CAB. XI

1As tra ren y pobble tallagh, hug shoh jymmoose er y Chiarn: as ren y Chiarn clashtyn eh, as va e chorree er ny vrasnaghey, as ren aile y Chiarn lostey ny-vud oc, as stroie eh adsyn va ayns ny ayrnyn sodjey magh jeh’n champ. 2As ren y pobble gaccan gys Moses: as tra va Moses er ghoaill padjer gys y Chiarn, va’n aile er ny vooghey. 3As denmys eh yn ynnyd Taberah; er-yn-oyr dy ren aile veih’n Chiarn lostey ny-vud oc.

4As ren earrooyn elley jeh ny joarreeyn va ny mast’ oc gaase miandagh: as huitt cloan Israel myrgeddin er gaccan as keayney, as dooyrt ad, Quoi ver dooin feill dy ee. 5Cha vel shin er yarrood yn eeast v’ain son goaill ayns Egypt, ny cucumberyn, as ny melonyn, as y lhuss, as ny onionsyn, as y garleyd: 6Agh nish ta’n vioys ain shyrgaghey ersooyl; son cha vel monney ain, agh y manna shoh, roish nyn sooillyn. 7As va’n manna myr rass coriander, as yn cullyr echey myr bdellium: 8As hie’n pobble magh as haggil ad eh, as veihll ad eh ayns mwylljyn, ny vroo ad eh ayns mortar, as vroie ad eh ayns pannyn, as ren ad berreenyn jeh: as va’n blass echey myr blass ooil noa-jeant. 9As tra huitt y druight er y champ ’syn oie, ren y manna tuittym mârish.

10Eisht cheayll Moses y pobble keayney trooid ny lught-thieyn oc, dagh dooinney ayns dorrys e chabbane: as va corree’n Chiarn brasnit dy mooar: va Moses myrgeddin feer jymmoosagh. 11As dooyrt Moses rish y Chiarn, Cre’n-fa t’ou er chur seaghyn er dty harvaant? as cre’n-fa nagh vel mee er gheddyn foayr ayns dty hilley, dy vel oo cur errey ooilley’n pobble shoh orrym’s? 12Nee jeem’s ta ooilley’n pobble shoh er ny yientyn? nee mish yn ayr oc, dy jinnagh oo gra rhym, Cur lhiat ad ayns dty oghrish, (myr ta sheshey boandyr cur lesh y lhiannoo t’er y cheeagh) gys y cheer ren oo breearrey da nyn ayraghyn. 13Cre’n raad yioyms feill dy choyrt da ooilley’n pobble shoh? son t’ad gaccan hym’s, gra, Cur dooin feill dy ee. 14Cha voddyms gymmyrkey errey ooilley’n pobble shoh my-lomarcan, son dy vel eh ro hrome er my hon. 15As my t’ou myr shoh dellal rhym, marr mee, ta mee guee ort, ass y raad, my ta mee er gheddyn foayr ayns dty hilley; as nagh vaik-ym my hreihys hene.

16As dooyrt y Chiarn rish Moses, Reih magh dooys three-feed dooinney as jeih jeh shanstyr Israel, ta toiggal ayd jeu dy ve shanstyr y pobble, as fir-reill harrystoo; as cur lhiat ad gys y chabbane-agglish, dy vod ad shassoo ayns shen mayrt. 17As hig-yms neose as loayr-ym rhyt ayns shen; as nee’m goaill jeh’n spyrryd t’ort’s, as ver-ym eh orroo shen; as nee ad gymmyrkey errey yn pobble mayrt, nagh bee’n slane currym ort hene. 18As abbyr uss rish y pobble, Jean-jee shiu hene y chasherickey cour y laa mairagh, as yiow shiu feill dy ee (son ta shiu er cheayney ayns clashtyn y Chiarn, gra, Quoi ver feill dooin dy ee? son va shin dy souyr ayns Egypt) shen-y-fa ver y Chiarn feill diu, as nee shiu gee. 19Cha nee un laa, ny daa laa, ny queig laa, chamoo jeih laa, ny feed laa nee shiu gee; 20Agh son slane mee, derrey hig eh magh er ny stroanyn eu, as dy bee eh feohdoil diu; son dy vel shiu er hoiaghey beg jeh’n Chiarn ta ny mast’ eu, as er cheayney kiongoyrt rish, gra, Cre’n-fa haink shin magh ass Egypt? 21As dooyrt Moses, Ta’n pobble, ny-vud oc ta mish, shey cheead dooinney ta coshee; as t’ou er ghra, Ver-yms feill daue, dy vod ad gee son slane mee. 22Jed ny shioltaneyn as shellooyn er marroo, dy yannoo magh ad? ny, bee ooilley eeastyn ny marrey er nyn jaglym dy cheilley daue, dy vod nyn saie ’ve oc? 23As dooyrt y Chiarn rish Moses, Vel laue’n Chiarn er n’aase giare? nee uss fakin nish, jig my ghoo gys kione, mannagh jig.

24As hie Moses magh, as dinsh eh da’n pobble goan y Chiarn, as haggil eh yn three-feed dooinney as jeih jeh shanstyr y pobble, as hoie eh ad mygeayrt y chabbane-agglish. 25As haink y Chiarn neose ayns bodjal, as loayr eh rish, as ghow eh jeh’n spyrryd va ersyn, as hug eh shen er y three-feed shanstyr as jeih: as haink eh gy-kione, tra ren y spyrryd tannaghtyn orroo, dy ren ad phadeyrys, as cha ren ad scuirr. 26Agh va jees jeh ny deiney faagit ayns y champ, va ennym y derrey yeh Eldad, as ennym y jeh elley Medad: as va’n spyrryd orroo (as v’ad jeusyn va ny enmyn oc sthie, agh cha jagh ad magh gys y chabbane-agglish) as ren ad phadeyrys ayns y champ. 27As roie dooinney aeg, as dinsh eh da Moses, gra, Ta Eldad as Medad phadeyrys ayns y champ. 28As ren Joshua mac Nun shirveishagh Voses, fer jeh e gheiney aegey, freggyrt as gra, My hiarn Voses, jean ad y lhiettal! 29As dooyrt Moses rish, Vel uss troo er y choontey aym’s? dy baillish Jee dy beagh ooilley pobble y Chiarn phadeyryn, as dy jinnagh y Chiarn cur e spyrryd orroo. 30As hie Moses gys y champ, eh hene as shanstyr Israel. 31As hie geay magh veih’n Chiarn, as hug eh lesh quaylyn veih’n aarkey, as lhig eh daue tuittym liorish y champ, myr veagh eh jurnah laa er yn derrey heu, as myr veagh eh jurnah laa er y cheu elley, ooilley mygeayrt y champ, as ad getlagh mysh stundayrt er yrjid, erskyn eaghtyr y thallooin. 32As hie yn pobble magh fey-yn-laa shen, as fud-ny-hoie, as fey-yn-laa er-giyn, as haggil ad ny quaylyn: eshyn sloo ren chaglym, haggil eh jeih homeryn: as ren ad skeayley ad dy lhean daue hene mygeayrt y champ. 33As tra va’n eill foast eddyr nyn veeacklyn, roish my ve caignit, va corree’n Chiarn brasnit noi’n pobble, as woaill y Chiarn y pobble lesh kerraghey feer trome. 34As denmys as yn ynnyd shen, Kibroth-hattaavah son dy nee ayns shen ren ad goanluckey yn pobble hug mian. 35As ghow’n pobble nyn yurnah veih Kibroth-hattaavah gys Hazeroth: as ren ad campal ec Hazeroth.