CAB. XXII

1Nish va feailley yn arran-millish tayrn er-gerrey, ta enmyssit y Chaisht. 2As va ny ard-saggyrtyn as ny scrudeyryn shirrey kys oddagh ad eh y choyrt gy-baase; son v’ad ayns aggle roish y pobble.

3Eisht hie yn drogh-spyrryd stiagh ayns Yuaase va sliennooit Iscariot, va jeh earroo yn daa ostyl yeig. 4As hie eh roish, as loayr eh rish ny ard-saggyrtyn as ny captanyn mychione eh y vrah daue. 5As ghow adsyn boggey jeh, as ren ad conaant dy chur argid da. 6As hug eh gialdyn, as v’eh shirrey caa dy vrah eh tra nagh beagh y pobble mârish.

7Eisht haink laa yn arran-millish, tra va’n Eayn-caisht dy ve er ny varroo. 8As hug eh magh Peddyr as Ean, gra, Immee-jee, as aarlee-jee yn Eayn-caisht dy vod mayd gee. 9As dooyrt ad rish, C’raad sailt shin dy yannoo aarloo? 10As dooyrt eh roo, Cur-my-ner, tra vees shiu er gholl stiagh ayns yn ard-valley, hig dooinney nyn guail lesh saagh craie dy ushtey; eiyr-jee er gys y thie hed eh stiagh ayn. 11As abbyr-jee rish y fer-thie, Ta’n mainshter gra rhyt, Cre vel shamyr ny goaldee, raad nee’m yn Eayn-caisht y ee marish my ostyllyn? 12As jeeaghee eh diu ard-room mooar vees soit magh: ayns shen jean-jee aarloo. 13As hie ad as hooar ad myr v’eh er ghra roo: as daarlee ad yn Eayn-caisht. 14As tra va’n oor er jeet, hoie eh sheese as y daa ostyl yeig mârish. 15As dooyrt eh roo, Lesh yeearree jeean ta mee er ve aignagh yn Eayn-caisht shoh y ee mêriu roish my jean-ym surranse. 16Son ta mee gra riu, Nagh n’ee-ym maghey shoh jeh, derrey vees eh cooilleenit ayns reeriaght Yee. 17As ghow eh yn cappan, as hug eh booise, as dooyrt eh, Gow-jee shoh, as rheynn-jee eh ny mast’ eu hene. 18Son ta mee gra riu, Nagh n’iu-ym jeh mess y villey-feeyney, derrey hig reeriaght Yee. 19As ghow eh arran, as hug eh booise, as vrish eh eh, as hug eh eh daue, gra, Shoh my chorp t’er ny choyrt er nyn son eu: shoh jean-jee ayns cooinaghtyn jeem’s. 20As er yn aght cheddin yn cappan lurg shibber, gra, Yn cappan shoh yn conaant noa ayns my uill’s, t’er ny gheayrtey er ny son eu.

21Agh cur-my-ner, ta’n laue echeysyn ta dy my vrah, mârym er y voayrd. 22As dy firrinagh ta’n Mac dooinney goll myr ve kiarit: agh smerg da’n dooinney shen liorish t’eh er ny vrah. 23As ren ad toshiaght dy vriaght nyn mast’ oc hene, quoi jeu yinnagh shoh.

24Nish va streeu myrgeddin nyn mast’ oc, quoi jeu syrjey veagh coontit. 25As dooyrt eh roo, Ta reeaghyn ny Ashoonee gymmyrkey reill harrystoo: as t’adsyn t’ayns pooar nyn mastey, enmyssit deiney ooasle. 26Agh cha bee shiuish myr shen: agh quoi-erbee shinney ta nyn mast’ eu, lhig da ve myr y fer saa; as eshyn syrjey ta, myr y fer ta shirveish. 27Son quoi syrjey, eshyn ta ny hoie ec bee, ny’n fer ta shirveish? nagh nee eshyn ta ny hoie ec bee? agh ta mish nyn mast’ eu myr y fer ta shirveish. 28She shiuish t’er hannaghtyn mârym ayns my heaghyn. 29As ta mee pointeil diu reeriaght, myr ta my Ayr er phointeil dooys. 30Dy vod shiu gee as giu ec my voayrd ayns my reeriaght, as soie er stuill-reeoil, briwnys daa heeloghe yeig Israel.

31As dooyrt y Chiarn, Simon, Simon, cur-my-ner, ta Satan er yeearree shiuish y ghoaill, dy chreearey shiu myr curnaght: 32Agh ta mish er ghuee er dty hon’s, nagh jean dty chredjue failleil; as tra vees oo er jyndaa, niartee dty vraaraghyn. 33As dooyrt eh rish, Hiarn, ta mish aarloo dy gholl mayrt chammah gys pryssoon, as gys baase. 34As dooyrt eh, Ta mee ginsh dhyt, Pheddyr, roish gerrym y chellee jiu dy jean uss gobbal three keayrtyn dy nhione dhyt mee. 35As dooyrt eh roo, Tra hug mee shiu magh fegooish sporran, as spagey, as braagyn, row nhee erbee dy laccal erriu? As dooyrt ad, Cha row nhee erbee. 36Eisht dooyrt eh roo, Agh nish eshyn ta sporran echey, lhig da y ghoaill eh, as myrgeddin e spagey: as eshyn nagh vel cliwe echey, lhig da creck e gharmad, as cliwe y chionnaghey. 37Son ta mee gra riu, Dy nhegin da shoh ny ta scruit, ve foast cooilleenit aynym’s, As v’eh er ny earroo marish ny drogh-yantee: son ta jerrey er ny reddyn ta my-mychione’s. 38As dooyrt ad, Hiarn, cur-my-ner ta daa chliwe ayns shoh. As dooyrt eh roo, Te dy liooar.

