CAB. IX

1As dooyrt eh roo, Dy firrinagh ta mee gra riu, Dy vel paart jeusyn ta nyn shassoo ayns shoh, nagh jean blashtyn er y baase, derrey vees ad er vakin reeriaght Yee er jeet lesh pooar.

2As ec kione shey laa, ghow Yeesey mârish Peddyr as Jamys, as Ean, as hug eh lesh ad seose gys slieau ard ad-hene er-lheh: as va’n cummey echey er ny chaghlaa kiongoyrt roo. 3As haink y coamrey echey dy ve sollys, erskyn towse gial myr y sniaghtey; nagh row walker er y thalloo oddagh jannoo cha gial roo. 4As hug ad my-ner Elias, as Moses: as ad taggloo rish Yeesey. 5As dreggyr Peddyr as dooyrt eh rish Yeesey, Vainshter, s’maynrey dooinyn dy hannaghtyn ayns shoh: as lhig dooin three cabbaneyn y hroggal, cabbane er dty hon’s, as cabbane son Moses, as cabbane son Elias. 6Son cha row fys echey cre dy ghra, son s’mooar yn aggle v’orroo. 7As ren bodjal scadoo y hilgey harrystoo: as haink coraa ass y vodjal, gra, Shoh my vac ennoil; eaisht-jee rish. 8As chelleeragh jeeaghyn mygeayrt, cha vaik ad dooinney erbee agh Yeesey ynrycan mâroo hene. 9As myr v’ad cheet neose jeh’n clieau, hug eh currym orroo, gyn ad dy insh da dooinney erbee cre v’ad er vakin, derrey veagh Mac y dooinney er n’irree veih ny merriu. 10As dreill ad y raa shen oc hene, resooney yn derrey yeh rish y jeh elley cre v’er ny hoiggal liorish yn irree-seose-reesht veih ny merriu.

11As dênee ad jeh, gra, Cre’n-oyr ta ny scrudeyryn gra, dy vel Elias dy heet hoshiaght? 12As dreggyr eshyn as dinsh eh daue, Dy row Elias dy firrinagh dy heet hoshiaght, as dy lhiassaghey dy chooilley nhee, as kys te scruit mychione Mac y dooinney dy nhegin da goll trooid mooarane surranse, as beg dy ve soit jeh. 13Agh ta mish gra riu, dy vel Elias dy jarroo er jeet, myr te scruit jeh, as dy vel ad er n’yannoo rish myr bailloo.

14As tra v’eh er jeet gys e ostyllyn, honnick eh chaglym mooar dy leih mygeayrt-y-moo, as ny scrudeyryn arganey roo. 15As chelleeragh tra honnick yn pobble eh, ghow ad ooilley lane boggey jeh, as roie ad huggey goltaghey da. 16As dênee eh jeh ny scrudeyryn, Cre ny questionyn va shiu dy ênaght jeu? 17As dreggyr fer jeh’n cheshaght, as dooyrt eh, Vainshter, Ta mee er chur lhiam my vac hood, ayn ta spyrryd balloo: 18As raad erbee dy vel eh dy ghoaill eh, t’eh dy eiyrt eh noon as noal; as t’eh keshal as snaggeraght lesh e eeacklyn, as shymley ersooyl: as loayr mee rish dty ostyllyn, ad dy chastey eh; agh cha daink eh lhieu. 19Dreggyr eshyn as dooyrt eh, O heeloghe vee-chredjuagh, caïd ta mish dy ve mêriu? caïd ta mee dy hurranse diu? cur lhiat eh hym’s. 20As hug ad lhieu eh huggey: as tra honnick eh eh, chelleeragh deiyr y spyrryd eh noon as noal, as huitt eh er y thalloo, rowlal as keshal ec y veeal. 21As dênee eh jeh’n ayr echey, Caïd neayr as haink shoh er? As dooyrt eh, T’eh er ve myr shoh neayr as v’eh ny lhiannoo. 22As dy mennick t’eh er hilgey eh ayns yn aile, as ayns ny ushtaghyn, dy stroie eh: agh my oddys oo nhee erbee y yannoo, jean chymmey orrin, as cooin lhien. 23Dooyrt Yeesey rish, My oddys oo credjal, ta dy chooilley nhee cheet leshyn ta credjal. 24As chelleeragh deïe ayr y lhiennoo, as dooyrt eh lesh jeïr, Hiarn, ta mee credjal; niartee lesh my chredjue faase. 25Tra honnick Yeesey dy row yn pobble ayns preis chionney dy cheilley, vaggyr eh er y spyrryd neu-ghlen, as dooyrt eh rish, Uss spyrryd balloo as bouyr, ta mee dy dty harey, Oo dy heet magh ass, as gyn arragh dy gholl stiagh ayn. 26As dyllee yn spyrryd, as deiyr eh noon as noal eh, as haink eh magh ass; as v’eh myr dy beagh eh marroo, ayns wheesh as dy dooyrt ymmodee, T’eh marroo. 27Agh ghow Yeesey eh er laue, as hrog eh eh seose, as dirree eh. 28As tra v’eh er jeet stiagh ayns y thie, dênee e ostyllyn jeh er-lheh, Cre’n-oyr nagh voddagh shin y chastey eh? 29As dooyrt eh roo, Cha vel y keint shoh cheet magh er aght erbee, agh liorish padjer as trostey.

