CAB. XII

1As ren eh toshiaght dy loayrt roo liorish coraaghyn-dorraghey. Va dooinney dy row ren garey-feeyney y hoiaghey, as ren eh cleigh mygeayrt-y-mysh, as chleiy eh ynnyd son y press-feeyney, as hrog eh toor, as hoie eh eh rish eirinnee, as hie eh gys cheer foddey. 2As ec yn imbagh cooie hug eh sharvaant gys ny eirinnee, dy gheddyn veih ny eirinnee jeh mess y gharey-feeyney. 3As ghow ad as woaill ad eh, as hug ad eh ersooyl follym. 4As reesht hug eh huc sharvaant elley; as ersyn cheau ad claghyn, as vrish ad y kione er, as hug ad eh ersooyl lesh dellal feer scammyltagh. 5As reesht hug eh huc sharvaant elley; as eshyn ren ad y varroo: as ymmodee elley, bwoalley paart, as marroo paart. 6As va echey foast un vac, er v’eh feer ghraihagh, as hug eh eshyn myrgeddin ec y jerrey huc, gra, Ver ad arrym da my vac. 7Agh dooyrt ny eirinnee shen ny mast’ oc hene, Shoh’n eirey: tar-jee as lhig dooin eh y varroo, as bee yn eiraght lhien hene. 8As ghow ad, as varr ad eh, as hilg ad eh magh ass y gharey-feeyney. 9Cre nee Chiarn y gharey-feeyney er-y-fa shen y yannoo? hig eh as stroie-ee eh ny eirinnee, as ver eh yn garey-feeyney da eirinnee elley. 10Nagh vel shiuish er lhaih ayns goo Yee? Ta’n chlagh ren ny masoonee y vee-lowal, er jeet dy ve yn ard chlagh-chorneilagh. 11Shoh va jannoo yn Chiarn, as te yindyssagh ayns ny sooillyn ainyn. 12As v’ad shêgin er goaill eh, agh v’ad ayns aggle roish y pobble; son va fys oc dy row eh er loayrt yn coraa-dorraghey noi ad-hene: as daag ad eh, as hie ad rhymboo.

13As hug ad huggey shiartanse jeh ny Phariseeyn, as ny Herodianee, dy ghoaill vondeish jeh ayns e ghoan. 14As tra v’ad er jeet, dooyrt ad rish, Vainshter, ta fys ain dy vel oo firrinagh, as nagh vel oo ayns imnea roish dooinney erbee; son cha vel oo soiaghey jeh persoon deiney, agh gynsaghey raad Yee ayns firrinys: vel eh lowal keesh y choyrt da Cesar, mannagh vel? 15Jean mayd coyrt, ny dyn coyrt? Agh va fys echeysyn er y chialgeyrys oc, as dooyrt eh roo, Cre’n-fa ta shiu shirrey dy my ghoaill ayns ribbey? cur-jee lhieu ping hym, dy vaik-ym eh. 16As hug ad lhieu eh: as dooyrt eh roo, Quoi gys ta’n cowrey as y screeu shoh bentyn? As dooyrt adsyn rish, Gys Cesar. 17As dreggyr Yeesey, as dooyrt eh roo, Eeck-jee da Cesar, shen ny ta lesh Cesar, as da Jee, ny reddyn ta lesh Jee. As ghow ad yindys jeh.

18Eisht haink huggey ny Sadduceeyn, ta gra nagh vel irree-seose-reesht dy ve ayn; as dênee ad jeh, gra, 19Vainshter, ta Moses er scrieu dooin, My ta braar dooinney geddyn baase, as faagail e ven ny yeï, gyn cloan echey r’ee, dy vel e vraar dy phoosey yn ven echey, as dy hroggal seose sluight da e vraar. 20Nish va shiaght braaraghyn: as ghow yn braar shinney ben, agh geddyn baase cha daag eh sluight. 21As ghow yn nah vraar ee, as hooar eh baase, as cha daag eh sluight: as y trass myrgeddin. 22As v’ee ec y chiaght, as cha daag ad sluight: er-jerrey ooilley hooar y ven baase myrgeddin. 23Shen-y-fa ec yn irree-seose-reesht veih ny merriu, tra nee ad girree, quoi jeu vees ee echey son ben? son v’ee ny ben da’n chiaght. 24As dreggyr Yeesey as dooyrt eh roo, Nagh vel shiu er-y-fa shen fo marranys, er-yn-oyr nagh vel toiggal eu jeh goo ny jeh pooar Yee? 25Son ec yn irree-seose-reesht veih ny merriu, cha vel ad poosey, ny er nyn goyrt ayns poosey: agh t’ad myr ny ainleyn t’ayns niau. 26As mychione ny merriu, dy n’irree ad; nagh vel shiu er lhaih ayns lioar Voses, kys loayr Jee rish ass y thammag, gra, Mish Jee Abraham, as Jee Isaac, as Jee Yacob? 27Cha nee Jee ny merriu eh, agh Jee ny bioee: ta shiu er-y-fa shen fo marranys vooar.

