CAB. I

1Son wheesh as dy vel ymmodee er ghoaill ayns laue dy chur coontey cairagh jeh ny reddyn ta dy firrinagh er nyn gredjal nyn mast’ ain. 2Eer myr hoilshee ad dooinyn ad, va er-dyn toshiaght nyn veanishyn sooilley as nyn shirveishee jeh’n ghoo. 3Ta mish myrgeddin er vakin eh mie, myr ta slane toiggal aym jeh dy chooilley nhee er-dyn eer toshiaght, dy scrieu hood’s ayns order, Theophilus smoo ooasle, 4Dy vod tushtey share y ve ayd jeh firrinys ny reddyn shen, t’ou er ny ve ynsit ayndoo.

5Rish lhing Herod ree Yudea, va saggyrt dy row enmyssit Zacharias, jeh coorse Abia; as va’n ven echey jeh inneenyn Aaron, as yn ennym eck Elizabeth. 6As v’ad ny-neesht cairagh kiongoyrt rish Jee, gimmeeaght ayns ooilley annaghyn as oardaghyn y Chiarn gyn loght. 7As cha row sluight oc, er-yn-oyr dy row Elizabeth gennish, as v’ad ny-neesht er roie dy mie ayns eash. 8As haink eh gy-kione, choud as v’eh cooilleeney oik y taggyrt kiongoyrt rish Jee, myr va e choorse er jeet magh, 9Cordail rish cliaghtey oik y taggyrt, dy haghyr eh dy ve yn currym echey dy lostey oural-millish, tra v’eh goll stiagh ayns chiamble y Chiarn. 10As va’n slane chaglym jeh’n pobble cheu-mooie ec padjer rish traa yn oural-millish. 11As haink ainle y Chiarn, as hass eh er cheu yesh altar yn oural-millish. 12As tra honnick Zacharias eh, v’eh seaghnit, as huitt aggle er. 13Agh dooyrt yn ainle rish, Ny gow aggle Zacharias: son ta dty phadjer er ny chlashtyn, as nee yn ven ayd Elizabeth mac y ymmyrkey dhyt, as nee oo genmys eh Ean. 14As bee boggey as gerjagh ayd, as nee ymmodee boggey y ghoaill tra hig eh er y theihll. 15Son bee eh ooasle ayns shilley yn Chiarn, as cha n’iu eh feeyn ny jough lajer, as bee eh er ny lhieeney lesh y Spyrryd Noo, veih eer breïn e vayrey. 16As ymmodee jeh cloan Israel nee eh y hyndaa gys y Chiarn y Jee oc. 17As hed eh roishyn ayns spyrryd as pooar Elias, dy hyndaa creeaghyn ny ayraghyn gys y chloan, as ny mee-viallee gys creenaght yn vooinjer chairal, dy yannoo aarloo pobble kiarit son y Chiarn. 18As dooyrt Zacharias rish yn ainle, Cre liorish vees fys aym’s er shoh? son ta mee shenn, as ta’n ven er roie dy mie ayns eash. 19As dreggyr yn ainle as dooyrt eh rish, Mish Gabriel ta shirveish fenish Yee: as ta mee er my choyrt dy loayrt rhyt, as dy hoilshaghey dhyt ny naightyn mie shoh. 20As cur-my-ner bee oo balloo, as cha jig dty ghlare lhiat, derrey yn laa vees ny reddyn shoh cooilleenit, er-y-fa nagh vel oo er chredjal my ghoan’s vees er nyn gooilleeney ayns nyn imbagh cooie. 21As va’n pobble fieau son Zacharias, as yindys orroo dy row eh cumrail choud ayns y chiamble. 22As tra haink eh magh, cha voddagh eh loayrt roo; as hoig ad dy row eh er vakin ashlish ayns y chiamble: son v’eh jannoo signyn daue, as hannee eh balloo. 