30As jimmee eh veih shen, as hie ad trooid Galilee; as cha baillish fys y ve ec dooinney erbee er. 31Son dynsee eh e ostyllyn, as dooyrt eh roo, Ta Mac y dooinney dy ve livreït gys laueyn deiney, as marree ad eh, as erreish da v’er ny varroo, nee eh girree reesht yn trass laa. 32Agh cha hoig ad yn raa shen, as cha by-lhoys daue fênaghtyn jeh.

33As haink eh gys Capernaum, as ayns y thie dênee eh jeu, Cre’n taggloo shen va eu ny mast’ eu hene er y raad? 34Agh v’ad nyn dhost: Son er y raad v’ad pleadeil nyn mast’ oc hene, quoi syrjey veagh. 35As hoie eh sheese, as deïe eh er y ghaa-yeig, as dooyrt eh roo, My ta dooinney erbee geearree dy ve hoshiaght, bee eh er-jerrey ooilley, as ny harvaant da ooilley. 36As ghow eh lhiannoo, as hoie eh eh kiongoyrt roo: as tra v’eh er ghoaill eh ayns e roihaghyn, dooyrt eh roo, 37Quoi-erbee nee soiaghey jeh unnane dy lheid y chloan shoh, t’eh soiaghey jeem’s: as quoi-erbee nee soiaghey jeem’s, cha nee jeem’s t’eh soiaghey, agh jehsyn t’er my choyrt.

38As dreggyr Ean eh, gra, Vainshter, honnick shin fer castey drogh-spyrrydyn ayns dty ennym’s, as cha vel eh geiyrt orrinyn, as ren shin eh y lhiettal, er-yn-oyr nagh vel eh geiyrt orrinyn. 39Agh dooyrt Yeesey, Ny jean-jee eh y lhiettal: son cha vel dooinney erbee nee mirril y yannoo ayns m’ennym’s, oddys dy eddrym loayrt olk jee’m. 40Son eshyn nagh vel nyn ’oï, t’eh er nyn baart. 41Son quoi-erbee ver diu cappan dy ushtey dy iu, ayns m’ennym’s, er-yn-oyr dy vel shiu bentyn gys Creest, dy firrinagh ta mee gra riu, nagh gaill eh e leagh. 42As quoi-erbee ver oyr da unnane jeh’n vooinjer veggey shoh ta credjal aynym’s dy huittym [veih’n chredjue] bare da clagh-wyllin dy ve croghit mysh e wannal, as eh dy ve tilgit ayns y cheayn. 43As my ta dty laue dy dty hayrn gys yn olk, giare jeed ee: te ny share dhyt goll stiagh ayns y vea veayn, baccagh, na daa laue y ve ayd, as oo dy gholl gys niurin, gys yn aile nagh bee dy bragh er ny vooghey. 44Raad nagh vel y veishteig oc geddyn baase, as cha vel yn aile er ny vooghey. 45As my ta dty chass dy dty hayrn gys peccah, giare jeed ee: te ny share dhyt goll croobagh stiagh ayns y vea veayn, na daa chass y ve ayd, as oo dy ve tilgit ayns niurin, ayns yn aile nagh bee dy bragh er ny vooghey: 46Raad nagh vel y veishteig oc geddyn baase, as cha vel yn aile er ny vooghey. 47As my ta dty hooill dy dty hayrn gys peccah, pluck assyd ee: te ny share dhyt goll stiagh ayns reeriaght Yee lesh un hooill, na daa hooill y ve ayd, as oo dy ve tilgit ayns aile niurin: 48Raad nagh vel y veishteig oc geddyn baase, as cha vel yn aile er ny vooghey. 49Son bee dy chooilley unnane jeh nyn lheid oc shoh er nyn sailley lesh aile, as dy chooilley oural er ny hailley lesh sollan. 50Ta’n sollan mie: agh my ta’n sollan er choayl e hailjys, kys hig e vree ayn reesht? Freill-jee sollan ayndiu hene, as bee-jee ayns shee yn derrey yeh rish y jeh elley.