CAB. III

1Cur-my-ner, ver-yms magh my haghter, as kiartee eh yn raad roym: as hig y Chiarn, ta shiu jeeaghyn er e hon, dy gerrit gys e hiamble; eer chaghter y chonaant, ayn ta shiuish goaill taitnys: Cur-my-ner nee eh cheet, ta Chiarn ny flaunyssee dy ghra. 2Agh quoi oddys gymmyrkey laa yn cheet echey? as quoi nee shassoo, tra hig eshyn kionfenish? son t’eh goll-rish yn aile echeysyn ta lheïe meayn, as myr sheeabyn y ghialleyder. 3As nee eh soie goll-rishyn ta glenney as scarrey argid veih’n dross: as nee eh mec Levi y chasherickey, as ad y ghlenney myr airh as argid, dy vod ad oural gys y Chiarn y hebbal ayns ynrickys. 4Shen y traa vees oural Yudah as Yerusalem eunyssagh gys y Chiarn, myr ayns y chenn earish, as myr ayns ny bleeantyn foddey er-dy-henney. 5As hig-yms chion erriu gys briwnys; as beem’s my eanish gyere noi ny fir-obbee, as noi ocsyn ta brishey poosey, as noi ny looderyn-oaiagh, as noi ocsyn ta chionney er y labree ayns e aill, as jannoo tranlaase er y ven-treoghe, as er y chloan gyn ayr, as ta lhiettal veih’n joarree e chair, as nagh vel goaill aggle roym’s, ta Chiarn ny flaunyssee dy ghra. 6Son mish yn Chiarn; cha vel mee caghlaa: shen-y-fa cha vel shiuish mec Yacob er nyn stroie.

7Veih eer laghyn ny ayraghyn eu, ta shiu er n’gholl er-shaghryn veih my lattyssyn, as cha vel shiu er reayll ad: chyndaa-jee hym’s, as chyndaa-yms hiuish, ta Chiarn ny flaunyssee dy ghra: agh dooyrt shiu, Kys nee mayd chyndaa?

8Jean dooinney maarlys er Jee? foast ta shiuish er n’yannoo maarlys orrym’s; agh ta shiu gra, Cre ayn ta shin er n’yannoo maarlys ort? Ayns jagheenyn as ourallyn. 9Ta shiu fo mollaght trome: son ta shiu er n’yannoo maarlys orrym’s, eer yn slane ashoon shoh. 10Cur-jee lhieu ooilley ny jagheenyn gys y thie-tashtee, dy vod beaghey ’ve ayns my hie’s, as prow-jee mee nish lesh shoh, ta Chiarn ny flaunyssee dy ghra, mannagh voshil-yms diuish uinniagyn yn aer, as deayrtey magh bannaght, nagh bee room dy liooar dy ghoaill stiagh eh. 11As nee’m yn stroider y chastey er y ghraih euish, nagh jean eh stroie messyn y thallooin: chamoo nee yn billey-feeyney tilgey yn mess eck ayns y vagher roish e traa, ta Chiarn ny flaunyssee dy ghra. 12As nee dy chooilley ashoon genmys shiuish bannit: son bee shiu cheer eunyssagh, ta Chiarn ny flaunyssee dy ghra.

13Ta ny goan eu er ve barbagh m’oï, ta’n Chiarn dy ghra: foast ta shiu gra, Cre ta shin er loayrt wheesh shen dt’oï? 14Ta shiu er ghra, She fardail eh, dy hirveish Jee: as cre’n cosney te dooin, dy vel shin er reayll e lattyssyn, as dy vel shin er n’immeeaght dy trimshagh kiongoyrt rish Chiarn ny flaunyssee? 15As nish ta shin genmys ny mooaralee maynrey: dy jarroo ta adsyn, ta cur rish drogh-yannoo, er ny hoiaghey seose, dy jarroo ta adsyn, ta brasnaghey Jee, er ny livrey.

16Eisht loayr adsyn, va goaill aggle roish y Chiarn, dy mennick ry-cheilley, as deaisht y Chiarn, as cheayll eh, as va lioar imraa scruit kiongoyrt rish, er y hon ocsyn va goaill aggle roish y Chiarn, as va gimraa er e ennym. 17As bee ad lhiam’s, ta’n Chiarn, Jee ny flaunyssee, dy ghra, er y laa ta mee jannoo seose my chooid chostal, as beem’s erreeishagh daue, myr ta dooinney erreeishagh da e vac, ta shirveish eh. 18Eisht nee shiu chyndaa, as ver shiu lhiettrimmys eddyr y dooinney cairal, as mee-chairal; eddyr eshyn ta shirveish Jee, as eshyn nagh vel shirveish eh.