CAB. VI

1As hie eh magh veih shen, as haink eh gys e heer hene, as deiyr e ostyllyn er. 2As tra va’n doonaght er jeet ren eh toshiaght dy ynsaghey ayns y synagogue: as ghow ymmodee jeusyn va dy chlashtyn eh yindys mooar, gra, Cre voish ta ny reddyn shoh ec y dooinney shoh? as cre’n chreenaght shoh t’er ny choyrt da, dy vel lheid ny obbraghyn niartal er nyn obbraghey liorish ny laueyn echey? 3Nagh nee shoh yn seyir, mac Voirrey, braar Yamys as Yoses as Juda as Simon, as nagh vel ny shayraghyn echey ayns shoh mârin? as ghow ad cômys rish. 4Agh dooyrt Yeesey roo, Cha vel phadeyr fegooish ooashley, agh ayns e heer hene, as mastey e chynney hene, as ayns e hie hene. 5As cha dod eh mirril erbee y obbraghey ayns shen, cheu-mooie jeh dy dug eh e laueyn er regyryn dy leih chingey, as dy ren eh ad y lheihys. 6As ghow eh yindys jeh’n vee-chredjue oc. As hie eh mygeayrt ny baljyn-cheerey oc gynsaghey.

7As deïe eh er y daa ostyl yeig huggey, as ren eh toshiaght dy chur ad magh jees as jees, as hug eh daue pooar harrish spyrrydyn neu-ghlen, 8As sarey gyn ad dy ghoaill red erbee cour nyn yurnah, agh ynrycan lorg: gyn ad dy ghoaill spagey, ny arran, ny argid ayns nyn sporran: 9Agh dy gholl ayns nyn mraagyn, as gyn ad dy chur orroo daa chooat. 10As dooyrt eh roo, Raad erbee dy jed shiu stiagh ayns thie, fuirree-jee ayn derrey aagys shiu yn ynnyd shen. 11As quoi-erbee nagh jean goaill riu, ny geill y choyrt da ny goan eu, tra vees shiu goll reue, crie-jee yn joan ta fo ny cassyn eu, son feanish nyn ’oï. Dy firrinagh ta mee gra riu, Dy bee eh ny sassey son Sodom as Gomorrah ec laa ny briwnys, na son yn ard-valley shen. 12As hie ad magh, as ren ad preacheil, sleih dy ghoaill arrys. 13As deiyr ad magh ymmodee drogh-spyrrydyn, as dooilee ad lesh ooil ymmodee sleih chingey, as ren ad ad y laanaghey. 14As cheayll ree Herod jeh (son va’n goo echey er n’gholl magh) as dooyrt eh, Dy row Ean Bashtey er n’irree veih ny merriu, as er-yn-oyr shen dy row mirrilyn er nyn obbraghey liorish. 15Dooyrt paart dy leih, dy nee Elias v’ayn: dooyrt feallagh elley, Dy nee phadeyr v’eh, ny myr fer jeh ny phadeyryn. 16Agh tra cheayll Herod jeh, dooyrt eh, She Ean Bashtey t’ayn, hug mish y kione jeh, t’eh er n’irree veih ny merriu. 17Son va Herod hene er chur fys magh, as er ghoaill Ean, as er choyrt eh ayns geulaghyn ’sy phryssoon, kyndagh rish Herodias ben e vraar Philip; son v’eh er phoosey ee. 18Son va Ean er ghra rish Herod, Te noi yn leigh dhyt ben dty vraarey y ve ayd son ben. 19Shen-y-fa va Herodias ayns goanlys da, as v’ee shleeuit er cur dy baase eh, agh cha daink eh lh’ee. 20Son va Herod ayns ammys Ean, toiggal dy row eh ny ghooinney cairagh as crauee, as hug eh geill da, as er y choyrle echey v’eh er n’yannoo ymmodee reddyn, as deaisht eh rish dy arryltagh. 21Agh tra va laa jesh er y hon er jeet, dy ren Herod corrym rish y laa ruggyr eh, shibber y yannoo, son e hiarnyn, ard-chaptanyn, as deiney ooasle Ghalilee: 22As haink inneen Herodias cheddin stiagh, as ghaunse ee, as ghow Herod as e ghoaldee va mârish ard-voggey j’ee, as dooyrt y ree rish y ven-aeg, Shir orrym’s aghin erbee dy nailt, as giall-ym dhyt eh. 23As loo eh jee, Cre-erbee hirrys oo orrym, ver-ym dhyt eh, gys y derrey lieh jeh my reeriaght. 24As hie ee magh, as dooyrt ee rish e moir, Cre hirrym? As dooyrt ish, Kione Ean Bashtey. 25As haink ee stiagh er-y-chooyl ayns siyr gys y ree, as hir ee, gra, Saillym oo dy chur dou nish hene er claare kione Ean Bashtey. 26As va’n ree trome trimshagh, ny-yeih er coontey e loo, as y vooinjer va nyn soie mârish, cha row eh booiagh cur obbal jee. 27As chelleeragh hug y ree magh marrooder, as doardee eh cur lesh e chione: as hie eh, as hug eh yn kione jeh Ean ayns y phryssoon. 