CAB. VIII

1As va ooilley’n pobble er nyn jaglym cooidjagh, myr un dooinney gys y traid va rish y giat-ushtey, as loayr ad rish Ezra yn scrudeyr, dy chur lesh lioar leigh Voses, va’n Chiarn er n’oardaghey da Israel. 2As hug Ezra yn saggyrt lesh y leigh kiongoyrt rish y cheshaght chammah dy gheiney as mraane, as ooilley ny va ec eash dy hoiggal, er y chied laa jeh’n chiaghtoo vee. 3As lhaih eh ayn, ’sy traid va liorish y yiat-ushtey, veih’n voghrey gys y vun-laa, gys ny deiney, as ny mraane, as lheid as va toiggal: as va ooilley’n pobble soit dy jeean er clashtyn lioar y leigh. 4As hass Ezra yn scrudeyr er pulpit fuygh v’ad er hroggal cour yn ymmyd: as liorishyn hass Mattithiah, as Shema, as Anaiah, as Urijah, as Hilkiah, as Maaseiah, er e laue yesh: as er e laue hoshtal, Pedaiah, as Mishael, as Malchiah, as Hashum, as Hashbadana, Zechariah, as Meshullam. 5As doshil Ezra yn lioar ayns shilley ooilley’n pobble (son v’eh erskyn ooilley’n pobble) as tra doshil eh ee, hass ooilley’n pobble seose. 6As vannee Ezra yn Chiarn yn ard Jee, as dreggyr ooilley’n pobble, Amen, Amen, troggal seose nyn laueyn: as chroym ad nyn ghing, as hug ad ooashley da’n Chiarn, lesh nyn eddin gys y thalloo. 7Ren Jeshua myrgeddin, as Bani, as Sherebiah, Jamin, Akkub, Shabbethai, Hodijah, Maaseiah, Kelita, Azariah, Jozabad, Hanan, Pelaiah, as ny Leviteyn toiggal y choyrt da’n pobble jeh’n leigh; as hass y pobble ayns nyn ynnyd hene. 8Myr shen lhaih ad ayns y lioar, ayns leigh Yee dy baghtal, as hug ad bun er, cur orroo toiggal ny va lhaiht.

9As Nehemiah, ta shen yn Tirshatha, as Ezra yn saggyrt yn scrudeyr, as ny Leviteyn dynsee yn pobble, dooyrt ad roo ooilley, Ta’n laa shoh casherick gys y Chiarn yn Jee eu, ny jean-jee dobberan ny keayney: son huitt ooilley yn pobble er keayney, tra cheayll ad goan y leigh. 10Eisht dooyrt eh roo, Immee-jee reue, ee-jee, as iu-jee jeh’n chooid share, as cur-jee ayrn hucsyn ta ayns feme: son ta’n laa shoh casherick gys y Chiarn: chamoo bee-jee trimshagh, son ta boggey’n Chiarn yn niart euish. 11Myr shoh ren ny Leviteyn yn pobble y gherjaghey, gra, Ny jean-jee keayney, son ta’n laa casherick, chamoo bee-jee seaghnit. 12As hie yn pobble rhymboo, dy ee, as dy iu, as dy hirveish ayrnyn er ny boghtyn, as dy yannoo gien mooar, er-yn-oyr dy hoig ad ny goan, v’er ny hoilshaghey daue.

13As er y nah laa va reiltee kynneeyn ooilley’n pobble er nyn jaglym cooidjagh, ny saggyrtyn as ny Leviteyn, gys Ezra yn scrudeyr, dy gheddyn ynsagh sodjey ayns goan y leigh. 14As hooar ad scruit ayns y leigh va’n Chiarn er n’oardaghey liorish Moses, dy row cloan Israel dy chummal ayns cabbaneyn banglaneagh, er feailley yn chiaghtoo vee. 15As dy lhisagh ad soilshaghey as fockley magh trooid ooilley ny ard-valjyn oc, as ayns Jerusalem, gra, Immee-jee magh gys y clieau, as cur-jee lhieu banglaneyn-olive, as banglaneyn-pine, as banglaneyn-myrtle, as banglaneyn-palm, as banglaneyn duillagagh, dy yannoo cabbaneyn, cordail rish y leigh.

16Myr shen hie yn pobble magh, as hug ad lhieu ad, as hrog ad daue hene cabbaneyn, dy chooilley ghooinney er mullagh e hie, as ayns ny cooyrtyn oc, as ayns cooyrtyn thie Yee, as ayns straid y yiat-ushtey, as ayns straid giat Ephraim. 17As ren y slane sheshaght jeusyn v’er jyndaa veih’n chappeeys, cabbaneyn banglaneagh, as hoie ad fo ny cabbaneyn; son veih laghyn Yeshua mac Nun, gys y laa shen, cha row cloan Israel er n’yannoo y lheid: as s’mooar va nyn moggey. 18Myrgeddin, laa lurg laa, veih’n chied laa gys y laa s’jerree, ren eh lhaih ayns lioar leigh Yee; as dreill ad yn feailley shiaght laa, as er y hoghtoo laa chum ad feailley casherick, cordail rish y cliaghtey.