CAB. II

1Ta eshyn ta bwoalley gys peeshyn er n’irree seose kiongoyrt rish dty eddin: freill yn chastal, cum arrey er y raad, kiartee dty veeghyn, niartee dty phooar lesh slane troshid. 2Son ta’n Chiarn er chastey moyrn Yacob, as mooaralys Israel: son ta ny folmeyderyn er volmaghey ad ass, as er vhilley ny banglaneyn-feeyney oc. 3Ta scape e gheiney niartal er nyn yiargaghey, ta e gheiney-caggee ayns scarleod: bee ny fainee sollys myr lossey aile, ayns laa e chiartagh son y chaggey, as bee ny biljyn-juys dy atchimagh er nyn graa. 4Nee ny fainee freaney ayns ny straïdyn, nee ad roie noi-ry-hoi ayns ny raaidyn lheaney: nee ad loandernee myr lossey aile, nee ad roie myr ny tendreilyn. 5Nee eh musteral ny treanee: bee ad siyragh ayns nyn shooyl: chionnee ad stiagh dy gastey gys ny voallaghyn fo coodagh, er-chee dy lhieggal ad. 6Bee giattyn ny hawinyn er nyn vosley, as bee yn phlaase er ny lhieggal. 7As bee Huzzab er ny leeideil ayns cappeeys, ver ad lhieu seose ee, as nee ny moidynyn eck shooyl rhymbee cooagey myr calmaneyn, as caayney ayns nyn gleeau. 8Agh ta Nineveh er-dyn chenn earish, goll-rish loghan ushtey: ny-yeih nee ad chea ersooyl. Shass-jee, jir ad, shass-jee: agh cha jean fer jeu jeeaghyn ny yeï. 9Gow-jee yn spooilley dy argid, gow-jee yn spooilley dy airh: son cha vel jerrey er y stoyl, as jean-jee boggyssagh harrish yn chooid eunyssagh eck. 10T’ee follym, as feayn, as faasagh, as ta’n cree faitagh, as ta ny glioonyn bwoalley noi-ry-hoi, as ta guin ghyere ayns ooilley nyn meeghyn, as ta neeal y dorraghys er dy chooilley eddin. 11C’raad ta oayll ny lionyn, as chagh ny lionyn aegey? raad ren y lion, eer y chenn lion shooyl, as quallian y lion, as cha row eh ayns dooinney erbee dy chur aggle orroo. 12Ren y lion raipey nyn saie son e whuallianyn, as stroie son e lionyn bwoirryn, as lhieen eh yn chagh echey lesh cragh, as ny ooigyn echey lesh convayrtyn. 13Cur-my-ner, ta mish dt’oï, ta Chiarn ny flaunyssee dy ghra, nee’m lostey ny fainee eck ’syn aile, as nee yn cliwe stroie dty lionyn aegey, as nee’m giarey jeh dty spooilley jeh’n thalloo, as cha bee coraa dty haghteryn arragh er ny chlashtyn.