28As hug eh lesh yn kione er claare, as livrey eh eh gys y ven-aeg: as livrey ish eh gys e moir. 29As tra cheayll e ynseydee jeh shoh, haink ad as hrog ad e chorp, as doanluck ad eh ayns lhiaght. 30As haink ny ostyllyn cooidjagh gys Yeesey, as dinsh ad da dy chooilley nhee, chammah cre v’ad er n’yannoo, as cre v’ad er n’ynsaghey. 31As dooyrt eh roo, Tar-jee shiuish er-lheh gys boayl faasagh, as gow-jee tammylt dy nyn aash: son va ymmodee cheet as goll, as cha row caa oc wheesh as dy ee. 32As jimmee ad ayns lhong gys ynnyd faasagh er-lheh. 33Agh honnick y pobble ad goll roue, as hug ymmodee jeu enney er, as roie ad gys shen rish nyn gosh veih dy chooilley ard-valley, as haink ad gys shen rhymboo, as chruinnee ad huggey. 34As tra va Yeesey er jeet er thalloo honnick eh earroo mooar dy leih, as v’eh er ny veiyghey lesh chymmey orroo, er-yn-oyr dy row ad myr kirree fegooish bochilley: as ren eh toshiaght dy ynsaghey ad ayns ymmodee reddyn. 35As tra va’n laa nish foddey baarit, haink e ostyllyn huggey, as dooyrt ad, Shoh boayl faasagh, as ta’n traa nish er n’gholl foddey shaghey: 36Lhig y raad daue, dy vod ad goll er y cheer mygeayrt, as gys ny baljyn-cheerey, dy chionnaghey arran daue hene: son cha vel veg y veaghey oc. 37As dreggyr eshyn as dooyrt eh roo, Cur-jee shiuish bee daue. As dooyrt ad rish, Nailt shin goll dy chionnaghey feeagh daa cheead ping dy arran, as beaghey ’chur daue? 38Dooyrt eh roo, Cre-woad bwilleen t’eu? immee-jee as jeeagh-jee. As tra va fys oc, dooyrt ad, Queig, as daa eeast. 39As doardee eh daue ad dy chur orroo ooilley soie sheese ayns sheshaghtyn er yn aiyr ghlass. 40As hoie ad sheese ayns roaghyn, keead as lieh-cheead ayns roa. 41As tra v’eh er ghoaill ny queig bwilleenyn as y daa eeast, yeeagh eh seose gys niau, as vannee eh, as vrish eh ny bwilleenyn, as hug eh ad da e ostyllyn dy hoiaghey rhymboo; as y daa eeast rheynn eh ny mast’ oc ooilley. 42As ren ad ooilley gee, as v’ad er nyn n’yannoo magh. 43As hrog ad jeh’n fooilliagh as jeh ny eeastyn lane daa vaskad jeig. 44As v’adsyn v’er n’ee jeh ny bwilleenyn mysh queig thousane dooinney. 45As chelleeragh hug eh er e ostyllyn lhuingys y ghoaill, as ad dy gholl roish gys y cheu elley gys Bethsaida, choud as v’eh cur y pobble ersooyl. 46As tra v’eh er chur ad ersooyl, hie eh seose er slieau dy ghoaill padjer. 47As tra va’n fastyr er jeet, va’n lhong ayns mean ny marrey, as eshyn ny-lomarcan er y thalloo. 48As honnick eh ad tooilleil ayns gymmyrt (son va’n gheay nyn ’oï oc) as mygeayrt y chiarroo arrey jeh’n oie, haink eh huc shooyl er y cheayn, as ren eh myr dy ragh eh shaghey ad. 49Agh tra honnick ad eh shooyl er y cheayn, heill ad dy nee scaan v’ayn, as dyllee ad. 50(Son honnick ad ooilley eh, as v’ad seaghnit.) As chelleeragh loayr eh roo, as dooyrt eh roo, Bee-jee dy yien mie, she mish t’ayn, ny gow-jee aggle. 51As hie eh seose ’sy lhong huc, as ghow yn gheay fea: as v’ad feer atchimagh ayndoo hene erskyn towse, as goaill yindys. 52Son cha chooinee ad er [mirril] ny bwilleenyn, son va’n cree oc er ny chreoghey. 53As tra v’ad er n’gholl harrish, haink ad gys cheer Ghennesaret, as hayrn ad gys thalloo. 54As tra v’ad er jeet ass y lhong, chelleeragh hug y sleih enney er, 55As roie ad trooid ooilley yn cheer mygeayrt, as hug ad lhieu er lhiabbaghyn adsyn va ching, raad v’ad clashtyn v’eh. 56As raad erbee dy jagh eh, gys baljyn-cheerey, ny ard-valjyn, ny er y cheer, lhie ad yn vooinjer hingey ayns ny raaidyn, as ghuee ad er agh dy ventyn rish oirr e gharmad: as whilleen as venn rish, v’ad er nyn lheihys.