CAB. IV

1Agh ayns ny laghyn jerrinagh hig eh gy-kione, dy bee slieau thie yn Chiarn er ny hoiaghey seose erskyn yrjid ny sleityn elley, as bee eh er ny hroggal erskyn ny croink, as nee yn pobble lhieeney huggey. 2As hig ymmodee ashoonee, as jir ad, Tar-jee as lhig dooin goll seose gys slieau y Chiarn, as gys thie Jee Yacob, as nee eh gynsaghey shin ayns e raaidyn, as nee mayd shooyl ayns e chesmadyn: as hed yn leigh magh ass Zion, as goo yn Chiarn voish Jerusalem.

3As nee eh briwnys mastey ymmodee pobble, as ver eh oghsan da ashoonee foddey jeh, as bwoaillee ad nyn gliwenyn ayns coulteryn, as ny shleiyghyn oc ayns yiarnyn folderagh: cha jean ashoon troggal seose cliwe noi ashoon, chamoo nee ad arragh caggey y ynsagh. 4Agh nee ad soie dy chooilley ghooinney fo yn villey-feeyney echey hene, as fo yn villey-figgagh echey hene, as cha bee aggle orroo roish noid erbee: son ta beeal Chiarn ny flaunyssee er loayrt eh. 5Son nee dy chooilley phobble gimmeeaght dagh fer ayns ennym e yee hene, as nee shinyn gimmeeaght ayns ennym y Chiarn y Jee ain, son dy bragh as dy bragh. 6Er y laa shen, ta’n Chiarn dy ghra, ver-ym lhiam thie ish ta baccagh, as goym reesht ish ta immanit magh; as ish ta mee er heaghney; 7As ver-ym sluight jeeish va baccagh, as neem’s ashoon lajer jeeish va eiyrit foddey magh; as nee yn Chiarn reill harrystoo ayns cronk Zion, veih shoh magh dy jarroo son dy bragh.

8As uss, O hoor yn chioltane, cashtal inneen Zion, hood’s hig eh reesht, dy jarroo yn chied reiltys, hig yn reeriaght gys inneen Yerusalem. 9Nish cre’n-fa t’ou gaccan dy ard? vel ree erbee aynyd? vel dty choyrleyder er jerraghtyn? son ta pianyn er n’ghoaill greme ort myr ben er-troailt. 10Bee ayns pian as deinagh dy chur son y theihll, O inneen Zion, myr ben er-troailt: son nish hed oo magh ass yn ard-valley, as bee dty chummal fud y vagheragh, as hed oo eer gys Babylon; shen y raad, bee oo er dty livrey: shen y raad, nee yn Chiarn oo y eaysley veih laue dty noidyn.

11Nish myrgeddin ta ymmodee ashoonee chaglit dt’oï, ta gra, Lhig dooin jeeill y yannoo aynjee, as lhig da’n sooill ain jeeaghyn er Zion. 12Agh cha vel fys oc er smooinaghtyn y Chiarn, chamoo t’ad toiggal e choyrle: son nee eh ad y haglym myr bunneeyn gys y laare-vooie. 13Irree as jean tasteraght, O inneen Zion: son nee’m yn eairk ayd y yannoo dy yiarn, as neem’s ny yngnyn ayd jeh prash, as bwoaillee oo ymmodee pobble ayns peeshyn mynney: as nee’m yn cosney oc y chasherickey gys y Chiarn, as yn chooid oc gys Chiarn y slane seihll.