CAB. XIII

1Yn laa cheddin hie Yeesey magh ass y thie, as hoie eh sheese rish oirr ny marrey. 2As va earrooyn mooarey dy leih er nyn jaglym cooidjagh huggey, myr shen dy jagh eh er-board lhong, as hoie eh sheese, as va ooilley yn pobble nyn shassoo er y traie. 3As loayr eh mooarane reddyn roo ayns coraaghyn-dorraghey, gra, Cur-jee my-ner, hie correyder magh dy chuirr. 4As myr v’eh cuirr, huitt paart jeh’n rass rish oirr y raad, as haink ny eeanlee, as d’ee ad seose eh. 5Huitt paart er thalloo cloaie, raad nagh row mooarane ooir: as daase eh er-y-chooyl, er-yn-oyr nagh row diunid hallooin echey: 6As tra ghow yn ghrian niart, ve fiojit; as er-yn-oyr nagh row eh er n’ghoaill fraue, ren eh shymley ersooyl. 7As huitt paart mastey drineyn: as daase ny drineyn seose as phloogh ad eh. 8Agh huitt cooid elley jeh ayns thalloo mie, as dymmyrk eh mess, paart keead-filley, paart three-feed-filley, as paart jeih fillaghyn as feed. 9Eshyn ta cleayshyn echey dy chlashtyn, lhig da clashtyn. 10As haink e ostyllyn huggey, as dooyrt ad rish, Cre’n-fa t’ou loayrt roo ayns coraaghyn-dorraghey? 11Dreggyr eshyn, as dooyrt eh roo, Er-yn-oyr dy vel eh er ny choyrt diuish folliaghtyn reeriaght niau y hoiggal, agh dauesyn cha vel eh er ny choyrt. 12Son quoi-erbee ta echey, dasyn vees er ny choyrt, as bee towse s’feoiltey er ny choyrt da: agh quoi-erbee nagh vel echey, veihsyn vees shen ny ta echey, er ny ghoaill ersooyl. 13Shen-y-fa ta mee loayrt roo ayns coraaghyn-dorraghey: er-yn-oyr, ga dy vel ad fakin, cha vel ad cur-my-ner: as clashtyn, cha vel ad cur geill, chamoo t’ad toiggal. 14As ayndoosyn ta cooilleenit phadeyrys Esaias, ta gra, Ayns clashtyn, cluinnee shiu, agh cha jean shiu toiggal: as ayns fakin, hee shiu, agh cha der shiu my-ner. 15Son ta cree yn phobble shoh er n’aase roauyr, as ta ny cleayshyn oc moal dy chlashtyn, as ny sooillyn oc t’ad er n’yeigh; er-aggle dy vaikagh ad lesh nyn sooillyn, as dy gluinnagh ad lesh nyn gleayshyn, as dy doiggagh ad lesh nyn gree, as dy beagh ad er nyn jyndaa, as dy jinnin ad y lheihys. 16Agh bannit ta ny sooillyn euish, son t’ad fakin, as ny cleayshyn eu, son t’ad clashtyn. 17Son dy firrinagh ta mee gra riu, dy vel ymmodee phadeyryn as deiney cairagh er ve aignagh dy akin ny reddyn ta shiuish dy akin, agh cha vel ad er vakin ad: as dy chlashtyn ny reddyn ta shiuish dy chlashtyn, agh cha vel ad er chlashtyn ad.

18Clasht-jee er-y-fa shen coraa-dorraghey yn chorreyder. 19Quoi-erbee ta clashtyn goo yn reeriaght, as nagh vel dy hoiggal eh, ta’n drogh-er cheet, as tayrtyn lesh shen ny va cuirt ayns e chree: shoh eh ghow yn rass rish oirr y raad. 20Agh eshyn ghow yn rass ayns ynnydyn claghagh, shen eh ta clashtyn y goo, as jeeragh lesh boggey dy ghoaill eh: 21Foast cha vel fraue echey ayn hene, agh t’eh cummal rish son tammylt: agh tra ta seaghyn as tranlaase cheet er, er coontey yn ghoo chelleeragh ta e chredjue failleil. 22Eshyn myrgeddin ghow yn rass mastey ny drineyn, yn fer ta clashtyn y goo: as ta kiarail y theihll shoh, as molteyrys berchys plooghey yn goo, as te cheet dy ve neu-vessoil. 23Agh eshyn ghow yn rass ayns thalloo mie, shen eh ta clashtyn y goo as dy hoiggal eh, as t’eh tilgey mess, as gymmyrkey, paart keead-filley, paart three-feed, as paart jeih fillaghyn as feed.

24Coraa-dorraghey elley loayr eh roo, gra, Ta reeriaght niau er ny hoylaghey gys dooinney chuirr rass mie ayns e vagher: 25Agh choud as va sleih nyn gadley, haink e noid, as chuirr eh coggyl mastey yn churnaght, as jimmee eh roish. 26Agh tra va’n chass er n’aase, as er n’gholl my-yeish, eisht haink y coggyl rish myrgeddin. 27Er shen haink fir-vooinjerey yn er-thie, as dooyrt ad rish, Vainshter, nagh chuirr uss rass mie ayns dty vagher? cre voish eisht ta’n coggyl t’ayn. 28Dooyrt eshyn roo, Noid t’er n’yannoo shoh. Dooyrt ny fir-vooinjerey rish, Nailt eisht shin dy gholl as dy ghaartlian ass eh? 29As dooyrt eshyn, Cha naillym; er-aggle ayns gaartlian yn coggyl, dy n’astyrt shiu yn churnaght myrgeddin ass ny fraueyn mârish. 30Lhig-jee daue ny-neesht gaase cooidjagh derrey’n fouyr: as ayns earish yn ouyr jir-yms rish ny beayneeyn, Chymsee-jee cooidjagh hoshiaght yn coggyl ayns bunneeyn ry-hoi lostey; agh tayrn-jee yn churnaght stiagh ayns my hoalt.