23As shen myr ve, tra v’eh er chooilleeney laghyn e hirveish, dy jimmee eh gys e hie hene. 24As lurg ny laghyn shen ren e ven Elizabeth giennaghtyn, as dollee ee ee-hene queig meeghyn, gra, 25Shoh myr ta’n Chiarn er n’yannoo er my hon tra yeeagh eh orrym, dy ghoaill ersooyl my oltooan mastey deiney. 26As ayns y cheyoo vee, va’n ainle Gabriel er ny choyrt veih Jee, gys ard-valley dy Ghalilee, va enmyssit Nazareth, 27Gys moidyn nasht rish dooinney enmyssit Joseph, jeh thie Ghavid; as va ennym y voidyn Moirrey. 28As haink yn ainle stiagh as dooyrt eh r’ee, Dy vannee dhyt’s ta ayns ard-foayr, ta’n Chiarn mayrt; bannit t’ou uss mastey mraane. 29As tra honnick ee eh, v’ee seaghnit ec y raa echey, as smooinee ee r’ee hene cre’n monney dy vannaghey va shoh. 30As dooyrt yn ainle r’ee, Ny bee aggle ort, O Voirrey; son t’ou er gheddyn foayr veih Jee. 31As cur-my-ner, nee oo giennaghtyn, as mac y ymmyrkey, as enmyssee oo yn ennym echey Yeesey. 32Bee eshyn cronnal, as enmyssit Mac yn Er-syrjey; as ver y Chiarn Jee dasyn stoyl-reeoil e ayr David. 33As nee eh reill harrish thie Yacob gys earishyn foddey beayn, as er e reeriaght cha bee jerrey erbee. 34Eisht dooyrt Moirrey rish yn ainle, Kys oddys shoh y ve, fakin nagh nione dou dooinney? 35As dreggyr yn ainle as dooyrt eh r’ee, Hig yn Spyrryd Noo neose ort, as bee pooar yn Er-syrjey er ny skeayley harryd: shen-y-fa bee yn sluight chasherick shen ver oo son y theihll, enmyssit Mac Yee. 36As cur-my-ner, dty ven-vooinjerey Elizabeth, t’eeish myrgeddin er ghiennaghtyn mac ayns ny shenn laghyn eck: as shoh yn cheyoo vee jeeish va raït dy ve gennish. 37Son da Jee cha bee nhee erbee neu-phossible. 38As dooyrt Moirrey, Cur-my-ner sharvaant y Chiarn, dy jig eh lhiam cordail rish dty ghoo. As jimmee yn ainle vo-ee. 39As mysh ny laghyn shen hrog Moirrey urree lesh siyr dy gholl gys cheer ny liargagh, gys ard-valley dy Yudah, 40As hie ee stiagh ayns thie Zacharias as vannee ee da Elizabeth. 41As haink eh gy-kione, tra cheayll Elizabeth bannaghey Moirrey, dy lheim yn oikan ayns e breïn, as va Elizabeth lhieent lesh y Spyrryd Noo. 42As loayr ee lesh ard-choraa as dooyrt ee, Bannit t’ou uss mastey mraane, as bannit ta sluight dty vreïn. 43As kys ta’n [ooashley] aym, dy vel moir my Hiarn er jeet dy my yeeaghyn? 44Son cur-my-ner, cha leah as ren coraa dty vannaghey bingys ayns my chleayshyn, lheim yn oikan ayns my vreïn son boggey. 45As bannit t’eeish ta er chredjal: son bee slane cooilleeney ny reddyn shen v’er ny hoilshaghey jee liorish y Chiarn. 46As dooyrt Moirrey, Ta m’annym cur ard-voylley da’n Chiarn. 47As ta my spyrryd er ghoaill boggey ayns Jee my Haualtagh. 48Son t’eh er chur tastey da stayd injil e harvaant: son cur-my-ner, maghey shoh nee dy chooilley heeloghe mish y enmys bannit. 49Son s’mooar ta’n Ooilley-niartal er n’yannoo er my hon, as s’casherick ta e ennym. 50As ta e vyghin orroosyn ta goaill aggle roish, veih sheeloghe gys sheeloghe. 