CAB. XV

1As loayr y Chiarn rish Moses, gra, 2Loayr rish cloan Israel, as abbyr roo, Tra vees shiu er jeet ayns cheer nyn eiraght, ta mish kiarail dy choyrt diu. 3As dy jean shiu oural lesh aile gys y Chiarn, chebbal-losht ny oural, ayns cooilleeney breearrey, ny ayns oural dy aigney-arryltagh, ny ayns nyn feaillaghyn casherick, son oural-millish roish y Chiarn, jeh’n chelloo ny jeh’n chioltane: 4Eisht ver eshyn, ta chebbal gys y Chiarn, lesh oural-arran, omer dy flooyr mestit lesh yn chiarroo ayrn jeh 15:4 Mish three pyntyn. hin dy ooil. 5As yn chiarroo ayrn jeh hin feeyney son oural-jough nee oo kiarail, marish y chebbal-losht, ny oural, son un eayn: 6Ny son rea, nee oo kiarail son oural-arran, yn wheiggoo ayrn jeh ephah dy flooyr mestit lesh yn trass ayrn jeh hin dy ooil ny-chione. 7As son oural-jough, nee oo chebbal yn trass ayrn jeh hin dy feeyn son oural-millish da’n Chiarn. 8As tra t’ou geddyn aarloo dow son chebbal-losht, ny son oural, ayns cooilleeney breearrey, ny oural-shee gys y Chiarn: 9Eisht ver eh lesh marish y dow, oural-arran jeh three omeryn dy flooyr, lesh lieh hin dy ooil ny-chione. 10As ver oo lhiat son oural-jough lieh hin dy feeyn, son chebbal jeant liorish aile, oural-millish gys y Chiarn. 11Myr shoh vees er ny yannoo son un dow, ny son un rea, ny son eayn, ny mannan. 12Rere yn earroo, nee shiu kiarail son oural, myr shoh nee shiu rish dagh unnane, cordail rish nyn earroo. 13Nee dagh unnane ta ruggit ’sy cheer, ny cur’myn shoh y chooilleeney er yn aght shoh, ayns chebbal oural jeant lesh aile son soar millish roish y Chiarn. 14As my vees joarree cummal ny mast’ eu, ny quoi-erbee vees ny mast’ eu ayns ny sheelogheyn eu, as aggindagh dy hebbal oural jeant liorish aile son soar millish roish y Chiarn; myr ta shiuish jannoo, myrgeddin nee eshyn. 15Bee’n un oardagh er ny son euish jeh’n cheshaght, as myrgeddin er y hon-syn ta er e yoarreeaght mêriu, son oardagh kinjagh ayns ny sheelogheyn eu: myr ta shiuish, myr shen vees y joarree, fenish y Chiarn. 16Bee un leigh, as un oardagh diuish, as dasyn t’er e yoarreeaght mêriu.

17As loayr y Chiarn rish Moses, gra, 18Loayr rish cloan Israel, as abbyr roo, Tra hig shiu ayns y cheer huggey ver-ym lhiam shiu, 19Shen myr vees eh, tra ee-ys shiu arran y chied-vess jeh’n cheer, dy jean shiu chebbal oural-troggit-seose gys y Chiarn. 20Nee shiu chebbal berreen jeh toshiaght y theayst eu, son oural-troggit-seose: myr ta shiu jannoo rish oural-troggit-seose y laare-arroo, myr shen nee shiu troggal eh seose. 21Jeh toshiaght y theayst eu ver shiu da’n Chiarn, oural dy ve troggit seose, ayns ny sheelogheyn eu.

22As my ta shiu er n’yannoo marranys, as gyn er chur geill da ooilley ny oardaghyn shoh, ta’n Chiarn er loayrt rish Moses, 23Dy jarroo ooilley ny ta’n Chiarn er harey diu liorish laue Voses, veih’n laa hug y Chiarn sarey da Moses, as er-dy-henney, mastey ny sheelogheyn eu; 24Eisht my she shen, dy vel nhee erbee er ve jeant trooid mee-hushtey, as eh gyn-yss da’n pobble ec y traa; dy jean ooilley’n cheshaght chebbal un dow aeg son oural-losht, dy hoar millish roish y Chiarn, marish e oural-arran, as e oural-jough, cordail rish yn oardagh, as un vannan jeh ny goair son oural-peccah.

25As nee’n saggyrt lhiasaghey son ooilley sheshaght cloan Israel, as bee eh er ny leih daue, son trooid mee-hushtey ve: as ver ad lhieu yn chebbal oc, oural jeant lesh aile gys y Chiarn, as nyn oural son peccah roish y Chiarn, son yn vee-hushtey oc. 26As bee eh er ny leih da ooilley cheshaght cloan Israel, as da’n joarree ta ny mast’ eu; fakin dy row ooilley’n pobble fo mee-hushtey.

27As my nee persoon erbee peccah trooid mee-hushtey, eisht ver eh lesh minsheig jeh’n vleïn shen son oural-peccah. 28As nee’n saggyrt lhiasaghey ’yannoo son y persoon t’er n’yannoo peccah trooid mee-hushtey, fenish y Chiarn, dy yannoo lhiasaghey er e hon; as bee eh er ny leih da. 29Bee’n un leigh eu dasyn ta jannoo peccah trooid mee-hushtey, chammah dasyn ta ruggit mastey cloan Israel, as da’n joarree ta cummal ny-vud eu.

30Agh y persoon ta jannoo red erbee er e ghaanys, (edyr eh ve ruggit ’sy cheer, ny joarree) ta’n fer cheddin soiaghey beg jeh’n Chiarn; bee’n persoon shen er ny yiarey jeh veih mastey e phobble. 31Son dy vel eh er hoiaghey beg jeh goo yn Chiarn, as er vrishey e harey; bee’n persoon shen dy bollagh er ny yiarey jeh: nee eh gymmyrkey e vee-chairys hene.

32As ’sy traa va cloan Israel ’syn aasagh, hooar ad dooinney chaglym brasnagyn er y doonaght. 33As hug adsyn hooar eh chaglym brasnagyn, lhieu eh gys Moses as Aaron, as gys ooilley’n cheshaght. 34As hug ad eh ayns pryssoon, son nagh row eh er ny hoilshaghey, cre’n kerraghey ragh er. 35As dooyrt y Chiarn rish Moses, Bee’n dooinney, son shickyrys, er ny choyrt gy-baase; nee ooilley’n cheshaght eh y chlaghey cheu-mooie jeh’n champ. 36As hug ooilley’n cheshaght lhieu eh cheu-mooie jeh’n champ, as chlagh ad eh gy-baase; myr hug y Chiarn sarey da Moses.

37As loayr y Chiarn rish Moses, gra, 38Loayr rish cloan Israel, as oardee, dy der ad fringeyn er rhumbyllyn nyn gharmadyn, trooid ny sheelogheyn oc, as dy der ad er fringe ny rhumbyllyn rybban gorrym. 39As bee’n fringe diu son cowrey, dy vod shiu jeeaghyn er, as cooinaghtyn er ooilley saraghyn y Chiarn, as cooilleeney ad: as nagh jed shiu lurg nyn gree hene, as ny sooillyn eu hene, myr bollagh shiu goll er-shaghryn: 40Dy vod shiu cooinaghtyn er, as cooilleeney ooilley my haraghyn, as ve sleih casherick gys y Jee eu. 41Mish y Chiarn y Jee eu, hug lhiam shiu ass cheer Egypt, dy ve nyn Yee: Mish y Chiarn y Jee eu.