CAB. V

1Nish chaggle oo hene ayns troopyn, O inneen roosteyragh: t’eh er chruinnaghey shin stiagh lesh caggey: nee ad briw Israel y woalley lesh slatt er y lieckan. 2Agh uss, Veth-lehem Ephratah, myr s’fardalagh oo mastey thousaneyn Yudah, ny-yeih assyd hig magh hym ESHYN ta dy ve yn ard-reiltagh ayns Israel: ta’n goll-magh echey er ny ve er-dy-rieau, veih earishyn dy bragh farraghtyn. 3Shen-y-fa, ver eh ad seose, derrey t’eeish ta er-troailt er n’ymmyrkey: eisht nee yn chooid elley jeh e vraaraghyn chyndaa reesht gys cloan Israel.

4As nee eh shassoo as reill ayns niart y Chiarn, ayns ard-ooashley ennym y Chiarn yn Jee echey, as nee ad tannaghtyn: son nish bee eh ayns ard-ghoo gys ardjyn sodjey magh y thallooin. 5As bee yn dooinney shoh shee tra hig ny Assyrianee stiagh er y cheer ain: as tra nee eh shooyl ayns ny cummallyn reeoil ain, eisht nee mayd troggal n’oï shiaght bochillyn, as hoght deiney reeoil. 6As ver ad mow cheer Assyria lesh y chliwe, as cheer Nimrod lesh ny cliwenyn lommyrtagh eck hene: myr shoh nee eh shin y livrey veih yn Assyrian, tra hig eh gys y cheer ain, as shooyl ayns nyn ardjyn. 7As bee sluight Yacob ayns mean ymmodee pobble, myr y druight veih yn Chiarn, myr ny frassyn er y faiyr, nagh vel lurg aigney dooinney, ny fieau son mec deiney.

8As bee sluight Yacob mastey ny ashoonee ayns mean ymmodee pobble, myr lion mastey beïyn y cheyll, myr lion aeg mastey ny shioltaneyn keyrragh: ta chammah stampey sheese, as raipey ayns peeshyn myr t’eh goll, as cha vod fer erbee livrey. 9Bee dty laue troggit seose er dty noidyn, as bee ooilley dty noidyn giarit jeh. 10As hig eh gy-kione er y laa shen, ta’n Chiarn dy ghra, dy giare-ym jeh dty chabbil voïd, as nee’m ny fainee ayd’s y stroie: 11As ver-ym naardey ard-valjyn dty heer, as lhieg-yms sheese ooilley ny cummallyn-lajer ayd. 12As nee’m dty obbeeys y chastey veih dty laue, as cha bee fir-faishnee ayd arragh. 13Giare-yms sheese myrgeddin dty yallooyn grainnit, marish dty yallooyn ta soit seose ny-vud eu, as cha der oo arragh ooashley da obbyr dty laueyn. 14As nee’m gastyrt keyll dty yallooyn veih ny mast’ eu: myr shen nee’m dty ard-valjyn y stroie. 15As goym’s cooilleeney ayns jymmoose as eulys er ny ashoonee, lheid as nagh vel ad er chlashtyn.