CAB. IV

1As ren eh toshiaght reesht dy ynsaghey rish oirr ny marrey: as va earroo mooar dy leih er nyn jaglym cooidjagh huggey, myr shen dy jagh eh er-board lhong, as hoie eh er y cheayn, as va ooilley yn pobble liorish y cheayn, er y thalloo. 2As dynsee eh daue ymmodee nheeghyn ayns coraaghyn-dorraghey, as dooyrt eh roo ayns e ynsagh, 3Clasht-jee, Cur-my-ner hie correyder magh dy chuirr: 4As haink eh gy-kione myr v’eh cuirr, dy huitt paart jeh’n rass rish oirr y raad, as haink eeanlee yn aer, as d’ee ad seose eh. 5As huitt paart er thalloo claghagh, raad nagh row mooarane ooir echey, as chelleeragh daase eh, er-yn-oyr nagh row diunid thallooin echey. 6As tra ghow yn ghrian niart ve fiojit, as er-yn-oyr nagh row eh er n’ghoaill fraue, ren eh shyrgaghey ersooyl. 7As huitt paart mastey drineyn, as daase ny drineyn seose mârish, as phloogh ad eh, as cha dymmyrk eh mess. 8Agh huitt cooid elley jeh ayns thalloo mie, as hug eh magh mess ren gaase seose as bishaghey, as dymmyrk eh, paart jeih fillaghyn as feed, as paart three-feed, as paart keead-filley. 9As dooyrt eh roo, Eshyn ta cleayshyn echey dy chlashtyn, lhig da clashtyn. 10As tra v’eh ny-lomarcan, dênee yn vooinjer va mygeayrt-y-mysh marish y daa ostyl yeig jeh mychione y coraa-dorraghey. 11As dooyrt eh roo, Diuish te er ny choyrt dy hoiggal folliaght reeriaght Yee: agh dauesyn ta mooie, ta dy chooilley nhee jeant ayns coraaghyn-dorraghey: 12Son fakin hee ad, agh cha der ad tastey, as clashtyn cluinnee ad, agh cha gow ad tushtey; er-aggle ec traa erbee dy beagh ad er nyn jyndaa, as dy beagh nyn beccaghyn er nyn leih daue. 13As dooyrt eh roo, Nagh vel toiggal eu jeh’n choraa-dorraghey shoh? as kys eisht nee shiu dy chooilley choraa-dorraghey y hoiggal?

14Ta’n correyder cuirr yn goo. 15As ad shoh adsyn ta rish oirr y raad, ayn ta’n goo er ny chuirr, agh tra t’ad er chlashtyn, ta’n drogh-spyrryd cheet jeeragh, as goaill ersooyl yn goo va cuirt ayns nyn greeaghyn. 16As ad shoh neesht yn vooinjer ta cuirt ayns thalloo claghagh, ta, erreish daue v’er chlashtyn y goo, chelleeragh dy ghoaill eh dy aggindagh: 17Agh cha vel fraue oc ayndoo hene, as myr shen cha vel ad cummal rish agh son earish: ny lurg shen tra ta seaghyn ny tranlaase cheet orroo er coontey yn ghoo, chelleeragh ta nyn gredjue failleil. 18As ad shoh yn vooinjer ta cuirt mastey drineyn: lheid as ta clashtyn y goo, 19As ta kiarail y theihll shoh, as molteyraght berchys, as saynt reddyn elley goll stiagh, as plooghey yn goo, as te cheet dy ve neu-vessoil. 20As ad shoh yn vooinjer ta cuirt ayns thalloo mie, lheid as ta clashtyn y goo, as ta dy ghoaill eh, as gymmyrkey magh mess, paart jeih fillaghyn as feed, paart three-feed, as paart keead-filley.

21As dooyrt eh roo, Vel cainle dy ve er ny choyrt fo saagh, ny fo lhiabbee? as nagh vel ee dy v’er ny choyrt ayns cainleyr? 22Son cha vel nhee erbee keillit, nagh bee er ny hoilshaghey: ny nhee erbee freilt follit, nagh jig er-ash? 23My ta cleayshyn ec dooinney erbee dy chlashtyn lhig da clashtyn. 24As dooyrt eh roo, Cur-jee tastey da ny ta shiu dy chlashtyn: lesh y towse ta shiu towse, bee eh er ny howse diu: as diuish ta clashtyn, bee ny smoo er ny choyrt. 25Son eshyn ta echey, dasyn vees er ny choyrt: as eshyn nagh vel echey, veihsyn vees er ny ghoaill eer shen hene ny ta echey.

26As dooyrt eh, Shoh myr ta reeriaght Yee, myr dy dilgagh dooinney rass ayns y thalloo, 27As eh dy chadley, as dy irree oie as laa; as y rass dy heet er y hoshiaght, as dy aase seose, gyn-yss da. 28Son ta’n thalloo cur magh mess j’ee hene, hoshiaght yn chass, eisht yn jeeas, ny lurg shen, yn arroo creen ayns y jeeas. 29Agh tra ta’n mess er greenaghey, chelleeragh t’eh cur yn corran fo, er-yn-oyr dy vel y fouyr er jeet.

30As dooyrt eh, Cre gys nee mayd reeriaght Yee y hoylaghey? ny lesh cre’n co-chaslys nee mayd y hoiaghey magh eh? 31Te goll-rish grine dy rass mustard, ta ny sloo, tra te cuirt ayns y thalloo, na dy chooilley rass ta ayns y thalloo. 32Agh tra te cuirt, te gaase seose, as cheet dy ve ny smoo na ooilley ny lossreeyn, as cur magh banglaneyn mooarey; myr shen dy vod eeanlee yn aer fastee y ghoaill fo’n scadoo echey. 33As lesh ymmodee dy lheid ny coraaghyn-dorraghey loayr eh yn goo roo, myr v’adsyn son goaill rish. 34Agh fegooish coraa-dorraghey cha loayr eh roo: as tra v’ad nyn-lomarcan, hoilshee eh dy chooilley nhee da e ostyllyn. 35As yn laa cheddin tra va’n fastyr er, dooyrt eh roo, Lhig dooin goll harrish gys y cheu elley. 36As tra v’ad er chur ersooyl yn pobble, hug ad lhieu eh myr v’eh ayns y lhong, as va myrgeddin lhongyn beggey elley mârish. 37As dirree sterrym mooar dy gheay, as va ny tonnyn brishey stiagh ayns y lhong, myr shen dy row ee nish er lhieeney. 38As v’eshyn ayns jerrey ny lhuingey ny chadley er clooisag: as ghooisht ad eh, as dooyrt ad rish, Vainshter, nagh vel geill ayd dy bee mayd caillit? 39As dirree eh, as smaghtee eh yn gheay, as dooyrt eh rish y faarkey, Gow fea, bee kiune: as ghow yn gheay fea, as va kiuney vooar ayn. 40As dooyrt eh roo, Cre’n-fa ta shiu cha agglagh? kys te nagh vel credjue eu? 41As v’ad feer agglagh, as dooyrt ad yn derrey yeh rish y jeh elley, cre’n monney dy ghooinney eh shoh, dy vel y gheay hene as y faarkey cur biallys da?