CAB. XIV

1Lurg daa laa va feailley ny Caisht as yn arran gyn soorid: as va ny ard-saggyrtyn as ny scrudeyryn shêgin er goaill eh dy follit, as dy choyrt eh gy-baase. 2Agh dooyrt ad, Cha nee er laa ny feailley, er-aggle dy bee irree-magh ayn mastey’n pobble.

3As myr v’eh ny hoie ec bee, ayns Bethany, ayns thie Simon yn lourane, haink ben as box alabaster dy ooil eck, jeh spikenard, feer chostal; as doshil ee yn box, as gheayrt ee eh er y chione echey. 4As va paart va mooaraghey shoh ayns nyn greeaghyn, gra, Cre’n-fa va’n jummal shoh jeant er yn ooil? 5Son oddagh eh v’er ny ve creckit son ny smoo na three cheead ping, as shen baarit er ny boghtyn. As v’ad jymmoosagh r’ee. 6As dooyrt Yeesey, Faag-jee veue ee, cre’n eïe t’eu urree? t’ee er n’yannoo obbyr vie orrym’s. 7Son ta ny boghtyn eu kinjagh mêriu, as tra erbee dy nailliu, foddee shiu ve mie roo: agh mish cha vel eu dy kinjagh. 8T’ee er n’yannoo gys rere e pooar; t’ee er jeet ro-laue dy ooilaghey my chorp cour my oanluckey. 9Dy firrinagh ta mee gra riu, Cre theihll yn raad bee yn sushtal shoh er ny phreacheil, dy bee shoh t’eeish er n’yannoo, er ny imraa ayns cooinaghtyn jeeish.

10As hie Yuaase Iscariot, fer jeh’n daa ostyl yeig, gys ny ard-saggyrtyn, dy vrah eh huc. 11As tra cheayll ad shoh, ghow ad boggey jeh, as ghiall ad argid da. As v’eh fieau er caa dy vrah eh.

12As er yn chied laa jeh’n arran caisht, tra v’ad marroo yn Eayn-caisht, dooyrt e ostyllyn rish, Cre’n raad sailt shin dy gholl, as dy yannoo aarloo dhyt’s, dy ee yn Eayn-caisht? 13As hug eh magh jees jeh e ostyllyn, as dooyrt eh roo, Immee-jee gys yn ard-valley, as hig nyn guail dooinney cur lesh saagh craie dy ushtey: eiyr-jee ersyn. 14As raad erbee dy jed eh stiagh, abbyr-jee rish y fer-thie, Ta’n Mainshter gra, Cre vel shamyr ny goaldee, raad nee’m yn Eayn-caisht y ee marish my ostyllyn? 15As jeeaghee eh diu ard-shamyr mooar soit magh as jeant aarloo: ayns shen aarlee-jee er nyn son. 16As jimmee ny ostyllyn rhymboo, as tra v’ad er jeet gys yn ard-valley, hooar ad myr v’eh er ghra roo: as daarlee ad yn Eayn-caisht. 17As ec yn astyr haink eh marish yn daa ostyl yeig. 18As myr v’ad nyn soie ec bee, dooyrt Yeesey, Dy firrinagh ta mee gra riu, Dy jean fer jiuish ta gee mârym mish y vrah. 19As ren ad toshiaght dy ve trimshagh, as dy ghra rish, fer lurg fer, Nee mish eh? as dooyrt fer elley, Nee orrym’s t’ou cheet? 20As dreggyr eh, as dooyrt eh roo, She fer jeh’n daa ostyl yeig eh, ta cur e laue mârym ayns y chlaare. 21Ta Mac y dooinney dy jarroo goll myr te scruit jeh: agh smerg da’n dooinney shen, liorish ta Mac y dooinney er ny vrah; s’mie veagh eh er ve son y dooinney shen nagh beagh eh rieau er jeet er y theihll.

