CAB. II

1As haink eh gy-kione ayns mee Nisan, ayns y feedoo vleïn jeh Artaxerxes y ree, dy row feeyn kiongoyrt rish: as ghow mish y feeyn, as hug mee eh da’n ree; nish cha row my chliaghtey dy ve trimshagh ayns e enish. 2Er shoh, dooyrt y ree rhym, Cre’n-oyr ta lheid y drogh yien ort, fakin nagh vel oo ching? cha vel shoh monney agh trimshey cree. Eisht va mee dy jarroo ayns aggle. 3As dooyrt mee rish y ree, Dy row yn ree foddey beayn; kys oddym agh ve trimshagh, choud as ta’n ard-valley, ynnyd oanluckee my ayraghyn, ny lhie follym-faase, as ny giattyn eck stroit lesh aile? 4Eisht dooyrt y ree rhym, Cre ta dty yeearree? Er shoh ren mee my phadjer gys Jee niau. 5As dooyrt mee rish y ree, My s’gooidsave lesh y ree, as my ta dty harvaant er gheddyn foayr ayns dty hilley dy der oo mish gys Judah, gys ard-valley oanluckee my ayraghyn, dy voddym eh y hroggal. 6As dooyrt y ree rhym, (yn ven-reïn ny soie liorish) Caïd vees oo er dty yurnah? as cuin hig oo reesht? Eisht ve aigney yn ree dy choyrt kied dou, as ren mee traa rish. 7Dooyrt mee, ny-sodjey, rish y ree, My s’gooidsave lesh y ree, lhig da screeunyn v’er ny choyrt dooys gys ny kiannoortyn cheu elley jeh’n awin, dy choyrt mee er my yurnah, derrey rosh-ym gys Judah; 8As screeuyn gys Asaph forrester y ree, dy choyrt dou fuygh, dy yannoo postyn son giattyn cooyrt y chiamble, as son voalley yn ard-valley, as son y thie hem stiagh ayn. As my yeearree hug y ree dou, myr va laue vie my Yee mârym.

9Eisht haink mee gys ny kiannoortyn cheu elley jeh’n awin, as livrey mee daue screeunyn y ree. Nish va’n ree er choyrt captanyn e heshaght-chaggee, as markee mârym. 10Tra cheayll Sanballat yn Horonite, as Tobiah sharvaant yn Ammonite jeh shoh, v’ad seaghnit erskyn towse, dy row dooinney er jeet dy chur foays cloan Israel er y hoshiaght. 11Myr shen haink mee gys Jerusalem, as va mee ayns shen three laa.

12As dirree mee ’syn oie, mish as ghaa ny three dy gheiney mârym, chamoo dinsh mee da dooinney erbee, cre va my Yee er choyrt ayns my chree dy yannoo ec Jerusalem; chamoo va baagh erbee mârym, agh y baagh va mee markiagh er. 13As hie mee magh ’syn oie, liorish giat ny glionney, eer roish chibbyr y dragon, as gys giat yn eoylley: as ghow mee baght jeh voallaghyn Yerusalem va brisht sheese, as ny giattyn eck va losht lesh aile. 14Eisht hie mee er my hoshiaght gys giat y farrane, as gys loghan y ree; agh cha row raad da’n baagh va foym dy hayrtyn. 15Eisht hie mee seose ’syn oie rish y trooan, as yeeagh mee rish y voalley, as haink mee back, as hie mee stiagh er giat ny glionney, as myr shen hyndaa mee reesht. 16As cha row fys ec ny fir-reill c’raad hie mee, ny cre ren mee, chamoo va mee foast er n’insh da ny Hewnyn, ny da ny saggyrtyn, ny da ny ard-gheiney, ny da ny fir-reill, ny da’n chooid elley va laue oc ’syn obbyr.

17Eisht dooyrt mee roo, Ta shiu fakin y seaghyn ta shin ayn, kys ta Jerusalem lhie ny faasagh, as ny giattyn eck losht lesh aile; tar-jee, as lhig dooin troggal seose voalley Yerusalem, nagh bee mayd ny-sodjey son faghid. 18Eisht dinsh mee daue jeh laue vie my Yee, va mârym, as myrgeddin ny goan va’n ree er loayrt rhym. As dooyrt ad, Irree-jee as lhig dooin troggal. Er shoh ren ad niartaghey ny laueyn oc, son yn obbyr vie shoh. 19Agh tra cheayll Sanballat yn Horonite as Tobiah sharvaant yn Ammonite, as Gesham yn Arabian jeh shoh, hie ad dy chraidey mooin, as hoie ad beg j’in, as va shin ayns faghid, as dooyrt ad, Cre shoh ta shiu mysh? vel shiu son girree-magh noi’n ree? 20Eisht dreggyr mee ad, as dooyrt mee roo, Nee Jee t’ayns niau shin y vishaghey; shen-y-fa nee shinyn e harvaantyn troggal orrin as buildal, agh cha vel euish ayrn, ny cairys, ny imraa ayns Jerusalem.