28As haink fer jeh ny scrudeyryn cheayll ad resooney cooidjagh, as cur tastey dy row eh er n’ansoor ad dy mie, dênee eh jeh, Cre’n ard-anney jeh ny annaghyn ooilley? 29As dreggyr Yeesey eh, Yn chied anney jeh ooilley ny annaghyn, Clasht, O Israel, Ta’n Chiarn yn Jee ain yn ynrycan Chiarn; 30As ver oo graih da’n Chiarn dty Yee lesh ooilley dty chree, as lesh ooilley dty annym, as lesh ooilley dty aigney, as lesh ooilley dty niart: shoh’n chied anney. 31As ta’n nah anney casley rish, ta shen dy ghra, Ver oo graih da dty naboo, myr dhyt hene: cha vel anney erbee elley smoo na ad shoh. 32As dooyrt y scrudeyr rish, S’mie shen, Vainshter, t’ou er loayrt yn irriney: son ta un Jee ayn, as cha vel Jee erbee elley agh eh-hene. 33As dy ve graihagh er lesh ooilley yn chree, as lesh ooilley yn tushtey, as lesh ooilley yn annym, as lesh ooilley yn niart, as dy ve graihagh er e naboo myr er hene, ta shen ny smoo na ooilley ny slane chebballyn-losht as ourallyn. 34As tra honnick Yeesey dy dansoor eh dy tushtagh, dooyrt eh rish, Cha vel oo foddey veih reeriaght Yee. As cha by-lhoys da dooinney erbee maghey shen question erbee sodjey y chur huggey.

35As dreggyr Yeesey myr v’eh gynsaghey ayns y chiamble, as dooyrt eh, Kys ta ny scrudeyryn gra dy nee Creest mac Ghavid? 36Son ta David eh-hene er ghra liorish y Spyrryd Noo, Dooyrt y Chiarn rish my Hiarn’s, Soie uss er my laue yesh, derrey ver-ym dty noidyn son stoyl dty choshey. 37Ta David er-y-fa shen eh-hene genmys eh ny Hiarn; as kys t’eh eisht yn mac echey? As deaisht yn pobble v’er nyn jaglym cooidjagh rish dy arryltagh.

38As dooyrt eh roo, myr v’eh gynsagh, Bee-jee er nyn dwoaie jeh ny scrudeyryn ta geearree shooyl ayns coamraghyn liauyrey, as sleih dy vannaghey daue ayns ny margaghyn, 39As ny ard-stuill y ve oc ayns ny synagogueyn, as ny ard ynnydyn-soie ec cuirraghyn: 40T’ad cur mow thieyn mraane-treoghe, as son scaa dy chraueeaght lhiggey orroo dy ve mennick ec padjer: ta briwnys s’trimmey ny chour oc shoh.

41As myr va Yeesey ny hoie liorish kishtey yn stoyr, ghow eh tastey kys va’n pobble cur argid ayns y stoyr: as ren ymmodee va berchagh cur ayn dy palchey. 42As haink ben voght treoghe dy row, as hilg ee ayn daa vite ta jannoo farling. 43As deïe eh er e ostyllyn huggey, as dooyrt eh roo, Dy firrinagh ta mee gra riu, dy vel y ven-treoghe voght shoh er chur ny smoo ayns kishtey yn stoyr, na dy chooilley unnane t’er choyrt ayn. 44Son t’adsyn ooilley er chur ayn ass nyn balchey: as t’eeish myr s’boght ee, er choyrt ayn ooilley ny v’eck, dy jarroo ooilley e cooid-seihlt.