CAB. I

1Goan Nehemiah mac Hachaliah. As haink eh gy-kione ayns mee Chisleu, ayns y feedoo vleïn, myr va mee ayns Shushan ’sy phlaase, 2Dy daink Hanani fer jeh my vraaraghyn, eh-hene, as deiney elley dy Yudah mârish, as vrie mee jeu mychione ny Hewnyn va faagit as er-mayrn jeh’n chappeeys, as mychione Jerusalem. 3As dooyrt ad rhym, Ta’n sluight t’er-mayrn jeh’n chappeeys ’sy rheam ayns seaghyn trome, as ayns faghid: ta voalley Yerusalem myrgeddin brisht sheese, as ny giattyn eck losht lesh aile.

4As haink eh gy-kione, tra cheayll mee ny goan shoh, dy hoie mee sheese, as ren mee keayney as dobberan dy trimshagh son ymmodee laghyn, as hrosht mee, as ghow mee padjer gys Jee niau, 5As dooyrt mee, Ta mee guee ort, O Hiarn Yee t’ayns niau, yn Jee mooar as atchimagh, ta cooilleeney conaant as myghin ny chour ocsyn ta graihagh er, as freayll e annaghyn. 6Lhig da dty chleaysh nish geaishtagh, as dty hooillyn ’ve foshlit, dy vod oo clashtyn padjer dty harvaant, ta mee goaill kiongoyrt rhyt nish, laa as oie, ayns lieh cloan Israel dty harvaantyn, goaill-rish peccaghyn cloan Israel, ta shin er n’yannoo dt’oï: ta chammah mish as thie m’ayrey er n’yannoo peccah. 7Ta shin er ghellal feer vee-viallagh dt’oï, as cha vel shin er vreaylley ny annaghyn, ny slattyssyn, as ny briwnyssyn doardee oo liorish dty harvaant Moses. 8Cooinee, ta mee guee ort, er y goo doardee oo dty harvaant Moses gra, My vrishys shiu my leighyn, neem’s shiu y skeayley mastey ny ashoonyn: 9Agh my nee shiu chyndaa hym’s, as freayll my annaghyn, as cooilleeney ad, ga dy beagh paart j’iu eiyrit magh gys ardjyn sodjey magh y theihll, foast neem’s ad y haglym veih shen, as ver-ym lhiam ad gys yn ynnyd ta mee er reih, dy hoiaghey m’ennym ayn. 10Nish ad shoh dty harvaantyn, as dty phobble, t’ou er livrey liorish dty phooar niartal, as lesh dty laue lajer. 11O Hiarn, ta mee guee ort, lhig da dty chleaysh nish geaishtagh rish padjer dty harvaant, as rish padjer dty harvaantyn, ta aggindagh dy ghoaill aggle roish dty ennym: as cur dty vannaght, ta mee guee ort, yn laa shoh, lesh dty harvaant, as giall da foayr ayns shilley yn dooinney shoh. Son va mish shirveishagh cappan y ree.