CAB. XIV

1Eisht ren y slane cheshaght troggal seose nyn goraa lesh jeïr, as ren y pobble dobberan yn oie shen. 2As ren ooilley cloan Israel plaiynt noi Moses, as noi Aaron: as dooyrt y slane cheshaght roo, Dy baillish Jee dy beagh shin er gheddyn baase ayns Egypt, ny dy baillish Jee dy row shin er gheddyn baase ayns yn aasagh shoh. 3As cre’n-fa ta’n Chiarn er chur lesh shin gys y cheer shoh, dy huittym Liorish y chliwe, dy beagh nyn mraane as nyn gloan son spooilley? nagh beagh eh ny bare dooin, dy gholl reesht gys Egypt? 4As dooyrt ad y derrey yeh rish y jeh elley, Lhig dooin captan y reih, as lhig dooin goll reesht gys Egypt. 5Eisht huitt Moses as Aaron er nyn eddinyn kiongoyrt rish slane sheshaght cloan Israel, va er nyn jaglym cooidjagh.

6As ren Joshua mac Nun, as Caleb mac Jephunneh, va jeusyn ren ronsaghey’n cheer, raipey nyn eaddagh. 7As loayr ad rish slane sheshaght cloan Israel, gra, Ta’n cheer hie shin ny hrooid dy ghoaill baght jeh, cheer erskyn-towse mie. 8My ta taitnys ec y Chiarn aynin, eisht ver eh lesh shin gys y cheer shoh, as ver eh dooin eh; cheer messoil ayns bainney as mill. 9Agh, ny irree-jee magh noi’n Chiarn, chamoo gow-jee aggle roish pobble y cheer; son cha bee ad agh myr greme d’arran dooin; ta’n kemmyrk oc er n’immeeaght voue, as ta’n Chiarn mârin: ny gow-jee aggle roue. 10Agh deïe ooilley’n slane cheshaght dy chlaghey ad: as va gloyr y Chiarn ry-akin soilshean er y chabbane-agglish, ayns fakin ooilley cloan Israel.

11As dooyrt y Chiarn rish Moses, Caïd nee’n pobble shoh mish y vrasnaghey? as caïd vees eh, nagh jean ad m’y chredjal, son ooilley ny cowraghyn ta mee er hoilshaghey ny mast’ oc? 12Nee’m ad y woalley lesh y chramp, as ad y stroie, as nee’m jeed’s ashoon smoo, as ny s’pooaral na adsyn. 13As dooyrt Moses rish y Chiarn, Eisht nee ny Egyptianee clashtyn shoh (son hug oo lhiat seose y pobble shoh, liorish dty phooar, veih ny mast’ oc.) 14As nee ad shoh y hoilshaghey da cummaltee yn cheer shoh: son t’ad er chlashtyn dy vel uss, Hiarn, marish y pobble shoh, dy vel uss Hiarn, ry-akin eddin dy eddin, as dy vel dty vodjal shassoo harrystoo, as dy vel oo goll roue, ’sy laa ayns pillar dy vodjal, as ayns pillar dy aile ’syn oie. 15Nish my varrys oo ooilley’n pobble shoh myr un dooinney; eisht nee ny ashoonyn ta er chlashtyn jeh dty ghoo, loayrt, as gra, 16Son nagh yarg y Chiarn yn pobble shoh y choyrt lesh gys y cheer ren eh breearrey daue, shen-y-fa, t’eh er stroie ad ’syn aasagh. 17As nish, ta mee guee ort, lhig da pooar my Hiarn dy cronnal ve er ny hoilshaghey, myr t’ou er loayrt, gra, 18Ta’n Chiarn foddey-surransagh, as jeh myghin vooar, leih mee-chairys as peccah; as gyn er aght erbee seyrey yn drogh-yantagh, kerraghey mee-chairys ny ayraghyn er y chloan, gys y trass as y chiarroo heeloghe. 19Jean pardooney, ta mee geearree ort, mee-chairys yn pobble shoh, cordail rish mooads dty vyghin, as myr t’ou er n’ymmyrkey lesh y pobble shoh, veih Egypt, eer derrey nish. 20As dooyrt y Chiarn, Ta mee er phardooney cordail rish dty raa: 21Agh cha firrinagh as ta mish bio, bee ooilley’n seihll er ny lhieeney lesh gloyr y Chiarn. 22Er son ooilley ny deiney shen t’er vakin my ghloyr, as my virrilyn ren mee ayns Egypt, as ayns yn aasagh, as t’er m’y vrasnaghey nish ny jeih keayrtyn shoh, as nagh vel er n’eaishtagh rish my choraa; 23Son shickyrys, cha vaik ad y cheer ren mish breearrey da ny ayraghyn oc, chamoo nee veg jeusyn t’er m’y vrasnaghey, fakin eh: 24Agh my harvaant Caleb, son dy row spyrryd share aynsyn, as dy vel eh dy slane er-eiyrt orrym’s; eshyn ver-ym lhiam gys y cheer, raad hie eh; as yiow’n sluight echey cummal ayn. 25Agh nish, son dy vel ny Amalekiteyn, as ny Canaaniteyn cummal ’sy choan, chyndaa-jee mairagh, as reue shiu gys yn aasagh, raad yn Aarkey Jiarg.

