CAB. V

1As hug ny deiney, as ny mraane oc stiagh plaiynt trome noi nyn mraaraghyn ny Hewnyn. 2Son dooyrt paart jeu. Ta shin hene, nyn mec, as nyn inneenyn ymmodee; ta shin, er-y-fa shen êginit dy choonrey ad son arroo, dy vod mayd gee as ve bio. 3Dooyrt paart myrgeddin, Ta shin er choyrt yn thalloo ain, ny garaghyn-feeyney, as ny thieyn ain gioal, dy chionnaghey arroo, kyndagh rish y ghortey. 4Dooyrt feallagh elley neesht, Ta shin er eeasagh argid son keesh y ree, as shen er nyn magheryn, as nyn garaghyn-feeyney. 5Ga dy vel yn eill ain myr feill nyn mraaraghyn, yn chloan ain myr y chloan ocsyn, as cur-my-ner, ta shin cur lhien ny mec as ny inneenyn ain fo bondiaght, dy ve sharvaantyn; as ta paart jeh ny inneenyn ain hannah fo bondiaght, chamoo te ayns nyn booar dy eaysley ad: son ta’n thalloo, as ny garaghyn-feeyney ain ec deiney elley.

6As ghow mee feer olk rish, tra cheayll mee yn plaiynt oc, as ny goan shoh. 7Eisht smooinee mee rhym pene, as hug mee oghsan da ny ard-gheiney, as ny fir-reill, as dooyrt mee roo, Ta shiu troggal use neu-lowal, dagh dooinney jeh e vraar. As ghreinnee mee yn chaglym mooar dy leih nyn ’oï. 8As dooyrt mee roo, Ta shinyn, rere nyn booar, er veaysley nyn mraaraghyn ny Hewnyn, va creckit rish ny ashoonee: as jean shiuish eer nyn mraaraghyn y chreck dooinyn dy eaysley ad? Er shoh v’ad nyn dhost, as cha row fockle oc dy ghra. 9Dooyrt mee ny-sodjey, Cha vel shiu jannoo dy mie, nagh lhisagh shiu gimmeeaght ayns aggle yn Jee ain, kyndagh rish oltooan ny ashoonee nyn noidyn? 10Ta mish myrgeddin, as my vraaraghyn, as my vooinjer er lhiggey voïn argid as arroo gyn use: ta mee guee erriu, lhig dooin lhiggey sheese yn use shoh. 11Cur-jee daue reesht, ta mee guee erriu, er yn eer laa shoh, yn thalloo oc, ny garaghyn-feeyney, ny garaghyn-olive, as ny thieyn oc: myrgeddin yn cheeadoo ayrn jeh’n argid, as jeh’n arroo, yn feeyn, as yn ooil ta shiu dy hroggal jeu. 12Eisht dooyrt ad, Ver mayd daue ad, as cha drog mayd nhee erbee jeu; nee mayd myr t’ou dy ghra; Eisht deïe mee er ny saggyrtyn, as hug mee ad fo breearrey, dy jinnagh ad cordail rish y yialdyn shoh. 13Eisht chrie mee my aght, as dooyrt mee, Er yn aght cheddin, dy grie Jee dy chooilley ghooinney veih e hie, as veih e chooid, nagh vel cooilleeney shoh e yialdyn; dy bee eh eer myr shoh criht magh as folmit. As dreggyr ooilley’n pobble, Amen, as hug ad moylley da’n Chiarn. As ren y pobble cordail rish y yialdyn shoh.

14Nish, er-dyn traa va mee pointit dy ve my chiannoort orroo ayns cheer Yudah, veih’n feedoo vleïn, eer gys y nah vleïn yeig as feed jeh reill Artaxerxes y ree, ta shen, daa vleïn jeig, cha vel mish, ny my vraaraghyn, er n’ee lowance y chiannoort. 15Agh ny kiannoortyn va roym, v’ad errey trome er y pobble, as er hroggal jeu arran as feeyn, marish da-eed shekel dy argid, ren eer ny sharvaantyn oc tranlaase er y theay: agh cha ren mish myr shen, son dy row mee fo aggle Yee. 16Ren mee myrgeddin tannaghtyn kinjagh ayns obbyr y voalley shoh, chamoo chionnee shin veg y thalloo: as va ooilley my vooinjer er nyn jaglym cooidjagh gys yn obbyr. 17Ny-sodjey, va ec my voayrd shiaght-feed as jeih jeh ny Hewnyn as fir-reill, cheu-mooie jeusyn haink hooin, veih ny ashoonee mygeayrt-y-mooin. 18Nish shen v’er ny aarlaghey er my hon gagh laa, va un dow, as shey reih kirree; va eeanlee myrgeddin er nyn aarlaghey er my hon, as keayrt ayns jeih laa, stoyr jeh dy chooilley horch dy feeyn: agh, son ooilley shoh, cha hrog mee lowance y chiannoort, er-yn-oyr dy row yn errey trome er y pobble. 19Smooinee orrym, my Yee, son mie, cordail rish ooilley ny ta mee er n’yannoo son y pobble shoh.