39As haink eh magh, as hie eh myr v’eh cliaghtey, gys cronk ny Oliveyn; as deiyr ny ostyllyn myrgeddin er. 40As tra v’eh ec yn ynnyd, dooyrt eh roo, Gow-jee padjer, nagh duitt shiu ayns miolagh. 41As hie eh voue, mysh choud as hilgagh fer clagh, as huitt eh er e ghlioonyn, as ghow eh padjer, 42Gra, Ayr, my she dty aigney eh, scugh yn cappan shoh voym: ny-yeih cha nee my aigney’s, agh dt’aigney’s dy row jeant. 43As haink huggey ainle veih niau, dy niartaghey eh, 44As v’eh ayns angaish vooar, as ghow eh padjer ny s’jeeaney: as va’n ollish echey myr bineyn mooarey folley tuittym gys y thalloo. 45As tra v’eh er n’irree veih padjer, as er jeet gys e ostyllyn, hooar eh ad nyn gadley lesh trimshey, 46As dooyrt eh roo, Cre’n-fa ta shiu cadley? irree-jee as gow-jee padjer, nagh duitt shiu ayns miolagh.

47As choud as v’eh foast loayrt, cur-my-ner, haink sheshaght vooar, as eshyn va enmyssit Yuaase, fer jeh’n daa ostyl yeig, nyn leeideilagh, as hayrn eh er-gerrey da Yeesey dy chur paag da. 48Agh dooyrt Yeesey rish, Yuaase, vel oo brah Mac y dooinney lesh paag? 49Tra honnick adsyn va mygeayrt-y-mysh cre va ry-heet, dooyrt ad rish, Hiarn, bwoaill mayd lesh y chliwe?

50As woaill fer jeu fer-mooinjerey yn ard-saggyrt, as ghiare eh yn chleaysh yesh jeh. 51As dreggyr Yeesey, as dooyrt eh, S’lioar shoh hene. As venn eh rish e chleaysh, as laanee eh eh. 52Eisht dooyrt Yeesey rish ny ard-saggyrtyn as captanyn y chiamble, as y chanstyr v’er jeet magh huggey, Vel shiu er jeet magh, myr noi maarliagh, lesh cliwenyn as luirg? 53Tra va mee mêriu gagh laa ayns y chiamble, cha heeyn shiu magh laue m’oï: agh shoh yn oor eu, as pooar y dorraghys.

54Eisht ghow ad eh, as leeid ad ersooyl eh, as hug ad lhieu eh gys thie yn ard-saggyrt. As deiyr Peddyr er foddey ny yeï. 55As tra v’ad er voaddey aile ayns mean ny halley, as er hoie sheese cooidjagh, hoie Peddyr sheese ny mast’ oc. 56Agh hug ben-aeg dy row tastey da, myr v’eh ny hoie ec yn aile, as yeeagh ee dy gyere er, as dooyrt ee, V’eh shoh myrgeddin mârish. 57As dob eh, gra, Ven, cha vel enney aym er. 58As tammylt ny lurg shen, honnick fer elley eh, as dooyrt eh, She fer jeu myrgeddin uss. As dooyrt Peddyr, Ghooinney, cha nee. 59As mysh oor ny lurg shen, hass fer elley er dy creoi, gra, Ayns firrinys v’eh shoh myrgeddin mârish; son she Galilean eh. 60As dooyrt Peddyr, Ghooinney, cha s’aym cre t’ou dy ghra. As chelleeragh, choud as v’eh foast loayrt, gherr y kellagh. 61As hyndaa yn Chiarn, as yeeagh eh er Peddyr; as chooinee Peddyr er yn ockle va’n Chiarn er ghra rish, Roish gerrym y chellee, nee uss mish y obbal three keayrtyn. 62As hie Peddyr magh, as cheayn eh dy sharroo.

63As ren ny deiney v’er ghoaill Yeesey gannidys er, as y woalley eh. 64As tra v’ad er choodaghey ny sooillyn echey, woaill ad eh er yn eddin, as dênee ad jeh, gra, Jean phadeyrys, quoi ta dy dty woalley? 65As ymmodee reddyn elley loayr ad dy mollaghtagh n’oï.

66As cha leah as va’n laa rish, haink shanstyr yn phobble, as ny ard-saggyrtyn as ny scrudeyryn cooidjagh, as hug ad lhieu eh gys y choonceil oc, 67Gra, Nee oo yn Creest? insh dooin. As dooyrt eh roo, My insh-ym diu, cha jean shiu credjal. 68As my neem’s myrgeddin shiuish y qhuestional, cha jean shiu my reggyrt, ny lhiggey yn raad dou. 69Ny lurg shoh nee Mac y dooinney soie er laue yesh pooar Yee. 70Eisht dooyrt ad ooilley, Nee oo eisht Mac Yee? As dooyrt eh roo, Ta shiuish gra ny ta mee. 71As dooyrt ad, Cre’n feme sodjey t’ain er feanishyn? son ta shin hene er chlashtyn veih’n veeal echey hene.