CAB. IV

1Agh haink eh gy-kione, tra cheayll Sanballat, dy row shin troggal y voalley, dy row eh jymmoosagh, as jiarg-chorree, as cha ren eh agh craid mysh ny Hewnyn. 2As loayr eh roish e vraaraghyn, as sheshaght-caggee Samaria, as dooyrt eh, Cre ta ny Hewnyn kercheenagh shoh kiarail dy yannoo? vel ad son fendeil ad-hene? jean ad ourallyn y hebbal? der ad kione er yn obbyr ayns laa? vel ad son doostey reesht ny claghyn ta losht, ass ny carnaneyn dy holtanyn losht? 3Nish, va Tobiah yn Ammonite ny hassoo liorish, as dooyrt eh, My hed agh shynnagh seose er y voalley chloaie shoh, t’ad dy hroggal tuittee eh fo. 4Clasht, O nyn Yee, son s’beg t’er ny hoiagh j’in; as chyndaa yn oltooan oc er nyn ghing hene, as livrey ad son spooilley ayns cheer y chappeeys: 5Ny coodee yn neu-chairys oc, as ny lhig da’n peccah oc ve er ny yarrood kiongoyrt rhyt: son t’ad er n’yannoo craid jeh nyn obbyr kiongoyrt rhyt. 6Myr shoh hrog shin y voalley: as va’n voalley ooilley mygeayrt jeant mie, gys lieh yn yrjid: son va’n pobble aggindagh gys yn obbyr.

7Agh haink eh gy-kione, tra cheayll Sanballat as Tobiah, as ny Arabianee, as ny Ammoniteyn, as ny Ashdoditeyn, dy row voallaghyn Yerusalem goaill yrjid, as ny brishaghyn v’ayndoo jeant seose, dy row ad lane dy eulys. 8As hug ad ooilley nyn goyrle dy cheilley, dy chaggey noi Jerusalem, as dy lhiettal yn obbyr 9Agh, ren shin nyn badjer gys y Jee ain, as hoie shin watch nyn ’oï oie as laa, kyndagh roo. 10As dooyrt Judah, Ta niart ny labree er vailleil fo’n errey, as ta ymmodee smooirlagh ayn, myr shen nagh jarg mayd yn voalley y hroggal. 11As dooyrt nyn noidyn, Cha bee fys oc, chamoo nee ad fakin derrey hig mayd ’sy vean oc, as stroie ad, as cur nyn obbyr naardey. 12As haink eh gy-kione, tra va ny Hewnyn, va cummal lioroo, er jeet, as dy mennick er n’insh dooin, Veih dy chooilley ard hyndaa-ys shiu, tuittee ad shoh erriu.

13Eisht ren mee soiaghey ayns ny ynnydyn s’inshley cooyl y voalley, as er ny ynnydyn syrjey, eer hoie mee yn pobble, rere dagh lught-thie, lesh nyn gliwenyn, shleiyghyn, as bowaghyn. 14As yeeagh mee, as hrog mee orrym, as dooyrt mee rish ny ard-gheiney, as ny fir-reill, as rish y chooid elley jeh’n pobble, Ny gow-jee aggle roue: cooinee-jee er y Chiarn, ta ard as atchimagh, as jean-jee caggey son nyn mraaraghyn, nyn mec, as nyn inneenyn, ny mraane, as ny thieyn eu. 15As haink eh gy-kione, tra cheayll nyn noidyn dy row fys ain er, as dy row Jee er choyrt lesh gys veg yn choyrle oc, dy hyndaa shin ooilley reesht gys y voalley, dagh unnane gys e obbyr. 16As haink eh gy-kione, maghey shen, tra ren y derrey lieh jeh my gheiney jannoo er yn obbyr, as yn lieh elley aarloo son caggey, lesh shleiyghyn, scapeyn, bowaghyn, as eilley-broghil; as va ooilley fir-reill thie Yudah er nyn gooyl. 17Ny masoonee v’er y voalley, as shirveishee yn obbyr, as adsyn va troggal ny erraghyn orroo, ren dagh dooinney gobbraghey lesh e gherrey laue, as greïe-caggee ec e laue elley. 18Son va ec dagh masoonagh cliwe rish e lhiattee, as shoh myr hie ad er; as va’n trumpeter liorym’s.

19As dooyrt mee rish ny ard-gheiney, as ny fir-reill, as rish y chooid elley jeh’n pobble, Ta’n obbyr mooar as lhean, as ta shin skeaylt er y voalley, foddey veih-my-cheilley. 20Raad erbee dy glinnys shiu feiyr y trumpet, tayrn-jee cooidjagh hooin gys shen, nee’n Chiarn Jee ain caggey er nyn son. 21Shoh myr va shin doccaragh ayns yn obbyr; as va’n derrey lieh jeu fo shleiyghyn, veih’n vadran gys y cho-leayrtys. 22Myrgeddin, ec y traa cheddin dooyrt mee rish y pobble, Lhig da dagh unnane marish e harvaant freayll cheu-sthie jeh Jerusalem, dy vod ad ve son gard dooin ’syn oie, as laboragh ’sy laa. 23Myr shen, cha ren mish, ny my vraaraghyn, ny my harvaantyn, ny deiney yn ghard va mârym nyn eaddagh y choyrt j’in, er-lhimmey dy niee ad.