CAB. VIII

1As loayr y Chiarn rish Moses, gra, 2Gow Aaron as e vec mârish, as ny garmadyn, as yn ooil casherick, as dow son oural-peccah, as daa rea, as baskad dy arran gyn soorit; 3As jean uss yn cheshaght y haglym cooidjagh, gys dorrys y chabbane-agglish. 4As ren Moses myr va’n Chiarn er n’oardaghey; as va’n cheshaght er nyn jaglym cooidjagh, gys dorrys y chabbane-agglish. 5As dooyrt Moses rish y pobble, Shoh’n red ta’n Chiarn er n’oardaghey dy ve jeant. 6As hug Moses lesh Aaron as e vec, as ren eh ad y niee lesh ushtey. 7As hug eh er yn cooat, as chiangle eh yn cryss mysh, as hug eh er yn coamrey purple, as hug eh yn ephod er, as chiangle eh mysh cryss aalin yn ephod, as chiartee eh er eh: 8As hug eh yn breast-plate er: myrgeddin hug eh er y phlate yn Urim as y Thummim. 9As hug eh yn mitre er e chione; myrgeddin er y mitre, kiart er glaare yn eddin echey hug eh yn plate airhey, yn crown casherick, myr doardee’n Chiarn da Moses. 10As ghow Moses yn ooil casherick, as ren eh ooilaghey yn chabbane, as ooilley ny v’ayn, as ad y chasherickey. 11As lesh ren eh spreih yn altar shiaght keayrtyn, as ooilaghey yn altar as ooilley ny siyn, chammah yn laver as e chass, dy chasherickey ad. 12As gheayrt eh jeh’n ooil casherick er kione Aaron, as ren eh eshyn y ooilaghey, dy chasherickey eh. 13As hug Moses lesh mec Aaron, as chur eh cooatyn orroo, as chiangle eh cryssyn moo, as chur eh bonnadyn orroo; myr doardee yn Chiarn da Moses. 14As hug eh lesh yn dow son yn oural-peccah: as chur Aaron as e vec nyn laueyn er kione y dow son oural-peccah. 15As varr eh eh, as ghow Moses yn uill, as hug eh shen er eairkyn yn altar ooilley mygeayrt, lesh e vair, as yn altar y ghlenney; as gheayrt eh yn uill rish grunt yn altar, as shen y chasherickey, er dy yannoo lhiasaghey. 16As ghow eh yn eeh v’er y vynnagh, as skairt erskyn yn aane, as y daa aarey, as yn eeh oc, as ren Moses shen y lostey er yn altar. 17Agh y dow as y cheh echey, yn eill as yn eoylley, ren eh lostey lesh aile cheu-mooie jeh’n champ: myr doardee yn Chiarn da Moses.

18As hug eh lesh y rea son oural-losht: as chur Aaron as e vec nyn laueyn er kione y rea. 19As varr eh eh, as spreih Moses yn uill er yn altar ooilley mygeayrt. 20As yiare eh yn rea ayns peeshyn, as ren Moses lostey yn kione, as ny peeshyn, as yn eeh. 21As ren eh niee yn mynnagh, as ny cassyn ayns ushtey; as ren Moses lostey yn slane rea er yn altar: va shoh slane oural-losht son soar millish gys y Chiarn; myr doardee yn Chiarn da Moses.

22As hug eh lesh y rea elley, yn rea son casherickey (ny saggyrtyn:) as hug Aaron as e vec nyn laueyn er kione y rea. 23As ren eh ’varroo eh, as ghow Moses yn uill echey, as shen y choyrt er baare cleaysh yesh Aaron, as er ordaag e laue yesh, as er ordaag vooar e chass yesh. 24As hug eh lesh mec Aaron, as hug Moses jeh’n uill er baare y chleaysh yesh oc, as er ordaagyn nyn laueyn yesh: as er ordaagyn mooarey nyn gassyn yesh: as ren Moses spreih yn uill er yn altar ooilley mygeayrt. 25As ghow eh yn eeh as y curpin, as ooilley yn eeh v’er y vynnagh, as y skairt erskyn yn aane, as yn daa aarey as yn eeh oc, as y clingan yesh. 26As ghow eh ass y vaskad arran gyn soorit, va roish y Chiarn, un cheeak gyn soorit, as keeak dy arran ooilit, as un wafer, as chur eh ad er yn eeh, as er y clingan yesh: 27As chur eh ad ooilley er laueyn Aaron, as er laueyn e vec, as heb eh ad son oural-criht noon as noal roish y Chiarn. 28As ren Moses ad y ghoaill jeh ny laueyn oc, as ad y lostey er yn altar, er yn oural-losht: v’ad shoh chebbit dy chasherickey (Aaron as e vec) son oural-millish: te oural jeant lesh aile gys y Chiarn. 29As ren Moses goaill y breast, as shen y hebbal son oural-criht noon as noal roish y Chiarn: son shen va ayrn Voses jeh’n rea son casherickey; myr doardee’n Chiarn da Moses. 30As ren Moses goaill jeh’n ooil casherick, as jeh’n uill v’er yn altar, as spreih eh er Aaron, as er e gharmadyn, as er e vec, as er garmadyn e vec mârish, as ren eh casherickey Aaron as ny garmadyn echey, as e vec, as garmadyn e vec mârish.

31As dooyrt Moses rish Aaron, as rish e vec, Broie-jee yn eill ec dorrys y chabbane-agglish: as ee-jee eh lesh arran y chasherickys t’ayns y vaskad, myr doardee mee, gra, Nee Aaron as e vec gee eh. 32As shen ny vees er-mayrn jeh’n eill as jeh’n arran, nee shiu y lostey lesh aile. 33As cha jed shiu magh er dorrys y chabbane-agglish son shiaght laa, derrey vees laghyn nyn gasherickys ec kione: rish shiaght laa nee eh shiuish y chasherickey. 34Myr t’eh er yannoo er y laa jiu, myr shen ta’n Chiarn er n’oardaghey dy ve jeant, dy yannoo lhiasaghey er nyn son. 35Shen-y-fa nee shiu tannaghtyn ec dorrys y chabbane-agglish laa as oie, shiaght laa, as freayll currym y Chiarn: son shoh myr ta mee er my oardaghey. 36Myr shen ren Aaron as e vec cooilleeney dy chooilley nhee, myr va’n Chiarn er n’oardaghey liorish laue Voses.