CAB. X

1As loayr y Chiarn rish Moses, gra, 2Jean dhyt daa hrumpet argid; jeh un pheesh slane nee oo ad; dy vod oo ymmyd y yannoo jeu dy haglym y pobble cooidjagh, as son jurnah ny cabbaneyn. 3As tra nee ad sheidey lhieu, nee ooilley’n cheshaght chaglym ad hene cooidjagh hood’s, ec dorrys y chabbane-agglish. 4As my heidys ad agh lesh un trumpet, eisht nee ny princeyn, ta leeideilee thousaneyn Israel, chaglym ad hene hood’s. 5Tra ta shiu sheidey larm-caggee, eisht nee adsyn ta campal er y cheu-har scughey er nyn doshiaght. 6Tra ta shiu sheidey larm y nah cheayrt, eisht nee adsyn ta campal er y jiass, goll er nyn yurnah; nee ad sheidey larm son ny jurnaaghyn oc. 7Agh tra ta’n cheshaght dy ve er ny haglym dy cheilley; nee shiu sheidey, agh cha jean shiu sheidey larm-caggee. 8As nee mec Aaron y saggyrt sheidey lesh ny trumpetyn, as bee ad diu son oardagh son dy bragh, trooid ny sheelogheyn eu. 9As my hed shiu gys caggey ayns y cheer eu hene, noi’n noid ta jannoo tranlaase erriu, eisht nee shiu sheidey larm-caggee lesh ny trumpetyn; as nee’n Chiarn y Jee eu cooinaghtyn erriu, as bee shiu er nyn sauail veih nyn noidyn. 10Myrgeddin er laa’n ghennallys eu, as er ny laghyn feailley eu, as ayns toshiaght ny meeaghyn eu, nee shiu sheidey lesh ny trumpetyn harrish ny chebballyn-losht eu; as harrish ny ourallyn-shee eu; dy vod shoh ve diu son cooinaghtyn roish y Jee eu: Mish y Chiarn y Jee eu. 11As haink eh gy-kione er y feedoo laa jeh’n nah vee, ayns y nah vleïn, dy row’n bodjal er ny ghoaill seose jeh cabbane y chonaant. 12As ghow cloan Israel nyn yurnah magh ass faasagh Sinai; as hass y bodjal ayns faasagh Paran. 13As ghow ad toshiaght er nyn yurnah, cordail rish sarey’n Chiarn, liorish Moses. 14’Sy toshiaght hie cullee camp cloan Yudah, cordail rish ny sheshaghtyn-caggee oc: as harrish y cheshaght shoh va Nahshon mac Amminadab. 15As harrish sheshaght-caggee tribe cloan Issachar, va Nethaneel mac Zuar. 16As harrish sheshaght tribe cloan Zebulun, va Eliab mac Helon. 17As va’ n cabbane-agglish er ny ghoaill seose; as hie mec Ghershon, as mec Merari, er nyn doshiaght, gymmyrkey yn chabbane-agglish. 18As ren cullee champ Reuben scughey er y hoshiaght, cordail rish ny sheshaghtyn oc, as harrish yn cheshaght shoh va Elizur mac Shedeur. 19As harrish sheshaght-caggee tribe cloan Simeon, va Shelumiel mac Zurishaddai. 20As harrish sheshaght tribe cloan Ghad, va Eliasaph mac Deuel. 21As hie ny Kohathiteyn er nyn doshiaght, cur lhieu yn arg casherick; as ren y vooinjer elley soiaghey seose yn chabbane-agglish ry-hoi harragh ad.

22As hie cullee camp cloan Ephraim er y hoshiaght, cordail rish ny sheshaghtyn oc; as harrish y cheshaght shoh va Elishama mac Ammihud. 23As harrish sheshaght tribe cloan Vanasseh, va Gamaliel mac Pedahzur. 24As harrish sheshaght tribe cloan Venjamin, va Abidan mac Gideoni.

25As hie cullee camp cloan Dan er y hoshiaght, va er cooyl ooilley ny campyn, trooid ny sheshaghtyn oc: as harrish y cheshaght shoh va Ahiezer mac Amishaddai. 26As harrish sheshaght tribe cloan Asher, va Pagiel mac Ocran. 27As harrish camp tribe cloan Naphtali, va Ahira mac Enan. 28Shoh myr va jurnaaghyn cloan Israel, cordail rish ny sheshaghtyn-caggee oc, tra hie ad er nyn doshiaght.

29As dooyrt Moses rish Hobab, mac Raguel yn Midianite, ayr-’sy-leigh Voses, Ta shinyn er nyn yurnah gys yn ynnyd, mychione dooyrt y Chiarn, Ver-yms diuish eh: tar uss mârin, as bee mayd mie rhyt: son ta’n Chiarn er loayrt dy mie mychione Israel. 30As dooyrt eh rish, Cha voddym goll mêriu; agh hem roym gys my heer, as my chynney hene. 31As dooyrt eh rish, Ny faag shin, ta mee guee ort; son dy vel toiggal ayd’s kys ta shin dy champal ’syn aasagh, as dy vod uss ve dooinyn ayns ynnyd sooillyn. 32As bee eh myr shen, my she dt’aigney dy gholl mârin, dy jarroo shen myr vees eh, yn chenjallys nee’n Chiarn y hoilshaghey dooinyn, y lheid cheddin nee mayd er dty hon’s.

33As hie ad rhymboo veih slieau’n Chiarn jurnah three laa: as hie arg chonaant y Chiarn er y raad roue, ’sy jurnah oc dy hree laa, dy gheddyn magh daue ynnyd dy hannaghtyn ayn. 34As va bodjal y Chiarn harrystoo ’sy laa, tra hie ad magh ass y champ. 35As haink eh gy-kione tra scugh yn arg er y hoshiaght, dy dooyrt Moses, Irree seose, Hiarn, as lhig da dty noidyn ve er nyn skeayley; as lhig dauesyn ta dwoaie oc ort, chea kiongoyrt rhyt. 36As tra ve soit, dooyrt eh, Chyndaa, O Hiarn, gys ny ymmodee thousaneyn dy housaneyn Israel.