CAB. II

1Smerg dauesyn ta shêgin er mee-chairys, as smooinaghtyn er yn olk er nyn lhiabbaghyn! cha leah’s ta’n moghrey soilshaghey t’ad cur rish, er-yn-oyr dy vel eh ayns pooar nyn laue. 2As t’ad coyrt saynt da magheryn, as goaill ad er niart; as da thieyn, as goaill daue hene ad: myr shen t’ad roostey dooinney as e hie, dy jarroo dooinney as e eiraght. 3Shen-y-fa shoh myr ta’n Chiarn dy ghra, Cur-my-ner noi yn lught-thie shoh, ta mee kiarail olk, voish cha vod shiu shaghney nyn mwannallyn, chamoo hed shiu dy mooaralagh: son ta’n imbagh shoh seaghnagh.

4Ayns y laa shen nee fer goaill seose coraa-dorraghey nyn ’oï, as nee eh dobberan lesh dobberan hrimshagh, as jir eh, Ta shin dy bollagh spooillit: t’eh er chaghlaa eiraght my phobble: kys t’eh er scughey foddey voym eh! caghlaa yn chagliagh t’eh er rheynn nyn magheryn. 5Shen-y-fa, cha bee unnane ayd, nee coyrd cronney y hayrn er dty hon’s, ayns co-chruinnaght y Chiarn. 6Ny jean-jee phadeyrys, jir ad roosyn ta phadeyrys: cha jean ad phadeyrys daue, nagh gow ad nearey. 7O uss ta enmyssit thie Yacob, vel spyrryd y Chiarn er ny leodaghey? nee shoh yn jannoo echeysyn? nagh vel my ghoan jannoo mie dasyn ta gimmeeaght dy cairal? 8Dy jarroo er y gherrit shoh ta my phobble er n’irree seose myr noid: ta shiu roostey yn coamrey, as y garmad jeh ny troailtee sheeoil, sleih nagh vel son caggey. 9Ta shiu er n’eebyrt mraane my phobble ass nyn dhieyn aalin, veih nyn gloan ta shiu er n’ghoaill ersooyl my ghloyr son dy bragh. 10Trog-jee erriu, as gow-jee reue, son cha nee shoh yn ynnyd-vaghee eu: er-yn-oyr dy vel eh neu-ghlen, nee eh shiu y stroie lesh stroialtys seiyjagh. 11My ta dooinney gimmeeaght ayns spyrryd dy oalsaght, cur rish breagyn, gra, Nee’m phadeyrys dhyt mychione feeyn as jough lajer; bee eshyn eer phadeyr yn phobble shoh.

12Nee’m, son shickyrys, chaglym, O Yacob, dagh unnane jeed: nee’m dy firrinagh chaglym fooilliagh Israel, ver-ym lhiam ad cooidjagh myr kirree Vozrah, myr shioltane ayns mean nyn mwoaillee, nee ad feiyr mooar y yannoo son ny earrooyn dy leih. 13Ta’n brisheyder er jeet seose rhymboo: t’ad feayshlit, as er n’gholl trooid y yiat, as er n’immeeaght magh er, as hed yn ree oc rhymboo, as bee yn Chiarn nyn leeideilagh.