CAB. XII

1As loayr Miriam as Aaron noi Moses, er coontey yn Ethiopian v’eh er phoosey; son v’eh er phoosey ben ass Ethiopia. 2As dooyrt ad, Vel y Chiarn er loayrt dy jarroo ny-lomarcan liorish Moses? nagh vel eh myrgeddin er loayrt liorinyn? As cheayll y Chiarn eh. 3(Nish va Moses ny ghooinney feer vannee, erskyn ooilley ny deiney v’er eaghtyr y thallooin.) 4As loayr y Chiarn dy siyragh rish Moses, as rish Aaron, as rish Miriam, Tar-jee magh nyn droor gys y chabbane-agglish. As haink ad nyn droor magh. 5As haink y Chiarn neose ayns pillar yn vodjal, as hass eh ayns dorrys y chabbane-agglish, as deïe eh er Aaron as Miriam: as haink ad ny-neesht magh. 6As dooyrt eh, Eaisht-jee nish rish my ghoan; My ta phadeyr ny mast’ eu, Mish y Chiarn, nee soilshaghey mee hene da ayns ashlish, as loayr-ym rish aym’s dreamal. 7Cha nee myr shen rish my harvaant Moses, ta firrinagh ayns ooilley my hie. 8Rishyn nee’m loayrt beeal ry beeal, ta shen, dy foshlit: cha nee ayns raaghyn dorraghey; as co-chaslys jeh’n Chiarn ver eh my-ner; cre’n-oyr eisht, nagh row aggle erriu, dy loayrt noi my harvaant Moses? 9As va corree’n Chiarn brasnit nyn ’oï, as jimmee eh roish. 10As ren y bodjal troggal jeh’n chabbane-agglish, as cur-my-ner, haink Miriam dy ve louraanagh, gial myr sniaghtey: as yeeagh Aaron er Miriam, as cur-my-ner v’ee louraanagh. 11As dooyrt Aaron rish Moses, Aless, my hiarn! ta mee guee ort, my cur y peccah shoh nyn lieh, ta shin dy ommijagh er ve kyndagh jeh, as liorish ta shin er n’yannoo peccah. 12Ny lhig ee ve myr y varroo; ta’n eill echey lieh-mow, tra t’eh cheet ass breïn e vayrey. 13As ghow Moses padjer gys y Chiarn, gra, Jean ee y lheihys nish, O Yee, ta mee guee ort.

14As dooyrt y Chiarn rish Moses, Dy beagh yn ayr eck er cheau shelley ’syn eddin eck, nagh beagh nearey er ve urree son shiaght laa? lhig ee ve er ny scarrey veih’n cheshaght son shiaght laa, as lurg shen lhig ee ve goit stiagh reesht. 15As va Miriam currit magh ass y champ son shiaght laa: as cha jagh yn pobble er nyn doshiaght, derrey va Miriam er ny ghoaill stiagh reesht. 16As lurg shen ren y pobble scughey veih Hazeroth, as ren ad campal ayns faasagh Paran.