31Coraa-dorraghey elley loayr eh roo, gra, Ta reeriaght niau goll-rish grine dy rass mustard ghow dooinney, as chuirr eh ayns e vagher eh. 32As ga dy nee eh sloo jeh dy chooilley rass: foast tra te er n’aase, eh smoo ta mastey lossreeyn, as te cheet dy ve ny villey: myr shen dy vel eeanlee yn aer cheet as goaill fastee ayns ny banglaneyn echey.

33Coraa-dorraghey elley loayr eh roo, Ta reeriaght niau goll-rish soorid ren ben y ghoaill as coodaghey seose ayns three towseyn dy veinn, derrey va’n clane soorit. 34Ooilley ny goan shoh loayr Yeesey rish y pobble ayns coraaghyn-dorraghey, as fegooish coraa-dorraghey, cha loayr eh roo: 35As shoh myr va cooilleenit shen loayr y phadeyr, gra, Foshlym my veeal dy loayrt coraaghyn-dorraghey, soilshee-ym magh reddyn t’er ve follit er-dy hoshiaght y theihll. 36Eisht hug Yeesey yn cheshaght ersooyl, as hie eh stiagh ayns y thie: as haink huggey adsyn va sheer mârish, gra, Soilshee dooin coraa-dorraghey coggyl yn vagheragh. 37Dreggyr eshyn as dooyrt eh roo, Eshyn chuirr yn rass mie, Mac yn dooinney: 38Yn magher yn seihll: yn rass mie cloan y reeriaght: agh y coggyl cloan y drogh-er: 39Yn noid chuirr ad yn Jouyl: yn fouyr jerrey yn theihll: as ny beayneeyn ny ainleyn. 40Myr, er-y-fa shen, ta’n coggyl er ny haglym, as er ny lostey ayns yn aile; shen myr vees eh ec jerrey’n theihll. 41Ver yn Mac dooinney magh e ainleyn, as teiyee ad ass e reeriaght dy chooilley nhee ta tayrn sleih gys peccah, as adsyn ta cur-rish yn olk; 42As tilgee ad ad ayns coirrey aileagh: ayns shen vees keayney as snaggeraght feeacklyn. 43Eisht nee yn chloan chairagh soilshean magh myr y ghrian, ayns reeriaght nyn Ayrey. Eshyn ta cleayshyn echey dy chlashtyn, lhig da clashtyn.

44Reesht ta reeriaght niau goll-rish berchys follit ayns magher: yn verchys cheddin tra ta dooinney dy gheddyn magh, t’eh dy choodaghey eh, as ayns boggey jeh t’eh goll as creck ooilley ny t’echey, as kionnaghey yn magher cheddin.

45Reesht ta reeriaght niau dy ve soylit rish marchan va shirrey pearlyn costal: 46As tra v’eh er gheddyn un phearl dy phrice vooar, hie eh, as chreck eh ooilley ny v’echey, as chionnee eh eh.

47Reesht ta reeriaght niau goll-rish lieen va cuirt ’sy cheayn as haare jeh dy chooilley horch dy eeast. 48As tra ve lane, hayrn ad eh gys thalloo, as hoie ad sheese, as haggil ad yn eeast mie ayns siyn, agh cheau ad yn drogh eeast ersooyl. 49Shen myr vees eh ec jerrey yn theihll: hig ny ainleyn magh, as scarree ad yn vee-chrauee veih mastey yn chloan chairal; 50As tilgee ad ad ayns coirrey dy aile: ayns shen vees keayney as snaggeraght feeacklyn. 51Dooyrt Yeesey roo, Vel shiu er hoiggal ooilley ny reddyn shoh? Dooyrt adsyn rish, Ta shin, Hiarn. 52Eisht dooyrt eh roo, Shen-y-fa ta dy chooilley scrudeyr, ta ynsit gys reeriaght niau, goll-rish dooinney ta ny er-thie [mie] ta cur magh ass e hashtaghyn reddyn noa as shenn. 53As haink eh gy-kione, tra va Yeesey erreish ny coraaghyn-dorraghey shoh y loayrt, dy jimmee eh veih shen. 54As tra v’eh er jeet gys e heer hene, dynsee eh ad ayns ny synagogueyn oc, ayns wheesh as dy row ad atchimagh, as dy dooyrt ad, Cre voish ta creenaght as mirrilyn y dooinney shoh? 55Nagh nee shoh mac y teyir? Nagh vel e voir enmyssit Moirrey, as e vraaraghyn Jamys as Joses, as Simon, as Judas? 56As nagh vel ny shayraghyn echey ooilley mârin? cre voish eisht ta ooilley ny reddyn t’ec y dooinney shoh? 57As v’ad jymmoosagh rish. Agh dooyrt Yeesey roo, Cha vel phadeyr gyn ooashley, agh ayns e heer hene, as ayns e hie hene. 58As cha nhimmey mirril dobbree eh ayns shen, kyndagh rish y vee-chredjue oc.