CAB. III

1Smerg da’n ard-valley folley! t’ee ooilley lane dy vreagyn as roosteyrys, ta’n griu dy kinjagh aynjee. 2Feiyr y chipp, as sheean freaney ny queeylyn, as lheimyragh ny cabbil, as leaystey ny fainee. 3Ta’n markiaght troggal seose chammah yn cliwe sollys, as y shleiy soilsheanagh, as ta ymmodee merriu, as earroo mooar dy chirp marroo, as ta ny merriu oc gyn earroo: t’ad tuittym harrish ny kirp oc. 4Kyndagh rish mooadys maarderys yn streebagh aalin, buitch vooar ny buitchyn, ta creck ashoonyn lesh e maarderys, as lughtyn-thie liorish ny oalyssyn eck. 5Cur-my-ner ta mish dt’oï, ta Chiarn ny flaunyssee dy ghra, as bee dty rumbyllyn troggit er dty eddin, as jeeagh-yms da ny ashoonyn dty nearey, as da ny reeriaghtyn dty scammylt. 6As tilg-yms ort dy chooilley vonney dy vroïd, as bee oo dty red dwoaiagh, as soie-yms oo son shilley dy ghannidys. 7As hig eh gy-kione, dy jean adsyn ooilley ta jeeaghyn ort chea voïd, as gra, Ta Nineveh er ny choyrt naardey, quoi nee dobberan er e son? c’raad yioym fir-gherjee dhyt? 8Vel uss ny share na No earrooagh, va soit mastey ny awinyn, va ny ushtaghyn mygeayrt-y-moee, va’n bulwark eck er oirr ny marrey, as va’n keayn son voalley jee? 9Va Ethiopia as Egypt y niart eck, as ve erskyn-towse, va Put as Lubim dty ir-choonee. 10Ny-yeih hug ad lhieu ee ersooyl, hie ee ersooyl ayns cappeeys: va’n chloan veggey eck myrgeddin bransit ec kione dagh straïd: as ren ad tilgey lottyn son ny deiney ooasle eck, as va ooilley ny ard-gheiney eck kianlt ayns geulaghyn. 11Bee uss myrgeddin er-meshtey: hed oo er-folliaght, nee oo myrgeddin shirrey cooney kyndagh rish y noid. 12Bee ooilley dty chashtallyn lajer goll-rish ny biljyn-figgagh as y chied-vess appee: my vees ad agh craait, tuittee ad eer ayns beeal yn eeder. 13Cur-my-ner, cha vel dty phobble cheu-sthie jeed agh mraane: bee giattyn dty heer dy lhean foshlit gys dty noidyn, nee yn aile stroie dty chagliaghyn. 14Tayrn uss ushtey son y chennid, niartee dty chashtallyn: immee ayns cray, as stamp y morter, niartee yn aiee-vreek. 15Ayns shen nee’n aile stroie oo: bee oo er dty yiarey jeh lesh y chliwe, nee eh gee oo seose myr y veishteig-vergagh: ga dy vel oo ymmodee myr ny beishteigyn-mergagh, cha chiu as ny locustyn. 16Ta dty varchanyn earrooagh myr rollageyn yn aer, ta’n veishteig-vergagh stroie as getlagh roish. 17Ta dty gheiney reeoil myr ny locustyn, as dty chaptanyn myr ny lheimeyderyn mooarey faiyr ta campal fo ny cleiyee ayns fynneraght y laa, agh tra ta’n ghrian girree t’ad getlagh ersooyl, as cha vel fys cre’n erree ta cheet orroo. 18Ta dty vochillyn saveenagh, O ree Assyria: nee dty gheiney ooasle cadley ayns y joan: ta dty phobble skeaylt er ny sleityn, as cha vel dooinney erbee dy haglym ad. 19Cha vel saase cour dty lhott: s’dewil ta dty ghuin: nee ooilley ta clashtyn y skeeal jeed bwoalley nyn massyn harryd; son quoi er nagh vel oo keayrt ny keayrt ennagh er n’yannoo tranlaase?