CAB. VI

1Nish haink eh gy-kione, tra cheayll Sanballat, as Tobiah, as Gesham yn Arabian, as y chooid elley jeh nyn noidyn, dy row mee er hroggal y voalley, nagh row brishey erbee faagit ayn, (ga ec y traa cheddin cha row mee er hoiaghey seose coollaghyn er ny giattyn). 2Dy dug Sanballat, as Geshem fys hym, gra, Tar, lhig dooin meeiteil cooidjagh ayns unnane jeh ny baljyn, ayns cheer-rea Ono; agh v’ad kiarail olk m’oï. 3As hug mee chaghteryn hucsyn, gra, Ta mee mysh obbyr vooar, myr shen nagh voddym cheet sheese hiu: cre’n-fa veagh yn obbyr ny haaue, choud as aag-ym’s eh, dy choyrt meeiteil diuish? 4Ny-yeih, hug ad y fys cheddin hym kiare keayrtyn; as hug mee yn ansoor cheddin daue. 5Eisht hug Sanballat e harvaant hym myrgeddin yn wheiggoo cheayrt, lesh screeuyn foshlit ayns e laue: 6Ayn va scruit; Te goo cadjin mastey ny ashoonee, as ta Gashmu lhiassaghey erriu, dy vel uss as ny Hewnyn kiarail dy irree-magh; son yn oyr shoh t’ou coamrey yn voalley, dy vod oo hene ve yn ree oc, myr ta’n goo goll jeed. 7As t’ou myrgeddin er phointeil phadeyryn dy ockley magh my-dty-chione ec Jerusalem, gra, Ta ree ayns Judah; as nish hig shoh gys clashtyn y ree. Tar nish er-y-fa shen, as lhig dooin cur nyn goyrle dy cheilley. 8Eisht hug mee fys huggey, gra, Cha vel fockle dy lheid as t’ou lhiassaghey, agh t’ou er hroggal yn goo shoh ass dty chree hene. 9Son v’ad ooilley smooinaghtyn dy chur shin fo aggle, gra, Bee ny laueyn oc er nyn lhaggaghey ’syn obbyr, nagh jed ad er nyn doshiaght. Nish, er-y-fa shen, O Yee, niartee my laueyn. 10Eisht hie mee gys thie Shemaiah, mac Delaiah, mac Mehetabel, dooinney croutagh; as dooyrt eh, Lhig dooin meeiteil cooidjagh ayns thie Yee, cheu-sthie jeh’n chiamble, as jannoo shickyr dorryssyn y chiamble: son hig ad dy dty varroo, eer ayns yn oie, hig ad dy ghoaill dty vioys. 11As dooyrt mee, Cre, lheid y dooinney as mish dy choyrt cooyl? quoi’n dooinney ’syn oik cheddin, ragh stiagh ’sy chiamble dy hauail e vioys? Cha jem stiagh ayn. 12As hug mee my-ner, nagh nee Jee ren y choyrt eh, agh dy row eh jeh hene er hroggal yn phadeyrys shoh m’oï: son va Tobiah as Sanballat er vailley eh. 13As son shoh v’eh failt dy m’y agglaghey, dy eiyrt er y choyrle aggairagh shoh, as oyr ’ve oc dy hroggal drogh ghoo jee’m, as dy my oltooaney. 14My Yee smooinee er Tobiah as Sanballat, cordail rish nyn obbraghyn, as er phadeyrys Noadiah, as y chooid elley jeh ny phadeyryn, bailliu m’y agglaghey.

15Myr shoh va’n voalley dy slane coamrit er y wheiggoo laa as feed jeh mee Elul, ayns daa laa jeig as da-eed. 16As haink eh gy-kione, tra cheayll ooilley nyn noidyn jeh shoh, as tra honnick ny ashoonee va mygeayrt-y-mooin, kys hie shin er, chaill ad dy bollagh nyn gree: son hoig ad, dy row laue yn Jee ain ’syn obbyr shoh.

17Mysh y traa shen myrgeddin hie screeuyn er screeuyn eddyr mooaralee Yudah as Tobiah: 18Son va ymmodee ayns Judah ayns conaant rish, er-yn-oyr dy row eh cleuin Shechaniah mac Arah; as va e vac Johanan er phoosey inneen Meshullam, mac Berechiah. 19Myrgeddin loayr ad dy mie jeh kiongoyrt rhym, as hoilshee ad my ghoan’s dasyn; as hug Tobiah ny screeuyn shoh dy my agglaghey.