CAB. IX

1As haink eh gy-kione er y hoghtoo laa, dy deïe Moses er Aaron as e vec, as shanstyr Israel; 2As dooyrt eh rish Aaron, Gow uss lheiy aeg son oural-peccah, as rea son oural-losht, fegooish lheamys, as cheb ad roish y Chiarn. 3As rish cloan Israel nee oo loayrt, gra, Gow-jee shiuish mannan-goayr son oural-peccah, as lheiy, as eayn jeh’n chied vleïn, fegooish lheamys, son oural-losht; 4Dow as rea myrgeddin son oural-shee, dy hebbal kiongoyrt y Chiarn: as oural-arran lesh ooil ny chione: son jiu nee’n Chiarn eh hene y hoilshaghey diu.

5As hug ad lhieu shen doardee Moses kiongoyrt rish y chabbane-agglish: as ren ooilley yn chaglym tayrn er-gerrey, as shassoo fenish y Chiarn. 6As dooyrt Moses, Shoh’n red ta’n Chiarn er n’oardaghey diu dy yannoo: as bee gloyr y Chiarn er ny hoilshaghey diu. 7As dooyrt Moses rish Aaron, Immee gys yn altar, as cheb dty oural-peccah, as dty oural-losht, as jean lhiasaghey er dty hon hene, as son y pobble: as cheb oural y phobble, as jean lhiasaghey er nyn son; myr ta’n Chiarn er n’oardaghey.

8Hie Aaron er-y-fa shen gys yn altar, as varr eh yn lheiy son oural-peccah, er e hon hene. 9As hug mec Aaron lhieu yn uill huggey, as hum eh e vair ’syn uill, as hug eh shen er eairkyn yn altar, as gheayrt eh magh yn uill rish grunt yn altar. 10Agh yn eeh, as ny aaraghyn, as y skairt erskyn aane yn oural-peccah ren eh lostey er yn altar; myr doardee yn Chiarn da Moses. 11As yn eill as y cheh ren eh lostey lesh aile cheu-mooie jeh’n champ. 12As varr eh yn oural-losht; as hug mec Aaron lhieu yn uill huggey, ren eshyn y spreih ooilley mygeayrt er yn altar. 13As hug ad lhieu yn oural-losht huggey, marish ny peeshyn, as y kione: as ren eh lostey ad er yn altar. 14As ren eh niee yn mynnagh as ny cassyn, as ad y lostey er yn oural-losht er yn altar. 15As hug eh lesh oural y phobble, as ghow eh yn ghoayr, va son oural-peccah da’n pobble, as varr eh eh, as shen y hebbal son peccah, myr y chied (oural). 16As hug eh lesh yn oural-losht, as heb eh shen cordail rish yn oardagh. 17As hug eh lesh yn oural-arran, as ghow eh lane doayrn jeh, as shen y lostey er yn altar, cheu-mooie jeh oural-losht y voghrey. 18Ren eh myrgeddin y dow as yn rea y varroo, son oural-casherick shee, va shen son y pobble: as hug mec Aaron lhieu yn uill huggey, ren eh spreih er yn altar ooilley mygeayrt. 19As eeh yn dow, as y rea, ny curpin, as shen ta coodaghey yn mynnagh, as ny aaraghyn, as y skairt erskyn yn aane. 20As hug ad yn eeh er ny breastyn, as ren eh lostey yn eeh er yn altar. 21As ny breastyn, as y clingan yesh ren Aaron y hebbal son oural-criht noon as noal roish y Chiarn, myr doardee Moses. 22As hrog Aaron seose e laue lesh y pobble, as vannee eh ad; as haink eh sheese veih chebbal yn oural-peccah, as yn oural-losht, as ny ourallyn-shee. 23As hie Moses as Aaron stiagh ’sy chabbane-agglish, as haink ad magh, as vannee ad yn pobble: as va gloyr y Chiarn er ny hoilshaghey da ooilley’n pobble. 24As haink aile magh veih kionfenish y Chiarn, as losht eh er yn altar yn oural-losht, as yn eeh: as tra honnick y pobble shen, hrog ad seose nyn goraa, as huitt ad er nyn eddinyn.