CAB. III

1Eisht dirree Eliashib yn ard-saggyrt seose marish e vraaraghyn ny saggyrtyn, as hrog ad giat ny geyrragh, ren ad eh y chasherickey, as hoie ad seose ny dorryssyn echey; eer veih toor Veah ren ad eh y chasherickey, gys toor Hananeel. 2As hrog deiney Yericho yn ayrn by-niessey dasyn; as hrog Zaccur mac Imri yn ayrn by-niessey dauesyn. 3As giat ny eeastee hrog mec Hassenaah, ren myrgeddin layal ny beamyn, as soiaghey seose ny coollaghyn, lesh ny glassyn, as ny boltyn. 4As by-niessey dauesyn hrog mac Urijah, mac Koz: as lioroo shoh dobbree Meshullam mac Berechiah, mac Meshezabeel: as by-niessey daue shoh dobbree Zadok mac Baana. 5As hrog ny Tekoiteyn yn ayrn by-niessey dauesyn; agh cha dug ny ard-gheiney oc nyn mwannal gys obbyr y Chiarn. 6As y chenn yiat hrog Jehoiada mac Paseah, as Meshullam mac Besodeiah: ren ad layal ny beamyn echey, as hoie ad seose ny dorryssyn, ny coollaghyn, as ny boltyn. 7As by-niessey dauesyn hrog Melatiah yn Gibeonite, as Jadon yn Meronothite, deiney Ghibeon as Mizpah, gys thie’n chiannoort er cheu shoh jeh’n awin. 8As er-gerrey dasyn hrog Uzziel mac Harhaiah, yn gaaue-airh; as by-niessey dasyn hrog Hananiah fer jeh ny pothecareeyn; as niartee ad Jerusalem gys y voalley lhean. 9Yn ayrn by-niessey dauesyn hrog Rephaiah mac Hur, fir-reill harrish y derrey ayrn jeh Jerusalem. 10As by-niessey dauesyn hrog Jedaiah mac Harumaph, eer jeeragh er e hie, as by-niessey dasyn lhiassee Hattush mac Hashabniah. 11Cherree Malchijah mac Harim, as Hashub mac Pahath-moab, yn ayrn elley, as toor ny coirraghyn. 12As by-niessey dasyn cherree Shallum mac Halohesh, fer-reill yn ayrn elley jeh Jerusalem, eh-hene as e inneenyn. 13Giat ny glionney cherree Hanan as cummaltee Zanoah: hrog ad eh, as hoie ad seose ny dorryssyn echey, lesh ny glassyn, as ny boltyn, as thousane cubit er y voalley gys giat yn eoylley. 14Ren Malchiah mac Rechab, fer-reill er ayrn jeh Beth-haccerem giat yn eoylley y choamrey: hrog eh eh, as hoie eh seose ny dorryssyn, ny glassyn, as ny boltyn echey. 15Agh giat y farrane ren Shallum, mac Col-hozeh, fer-reill er ayrn jeh Mizpah y choamrey; hrog eh eh, as hoie eh seose ny dorryssyn, ny glassyn, as ny boltyn echey, as voalley loghan Siloah, liorish garey’n ree, as gys ny greeshyn ta goll sheese veih ard-valley Ghavid. 16Ny lurg-syn ren Nehemiah mac Azbuk, fer-reill yn derrey ayrn jeh Beth-zur, coamrey, gys yn ynnyd er-gerrey da ynnydyn oanluckee Ghavid, as gys y loghan va jeant, as gys thie yn ghard lajer. 17Ny lurg-syn choamree ny Leviteyn, Rehum mac Bani: as yn ayrn by-niessey dasyn ren Hashabiah, fer-reill harrish y derrey lieh jeh Keilah, coamrey, ayns yn ayrn echeysyn. 18Ny lurg-syn choamree nyn mraaraghyn, Bavai mac Henadad, fer-reill harrish y derrey lieh jeh Keilah. 19As yn ayrn by-niessey dasyn ren Ezer mac Yeshua, fer-reill Mizpah, peesh elley y choamrey myr t’ou goll seose lesh thie-tashtee ny greinyn-caggee, ec corneil y voalley. 20Ny lurg-syn ghow Baruch mac Zabbai er dy niartaghey ayrn elley, veih corneil y voalley gys dorrys thie Eliashib yn ard-saggyrt. 21Ny lurg-syn choamree Meremoth, mac Urijah, mac Koz, peesh elley, veih dorrys thie Eliashib, eer gys kione thie Eliashib. 22As ny lurg-syn choamree ny saggyrtyn, deiney yn cheer-rea. 23Ny lurg-syn choamree Benjamin, as Hashub, choud as jeeragh er y thie oc: nyn lurg choamree Azariah mac Maaseiah, mac Ananiah liorish e hie. 24Ny lurg-syn choamree Binnui mac Henadad ayrn elley, veih thie Azariah, gys chyndaa yn voalley, eer gys y chorneil. 25Palai mac Uzai, veih chyndaa yn voalley, as y toor, ta magh veih thie ard y ree, va liorish cooyrt y phryssoon: ny lurg-syn Pedaiah mac Parosh. 26As ren ny Nethinimee va cummal ayns Ophel, coamrey gys yn ynnyd va jeeragh er y giat-ushtey lesh y shiar, as y toor cheu-mooie jeh. 27Ny lurg oc shoh, choamree ny Tekoiteyn ayrn elley, harrish noi’n toor vooar ta lhie magh, eer gys voalley Ophel. 28Veih erskyn giat ny gabbyl choamree ny saggyrtyn, dagh fer jeeragh er e hie hene. 29Ny lurg oc shoh, choamree Zadok mac Immer jeeragh er e hie: ny lurg-syn choamree Shemaiah mac Shechaniah, er va currym y yiat har. 30Ny lurg-syn choamree Hananiah, mac Shelemiah, as Hanun mac sheyoo Zalaph ayrn elley: ny lurg-syn choamree Meshullam mac Berechiah jeeragh er e hiamyr. 31Ny lurg-syn choamree Malchiah mac y ghaaue-airh, gys ynnyd ny Nethinimee, as ny marchanyn jeeragh er giat Miphkad, as gys shamyr y chorneil. 32As veih’n chorneil shen gys giat ny geyrragh, choamree ny gaauenyn-airh, as ny marchanyn.