CAB. I

1Shoh goo yn Chiarn haink gys Micah yn Morasthite rish lhing Yotham, Ahaz, as Hezekiah, reeaghyn Yudah, shen honnick eh mychione Samaria as Jerusalem. 2Clasht-jee, ooilley shiuish phobble: eaisht, O halloo, as ooilley ny t’ayn: as lhig da’n Chiarn Jee ve feanish nyn ’oï, eer y Chiarn voish e hiamble casherick. 3Son cur-my-ner, ta’n Chiarn cheet ass e ynnyd, as hig eh sheese, as shooylee eh er ynnydyn ard y thallooin. 4As fosyn bee ny sleityn lheït as scoltaghyn ayns ny coanyn; myr kere-volley roish yn aile, as myr ny ushtaghyn ta roie sheese lesh yn eaynee. 5Kyndagh rish shaghrynys Yacob ta ooilley shoh, as kyndagh rish peccaghyn thie Israel. Cre ta oyr shaghrynys Yacob? nagh nee Samaria? as cre ta oyr peccah Yudah? nagh nee Jerusalem? 6Er-y-fa shen, nee’m Samaria y yannoo myr carnaneyn ayns magher traaueit, as myr smooirlagh y gharey-feeyney: as lhieg-yms sheese ny claghyn echey ayns y choan, as nee’m ny undinyn echey y hilgey bun-ry-skyn. 7As bee ooilley ny jallooyn grainnit eck bwoailt ayns peeshyn, as bee ooilley yn cosney eck losht ’syn aile, as ooilley ny jallooyn eck nee’m y stroie: son ren ee ad y chosney lesh faill streebagh, as gys faill streebagh nee ad reesht chyndaa. 8Shen-y-fa neem’s dobberan as keayney, hem rooisht as gyn eaddagh: nee’m gullal myr ny dragonyn, as cooagey myr ny hulladyn. 9Son ta’n lhott eck gyn couyr; son te er roshtyn eer er Judah: t’eh er jeet gys giat my phobble, dy jarroo gys Jerusalem.

10Ny insh-jee shoh ec Gath, ny jean-jee keayney edyr: ayns thie Aphrah jean oo hene y ymmylt ’sy joan. 11Royd oo, uss chummaltagh Saphir, lesh dty nearey rooisht: cha daink cummaltagh Zaanan magh ayns dobberan Veth-ezel; ga dy nee veueish haink e niart. 12Son ren cummaltagh Varoth farkiaght dy jeidjagh son kemmyrk; agh haink yn olk veih yn Chiarn gys giat Yerusalem. 13O uss chummaltagh Lachish, yok-jee yn ainagh gys y baagh gastey: t’eeish bun peccah gys inneen Zion: son va mee-viallys Israel er ny gheddyn aynyd. 14Shen-y-fa ver oo giootyn da Moresheth-gath: bee thieyn Achzib ny vreg da reeaghyn Israel. 15Foast ver-ym lhiam eirey ort’s, O chummaltagh Vareshah: hig eh gys Adullam, gloyr Israel. 16Jean oo hene meayl, as oo hene y vaarey son dty chloan dendeasagh; bee oo speeint myr yn urley ta coayl e edjagyn; son t’ad er n’gholl ayns cappeeys voïd.