26As loayr y Chiarn rish Moses, as rish Aaron, gra, 27Caïd nee’m gymmyrkey lesh y pobble roonagh shoh ta girree magh m’oï? Ta mee er chlashtyn plaiyntyn cloan Israel t’ad jannoo m’oï. 28Abbyr roo, Myr ta mee bio, ta’n Chiarn gra, myr ta shiu er loayrt ayns my chlashtyn, shen myr nee’m riu: 29Nee ny kirp eu tuittym ayns yn aasagh shoh; as ooilley yn slane earroo jiu, myr ve er ny ghoaill, veih feed bleïn dy eash as erskyn, ta er n’irree magh m’oï; 30Son shickyrys, cha jig shiu gys y cheer my-e-chione ren mee breearrey dy choyrt diu cummal ayn; er-lhimmey jeh Caleb mac Jephunneh, as Joshua mac Nun. 31Agh y chloan veggey eu, dooyrt shiu veagh son spooilley, adsyn ver-ym lhiam ayn, as yiow ad eiraght ’sy cheer ta shiuish er hoiaghey beg jeh. 32Agh er ny son eu hene, nee ny kirp eu tuittym ayns yn aasagh shoh. 33As bee’n chloan eu nyn wagaantee ’syn aasagh da-eed bleïn, as nee ad gymmyrkey yn mee-viallys euish derrey vees ny callinyn eu er n’gholl mow ’syn aasagh. 34Cordail rish earroo ny laghyn, ayndoo va shiu scrial yn cheer, ta shen, da-eed laa (dagh laa son bleïn) nee shiu gymmyrkey yn mee-ammys eu, eer da-eed bleïn, as ennys shiu oyr caghlaa my chonaant. 35Ta mish y Chiarn er ghra eh, nee’m son shickyrys shoh y chooilleeney er ooilley’n cheshaght roonagh shoh, ta er n’irree magh m’oï: ’syn aasagh shoh bee ad er nyn goyrt naardey, as shen y raad yiow ad baase. 36As ny deiney shen hug Moses dy gholl trooid y cheer, va er jeet reesht as er ghreinnaghey yn slane cheshaght dy phlaiynt n’oï, liorish coyrt lhieu drogh ghoo jeh’n cheer: 37Hooar ny eer deiney shen, hug lhieu drogh ghoo er y cheer, baase liorish y chramp roish y Chiarn. 38Agh jeh ny deiney hie magh dy ronsaghey yn cheer, cha row faagit bio agh mac Nun, as Caleb mac Jephunneh. 39As dinsh Moses ooilley ny goan shoh da ooilley cloan Israel: as ren y pobble dobberan dy trimshagh.

40As dirree ad dy moghey, as hooar ad seose er mullagh y clieau, gra, Cur-my-ner, ta shin ayns shoh, hem ad seose gys yn ynnyd, ta’n Chiarn er yialdyn: son ta shin er n’yannoo peccah. 41As dooyrt Moses, Cre’n-fa ta shiu nish jannoo noi sarey’n Chiarn? agh cha jig eh lhieu. 42Ny gow-jee seose, son cha vel y Chiarn ny mast’ eu; nagh bee shiu er nyn stroie kiongoyrt rish nyn noidyn. 43Son ta ny Amalekiteyn, as ny Canaaniteyn ayns shen reue, as nee shiu tuittym liorish y chliwe; er-yn-oyr dy vel shiu er nyn jyndaa ersooyl veih’n Chiarn; shen-y-fa cha bee’n Chiarn mêriu. 44Agh ghow ad orroo dy daaney dy gholl seose gys mullagh y clieau, agh cha ren arg conaant y Chiarn, ny Moses scughey veih’n champ. 45Eisht haink neose ny Amalekiteyn, as ny Canaaniteyn, cummaltee yn clieau shen, as ren ad y woalley ad, as ad nyn imman gys Hormah.