CAB. I

1Errey Nineveh. Lioar ashlish Nahum yn Elkoshite. 2Ta Jee eadolagh, as ta’n Chiarn goaill kerraghey, ta’n Chiarn goaill cooilleeney, as t’eh eulyssagh, nee’n Chiarn goaill kerraghey er e noidyn; as freayll jymmoose cour e noidyn. 3Ta’n Chiarn moal gys corree, as ard ayns pooar, as cha jean eh er aght erbee seyrey ny mee-chrauee: ta raad y Chiarn ayns y gheay-chassee, as ayns y sterrym, as ta ny bodjallyn myr joan e chassyn. 4T’eh coyrt oghsan da’n vooir, as jannoo eh chirrym, as chyrmaghey seose ooilley ny awinyn: ta Bashan shymley ersooyl, as Carmel, as ta blaa Lebanon fioghey. 5Ta ny sleityn craa roishyn, as ny croink lheïe, as ta’n thalloo losht ec yn enish echey, eer y seihll, as ooilley ta cummal ayn. 6Quoi oddys shassoo roish e eulys? as quoi oddys gymmyrkey fo elgys e yymmoose? ta e chorree deayrtit magh myr aile, as ta ny creggyn tilgit bun-ry-skyn liorishyn. 7Ta’n Chiarn dooie, fendeilagh lajer ayns y laa seaghnagh, as shione da adsyn ta treishteil aynsyn. 8Agh lesh thooilley niartal ver eh jerrey bollagh er yn ynnyd echey, as nee dorraghys geiyrt da e noidyn. 9Cre’n choyrle ta shiu goaill noi yn Chiarn? nee eh jerrey bollagh: cha jean seaghyn girree seose y nah cheayrt. 10Son choud as t’ad cast fud-y-cheilley myr ny drineyn, as nyn geeayl voue, myr deiney meshtal, bee ad stroit myr stubble slane creen 11Ta fer er jeet magh voïd, ta smooinaghtyn er olk noi yn Chiarn: ny ghrogh-choyrleyder. 12Shoh myr ta’n Chiarn dy ghra, Ga dy bee ad ec fea, as myrgeddin ymmodee, ny-yeih shoh myr vees ad giarit sheese, tra hed eh ny hrooid oc: ga dy vel mee er dty heaghnaghey cha seaghnym oo ny-sodjey. 13Son nish brish-yms yn whing echeysyn jeed, as scolt-yms dty gheulaghyn ayns peeshyn. 14As ta’n Chiarn er choyrt sarey my-dty-chione, Nagh bee sluight jeh dty ennym’s faagit: ass thie dty yeeghyn nee’m goaill dy bollagh ny jallooyn grainnit, as nyn yallooyn roit, foshl-yms oaie er dty hon, son t’ou jeh beggan feeu. 15Cur-my-ner er ny sleityn ny cassyn echeysyn ta coyrt lesh naightyn mie, ta fockley-magh shee: O Yudah, freill dty eaillaghyn casherick, cooilleen dty vreearraghyn: son cha jed y tranlaasagh dty hrooid arragh, t’eh dy bollagh giarit jeh.