51T’eh er hoilshaghey niart lesh e roih; t’eh er skeayley ny moyrnee ayns mooaralys nyn greeaghyn. 52T’eh er lhieggal sheese ny treanee veih nyn stuill-reeoil, as er hoiaghey seose ny imlee. 53T’eh er lhieeney ny accryssee lesh reddyn mie, as ny berchee t’eh er chur follym ersooyl. 54T’eh er chooney lesh e harvaant Israel, ayns cooinaghtyn jeh e vyghin. 55(Myr loayr eh rish nyn shenn-ayryn, rish Abraham as e luight) er son dy bragh. 56As duirree Moirrey mâree mysh three meeghyn, as haink ee reesht gys e thie hene. 57Nish va slane traa Elizabeth er jeet, dy ve livreït; as hug ee mac son y theihll. 58As cheayll ny naboonyn as y sleih-mooinjerey eck, kys va’n Chiarn er hoilshaghey ard-vyghin jee; as ghow ad boggey mâree. 59As haink eh gy-kione er yn hoghtoo laa dy daink ad dy ghiarey-chymmylt yn lhiannoo; as denmys ad eh Zacharias, lurg ennym e ayrey. 60As dreggyr e voir, as dooyrt ee, Cha nee; agh bee eh enmyssit Ean. 61As dooyrt ad r’ee, Cha vel veg jeh dty chynney jeh’n ennym shen. 62As ren ad signyn gys e ayr, cre’n ennym baillishyn y ve er. 63As hir eh boayrd screeuee, as scrieu eh, gra, Ta’n ennym echey Ean. As ghow ad ooilley yindys. 64As er-y-chooyl va e veeal er ny osley, as e hengey er ny eaysley, as loayr eh, as hug eh moylley da Jee. 65As huitt aggle [arrymagh] er ooilley nyn naboonyn: as hie goo jeh ooilley ny reddyn shoh magh trooid ooilley cheer sleitagh Yudea. 66As adsyn ooilley cheayll shoh, hasht ad ayns nyn greeaghyn ad, gra, Cre’n monney dy ghooinney vees eh shoh? as va laue yn Chiarn mârish. 67As va’n ayr echey Zacharias lhieent lesh y Spyrryd Noo, as ren eh phadeyrys, gra, 68Bannit dy row yn Chiarn Jee Israel, son t’eh er yeeaghyn er, as er livrey e phobble, 69As t’eh er hroggal seose saualtys niartal er nyn son, ayns thie e harvaant David; 70Myr loayr eh liorish beeal e adeyryn crauee, t’er ny ve er-dy hoshiaght y theihll; 71Dy hauail shin veih nyn noidyn, as veih’n laue ocsyn ooilley ta dwoaie oc orrin. 72Dy chooilleeney yn vyghin va giallit da ny ayraghyn ain, as dy chooinaghtyn er e chonaant casherick: 73Eer yn breearrey ren eh gys yn ayr ain Abraham, 74Dy giallagh eh dooinyn, dy beagh shin er nyn livrey veih laueyn nyn noidyn, as shirveish eh fegooish aggle, 75Ayns craueeaght as cairys kiongoyrt rish, ooilley laghyn nyn mea. 76As bee uss lhiannoo enmyssit phadeyr yn Er-syrjey; son hed oo roish eddin y Chiarn, dy yannoo aarloo e raaidyn; 77Dy chur tushtey dy haualtys da e phobble, liorish leih nyn beccaghyn, 78Trooid myghin meiygh yn Jee ain; liorish ta irree ny greïney veih yn yrjid er hoilshean orrin, 79Dy chur soilshey dauesyn ta nyn soie ayns dorraghys as ayns scadoo yn vaaish, dy leeideil ny cassyn ain ayns raad y chee. 80As daase y lhiannoo, as v’eh er ny niartaghey ’sy spyrryd, as v’eh ayns ny faasaghyn, derrey’n laa v’eh er ny hoilshaghey da Israel.