22As myr v’ad gee, ghow Yeesey arran, as vannee eh, as vrish eh eh, as hug eh eh daue, gra, Gow-jee, ee-jee, shoh my chorp. 23As ghow eh yn cappan, as tra v’eh er chur booise, hug eh eh daue: as diu ad ooilley jeh. 24As dooyrt eh roo, Shoh my uill’s jeh’n conaant noa, t’er ny gheayrtey son ymmodee. 25Dy firrinagh ta mee gra riu, Nagh n’iu-ym arragh jeh mess y villey-feeyney, derrey’n laa iu-ym eh ass-y-noa ayns reeriaght Yee.

26As tra v’ad er ghoaill arrane-moyllee, hie ad magh gys cronk ny Oliveyn. 27As dooyrt Yeesey roo, Faillee yn credjue euish ooilley noght kyndagh rhym’s: son te scruit, Bwoaill-yms yn bochilley, as bee ny kirree er nyn skeayley. 28Agh erreish dou v’er n’irree reesht, hem reue gys Galilee. 29Agh dooyrt Peddyr rish, Ga dy vaill credjue dy chooilley unnane, foast cha vaill my chredjue’s. 30As dooyrt Yeesey rish, Dy firrinagh ta mee gra rhyt, Yn laa jiu, eer yn oie noght roish my gerr y kellagh daa cheayrt, dy n’obb uss mish three keayrtyn. 31Agh loayr eshyn ny s’jeeaney, Dy beign dy gholl gy-baase mayrt, cha n’obbin oo er coontey erbee. As er yn aght cheddin loayr ad ooilley. 32As haink ad gys ynnyd va enmyssit Gethsemane: as dooyrt eh rish e ostyllyn, Soie-jee shiuish ayns shoh, choud as hem’s gys padjer. 33As ghow eh mârish Peddyr as Jamys as Ean, as ren eh toshiaght dy ve mooar-seaghnit as trome-chreeagh, 34As dooyrt eh roo, Ta my annym feer trimshagh eer gys y baase: fuirree-jee ayns shoh, as freill-jee arrey. 35As hie eh red beg er e hoshiaght, as huitt eh er y thalloo, as ghow eh padjer, my oddys eh ve yn oor shen dy gholl shaghey. 36As dooyrt eh, Abba, Ayr, ta dy chooilley nhee ayns dty phooar, gow ersooyl yn cappan shoh voym: ny-yeih cha nee my aigney’s, agh dty aigney’s dy row jeant. 37As haink eh as hooar eh ad nyn gadley, as dooyrt eh rish Peddyr, Simon, vel uss dty chadley? nagh voddagh oo arrey y reayll mârym un oor? 38Bee-jee er nyn arrey, as gow-jee padjer, nagh duitt shiu ayns miolagh: ta’n spyrryd eu dy jarroo arryltagh, agh ta’n eill annoon. 39As hie eh roish reesht, as ghow eh padjer, as loayr eh ny goan cheddin. 40As tra haink eh reesht, hooar eh ad nyn gadley reesht, (son va ny sooillyn oc trome) as cha row fys oc cre’n ansoor dy chur da. 41As haink eh yn trass cheayrt, as dooyrt eh roo, Caddil-jee nish, as gow-jee nyn vea: s’lioar eh, ta’n oor er jeet; cur-my-ner ta Mac y dooinney er ny vrah gys laueyn peccee. 42Trog-jee erriu, lhig dooin goll: cur-my-ner, ta eshyn er-gerrey dooin ta dy my vrah.

43As chelleeragh choud as v’eh foast loayrt, haink Yuaase, fer jeh’n daa ostyl yeig, as mârish va sheshaght vooar lesh cliwenyn as luirg, veih ny ard-saggyrtyn, as ny scrudeyryn, as y chanstyr. 44As hug eshyn v’er vrah eh cowrey daue, gra, Quoi-erbee ver-yms paag da, shen eh; gow-jee eh, as leeid-jee eh ersooyl dy sauchey. 45As cha leah as v’eh er jeet, hie eh chelleeragh huggey, as dooyrt eh, Vainshter, vainshter; as phaag eh eh.

