CAB. XIII

1Er y laa shen lhaih ad ayns lioar Voses, ayns clashtyn y pobble, as ayn hooar ad scruit, nagh row yn Ammonite ny’n Moabite dy ve goit stiagh mastey pobble Yee, son dy bragh; 2Er-yn-oyr nagh daink ad quail cloan Israel lesh arran as ushtey, agh ren ad failley Balaam nyn ’oï, dy ghwee mollaght orroo: ga dy hyndaa Jee yn mollaght gys bannaght. 3Nish haink eh gy-kione, lurg daue v’er chlashtyn y leigh, dy ren ad ooilley’n sluight joarree y scarrey veih Israel.

4Son roish shoh, va Eliashib yn saggyrt, er va currym shamyryn-tashtee thie’n Jee ain, caardys da Tobiah. 5As hoie eh magh er e hon shamyr stoamey, raad bollagh ad stoyral ny ourallyn-arran, yn frankincense, as ny siyn, as jaghee yn arroo, yn feeyn noa, as yn ooil (va kiarit cour ny Leviteyn, as ny fir-chiaullee, as da porteryn ny giattyn) as chebballyn ny saggyrtyn. 6Agh rish ooilley’n traa shoh, cha row mish ec Jerusalem: son ayns y nah vleïn jeig as feed jeh Artaxerxes ree Vabylon haink mish gys y ree, as lurg earish hooar mee kied veih’n ree. 7As tra haink mee gys Jerusalem, hooar mee toiggal jeh’n olk va Eliashib er n’yannoo ayns cooish Tobiah, ayns soiaghey magh shamyr er e hon ayns cooyrtyn thie Yee. 8As ghow mee feer olk rish; shen-y-fa hilg mee magh ooilley stoo-thie Tobiah ass y chiamyr. 9Eisht doardee mee, as ghlen ad ny shamyryn: as ayndoo hug mee reesht siyn thie Yee, marish yn oural-arran, as y frankincense.

10As hoig mee nagh row lowance ny Leviteyn er ny choyrt daue; son va ny Leviteyn as ny fir-chiaullee, va ’sy chirveish, er-chea dy chooilley ghooinney gys e chummal hene er y cheer. 11Eisht hug mee oghsan da ny fir-reill, as dooyrt mee, Cre’n-fa ta thie Yee treigit? As hooar mee ad cooidjagh reesht, as ren mee ad y hoiaghey ayns nyn oik. 12Eisht hug ooilley Judah lhieu jaghee yn arroo, as y feeyn noa, as yn ooil gys ny thieyn-stoyr. 13As hoie mee stiurtyn harrish ny thieyn-stoyr, Shelemiah yn saggyrt, as Zadok yn scrudeyr, as jeh ny Leviteyn, Pedaiah: as by-niessey dauesyn va Hanan mac Zaccur, mac Vattaniah: son v’ad coontit dy ve treishteilagh, as va’n oik oc dy rheynn er nyn mraaraghyn. 14Cooinee orrym, O my Yee, mychione shoh, as ny chur ass dty hilley ny obbraghyn mie ta mee er n’yannoo son thie my Yee, as son y chirveish echey.

15As ayns ny laghyn shen, honnick mee ayns Judah sleih stampey pressyn-feeyney er y doonaght, as chur lhieu bunneeyn, as laadey assylyn; as myrgeddin cur lhieu feeyn, berrishyn-feeyney, as figgyn, as dy chooilley vonney dy erraghyn gys Jerusalem, er y doonaght: as dymmyrk mee feanish nyn ’oï, gyn arragh dy chreck cooid-veaghee er y laa shen. 16Va deiney veih Tyre cummal ayn myrgeddin hug lhieu eeast, as dy chooilley vonney dy chooid, as chreck ad er y doonaght, rish cloan Yudah, as ayns Jerusalem. 17Eisht vaggyr mee er ard-gheiney Yudah, as dooyrt mee roo, Cre’n olk shoh ta shiu dy yannoo, dy vel shiu brishey’n doonaght? 18Nagh nee shoh myr ren nyn ayraghyn, as nagh dug y Jee ain lesh ooilley’n olk shoh orrin, as er yn ard-valley shoh? ny-yeih, ta shiuish tayrn lhieu kerraghey smoo er Israel, liorish brishey’n doonaght. 19As haink eh gy-kione, tra ve toshiaght dy aase dorraghey ec giattyn Yerusalem roish y doonaght, doardee mee ny giattyn dy ve dooint, as nagh beagh ad foshlit, derrey veagh y doonaght harrish: as hoie mee paart jeh my harvaantyn ec ny giattyn, nagh beagh errey erbee er ny choyrt lesh stiagh er y doonaght. 20Myr shen, va ny marchanyn, as quoi-erbee va cooid oc dy chreck êginit dy ghoaill aaght cheu-mooie jeh Jerusalem, keayrt ny jees. 21Eisht vaggyr mee orroo, as dooyrt mee roo, Cre’n-fa ta shiu goaill aaght mysh y voalley? my nee shiu shen arragh, goym’s kiarail j’iu. Maghey shen, cha daink ad arragh er y doonaght. 22As doardee mee ny Leviteyn, dy heet ayns coamrey glen, son arrey ny giattyn, dy voddagh yn doonaght ve freilt casherick. Cooinee orrym, O my Yee, mychione shoh myrgeddin, as ymmyrk lhiam cordail rish mooadys dty vyghin.

23Ayns ny laghyn shen myrgeddin, honnick mee paart jeh ny Hewnyn v’er phoosey mraane Ashdod, Ammon, as Moab: 24As va lieh jeh glare y chloan oc glare Ashdod, as cha row glare ny Hewnyn oc, agh cordail rish glare dagh pobble. 25As hass mee seose nyn ’oï, as hug mee oghsan daue, as doardee mee paart jeu dy ve er nyn mwoalley, as y folt dy ve goit jeu, as hug mee orroo breearrey liorish Jee, gra, Cha der shiu ny inneenyn euish da ny mec ocsyn, ny goaill ny inneenyn oc da ny mec euish, ny diu hene. 26Nagh ren Solomon ree Israel peccah liorish ny reddyn shoh? ga, mast’ ymmodee ashoonyn cha row ree goll-rishyn, va graih ec e Yee er, as ren Jee eh ny ree harrish Israel: ny-yeih, eer eshyn ren mraane joarree y chleayney gys peccah. 27Jean mayd eisht lhiggey lhieuish, ayns ooilley’n olk vooar shoh, dy vrishey magh noi’n Jee ain, liorish poosey mraane joarree? 28As va fer jeh mec Joiada, mac Eliashib yn ard-saggyrt, cleuin Sanballat yn Horonite: shen-y-fa deiyr mee voym eh. 29Cooinee orroo, O my Yee, er-yn-oyr dy vel ad er neu-chasherickey oik y taggyrtys, as conaant y taggyrtys, as ny Leviteyn. 30Myr shoh, ren mee ad y scarrey veih dy chooilley yoarree, as doardee mee coorseyn ny saggyrtyn, as ny Leviteyn, dagh fer gys e oik; 31As dy ghoaill kiarail son yn oural-fuygh ec earishyn pointit, as son ny chied-vessyn. Cooinee orrym, O my Yee, son mie.