys y Chiarn, bee eh dy slane er ny lostey. 23Son bee dagh oural-arran gour y taggyrt dy slane er ny lostey: cha bee eh er ny ee.

24As loayr y Chiarn rish Moses, gra, 25Abbyr rish Aaron as rish e vec, gra, Shoh leigh yn oural-peccah: ’Syn ynnyd raad ta’n oural-losht er ny varroo, vees yn oural-peccah er ny varroo fenish y Chiarn: te ard casherick. 26Nee’n saggyrt ta chebbal shen son peccah, gee eh: ’syn ynnyd casherick vees eh er ny ee, ayns cooyrt y chabbane-agglish. 27Cre-erbee vennys rish yn eill echey, bee shen casherick: as tra ta veg jeh’n uill echey spreiht er garmad erbee, nee oo shen, ve spreiht er, y niee ’syn ynnyd casherick. 28Agh y saagh craie, ve broit ayn, bee shen er ny vrishey: as my vees y broit ayns pot prashey, bee shen chammah scoorit, as strullit ayns ushtey. 29Nee ooilley ny fyrrynee mastey ny saggyrtyn gee jeh: te ard casherick. 30As cha bee oural-peccah erbee, jeh ta veg jeh’n uill er ny choyrt lesh stiagh ’sy chabbane-agglish, dy yannoo lhiasaghey lesh ’syn ynnyd casherick, er ny ee: bee eh er ny lostey ayns yn aile.