46As hug ad nyn laueyn er, as ghow ad eh. 47As hayrn fer jeusyn va nyn shassoo mârish cliwe, as woaill eh fer-mooinjerey yn ard-saggyrt, as ghiare eh e chleaysh jeh. 48As dreggyr Yeesey, as dooyrt eh roo, Vel shiu er jeet magh myr noi maarliagh, lesh cliwenyn as luirg dy my ghoaill? 49Va mee mêriu gagh laa ayns y chiamble, gynsaghey, as cha ghow shiu mee: agh shegin da ny scriptyryn v’er nyn gooilleeney. 50As ren ny ostyllyn ooilley treigeil eh as cosney roue. 51As deiyr er dooinney aeg dy row, nagh row monney agh brilleen mysh e chorp; as haare ny deiney aegey greme er. 52As daag eh yn vrilleen, as chossyn eh voue rooisht.

53As hug ad lhieu Yeesey ersooyl gys yn ard-saggyrt: as mârishyn v’er nyn jaglym cooidjagh ooilley ny ard-saggyrtyn as y chanstyr, as ny scrudeyryn. 54As deiyr Peddyr er foddey ny yeï, gys eer plaase yn ard-saggyrt: as hoie eh marish yn vooinjer, as hiow eh eh-hene ec yn aile. 55As va ny ard-saggyrtyn as ooilley’n choonceil shirrey feanishyn noi Yeesey dy chur eh gy-baase; as cha dooar ad veg. 56Son dymmyrk ymmodee feanish foalsey n’oï, agh cha row yn eanish oc coardail ry-cheilley. 57As dirree shiartanse, as dymmyrk ad feanish foalsey n’oï, gra, 58Cheayll shin eh gra, Lhieg-yms y chiamble shoh ta jeant lesh laueyn, as cheu-sthie jeh three laa, trog-ym chiamble elley vees jeant fegooish laueyn. 59Agh myr shen hene cha row yn eanish oc coardail ry-cheilley. 60As hass yn ard-saggyrt seose ayns mean y cheshaght, as dênee eh jeh Yeesey, gra, Nagh vel oo cur ansoor erbee? cre ta ny feanishyn shoh dy lhiassaghey dt’oï? 61Agh v’eh ny host, as cha dug eh ansoor erbee, Reesht dênee yn ard-saggyrt jeh, as dooyrt eh rish, Nee uss yn Creest, Mac yn Er-vannit? 62As dooyrt Yeesey, She shen mee: as hee shiuish Mac y dooinney ny hoie er laue yesh y phooar, as cheet ayns bodjallyn yn aer. 63Eisht raip yn ard-saggyrt e eaddagh, as dooyrt eh, Cre’n feme t’ain er feanishyn erbee sodjey? 64Ta shiu er chlashtyn ny goan mollaghtagh? cre ta shiu smooinaghtyn? As hug ad ooilley briwnys er, dy row eh toilchin baase. 65As ren paart toshiaght dy cheau shellaghyn er, as dy choodaghey yn eddin echey, as dy woalley eh, as dy ghra rish, Jean phadeyrys: as woaill ny sidooryn eh lesh nyn massyn.

66As myr va Peddyr heese ayns halley yn ard-saggyrt, haink unnane jeh ny sharvaantyn, 67As tra honnick ee Peddyr dy hiow eh-hene, yeeagh ee er, as dooyrt ee, As v’ou uss neesht marish Yeesey dy Nazareth. 68Agh dob eh, gra, Cha vel fys ny toiggal aym, cre t’ou dy ghra. As hie eh magh ayns y phorch; as gherr y kellagh. 69As honnick ben-aeg elley eh reesht, as ren ee toshiaght dy ghra rish y cheshaght, T’eh shoh fer jeu. 70As dob eh reesht. As tammylt ny lurg shen, dooyrt paart jeh’n cheshaght reesht rish Peddyr, Son shickyrys t’ou uss fer jeu: son she Galilean oo, as ta dty ghlare dy hoilshaghey eh. 71Agh ren eh toshiaght dy ghweeaghyn as dy loo, gra, Cha nione dou yn dooinney shoh mychione ta shiu loayrt. 72As ren y kellagh gerrym yn nah cheayrt. As chooinee Peddyr er ny goan va Yeesey er loayrt rish, Roish my gerr y kellagh daa cheayrt, nee uss mish y obbal three keayrtyn. As tra smooinee eh er shen, ren eh keayney.