CAB. XVI

1Nish ren Korah mac Izhar, mac Kohath, mac Levi; as Dathan as Abiram mec Eliab, as On mac Peleth, mec Reuben, irree-magh y yannoo. 2As hass ad seose noi Moses, marish shiartanse dy chloan Israel, daa cheead as jeih as da-eed prince jeh’n cheshaght, jeh ard ghoo mastey’n pobble, deiney ooasle. 3As haggil ad cooidjagh noi Moses, as noi Aaron, as dooyrt ad roo, Ta shiuish goaill rouyr stayd erriu, fakin dy vel ooilley’n cheshaght casherick dagh unnane oc, as ta’n Chiarn ny mast’ oc; cre’n-oyr eisht dy vel shiu soiaghey shiu hene seose erskyn pobble y Chiarn. 4As tra cheayll Moses shoh, huitt eh er e eddin: 5As loayr eh rish Korah, as rish ooilley’n cheshaght echey, gra, Eer mairagh nee’n Chiarn soilshaghey quoi ta leshyn, as quoi ta casherick; as ver eh lesh eh er-gerrey da hene: eshyn da jarroo, t’eh er reih, ver eh lesh er-gerrey da hene. 6Shoh jean-jee; Gow-jee censeryn, Korah, as ooilley e heshaght; 7As cur-jee aile ayndoo, as cur-jee incense orroo, fenish y Chiarn mairagh: as hig eh gy-kione, yn dooinney ta’n Chiarn dy reih, dy bee eh casherick: shiuish ta goaill rouyr erriu, vec Levi. 8As dooyrt Moses rish Korah, Clasht-jee, ta mee guee erriu, shiuish vec Levi: 9Vel shiu jeeaghyn er myr red fardalagh, dy vel Jee Israel er reih shiu magh veih sheshaght Israel, dy chur lesh shiu er-gerrey da hene, dy yannoo shirveish chabbane-agglish y Chiarn, as dy hassoo roish y cheshaght, dy hirveish daue? 10As t’eh er chur lesh oo er-gerrey da hene, as ooilley dty vraaraghyn mec Levi mayrt: as vel shiu son goaill erriu oik y taggyrt myrgeddin? 11Er y choontey cheddin, ta chammah oo hene, as ooilley dty heshaght er nyn jaglym cooidjagh noi’n Chiarn: as cre ta Aaron, dy vel shiu plaiynt n’oï? 12As hug Moses fys dy eamagh er Dathan as Abiram mec Eliab: hug ansoor, Cha jig mayd seose. 13Nee red fardalagh eh, dy vel oo er chur lhiat shin ass cheer messoil ayns bainney as mill, dy stroie shin ayns yn aasagh, mannagh vel foyd dy yannoo oo hene ooilley-magh ny ard-er-reill harrin? 14Marish shoh, cha vel oo er chur lhiat shin gys cheer messoil ayns bainney as mill, ny er chur dooin eiraght ayns magheryn as garaghyn-feeyney: vel oo son dolley sooillyn ny deiney shoh? cha jig mayd seose. 15As va Moses feer jymmoosagh, as dooyrt eh rish y Chiarn, Ny jean uss soiagh jeh’n oural oc: cha vel mish er ghoaill voue wheesh as un assyl, chamoo ta mee er n’yannoo yn aggair sloo da unnane oc. 16As dooyrt Moses rish Korah, Tar uss as ooilley dty heshaght roish y Chiarn, uss, as adsyn, as Aaron mairagh: 17As lhig dagh dooinney goaill yn censer echey, as cur-jee incense ayndoo, as cur-jee lhieu ad roish y Chiarn dagh dooinney e henser, daa cheead censer as jeih as feed; uss myrgeddin as Aaron dagh unnane eu e henser. 18As ghow dagh dooinney e henser, as hug ad aile ayndoo, as hug ad incense er, as hass ad ayns dorrys y chabbane-agglish marish Moses as Aaron. 19As haggil Korah ooilley’n cheshaght nyn ’oï oc, gys dorrys y chabbane-agglish; as va gloyr y Chiarn er ny hoilshaghey fenish ooilley’n cheshaght. 20As loayr y Chiarn rish Moses, as rish Aaron, gra, 21Jean-jee shiu hene y scarrey veih mastey’n cheshaght shoh, dy voddym ad y stroie ayns tullogh. 22As huitt ad er nyn eddinyn, as dooyrt ad, O Yee, Jee spyrrydyn dy chooilley eill, jean un dooinney peccah, as bee uss corree rish ooilley’n cheshaght?

23As loayr y Chiarn rish Moses, gra, 24Loayr rish y cheshaght, gra, Scarr-jee shiu hene veih cabbane Chorah, Dathan, as Abiram. 25As hrog Moses er, as hie eh gys Dathan, as Abiram; as hie shanstyr Israel geiyrt er. 26As loayr eh rish y cheshaght gra, Scugh-jee, ta mee guee erriu, veih cabbaneyn ny deiney mee-chrauee shoh, as ny benn-jee rish veg dy vel lhieu, nagh bee shiu er nyn stroie ayns ooilley ny peccaghyn oc. 27Er shoh, ren ad scarrey ad hene veih cabbane Chorah, Dathan, as Abiram er dy chooilley heu: as haink Dathan as Abiram magh, as hass ad ayns dorrys ny cabbaneyn oc, marish nyn mraane, as nyn mec, as nyn gloan veggey. 28As dooyrt Moses, Liorish shoh bee fys eu, dy vel y Chiarn er m’y choyrt, dy yannoo ooilley ny obbraghyn shoh: son cha vel mee er n’yannoo ad jeh m’aigney hene. 29My yiow ny deiney shoh baase dooghyssagh dy chooilley ghooinney, ny my lhie-ys Jee e laue orroo myr er dy chooilley ghooinney elley; eisht cha vel y Chiarn er m’y choyrt. 30Agh my nee’n Chiarn red noa y yannoo, as dy jean y thalloo fosley e beeal, as ad y lhuggey seose, lesh ooilley ny ta bentyn daue, as dy jed ad sheese bio ayns yn ooig; eisht nee shiuish toiggal, dy vel ny deiney shoh er vrasnaghey yn Chiarn.

31As haink eh gy-kione, erreish da ve er loayrt ooilley ny goan shoh, dy ren yn thalloo va foue scoltey veih-my-cheilley; 32As ren y thalloo fosley, as sluggey ad seose, as ny thieyn oc, as ooilley ny deiney va bentyn rish Korah, as ooilley’n chooid oc. 33Hie ad hene as ooilley ny va bentyn roo sheese bio ayns yn ooig, as haink y thalloo dy cheilley harrystoo: as ren ad cherraghtyn veih mastey’n pobble. 34As ren ooilley Israel, va mygeayrt-y-moo, chea ec yn eam oc: son dooyrt ad, Er-aggle dy jean y thalloo shinyn y lhuggey seose myrgeddin. 35As haink aile magh veih’n Chiarn, as losht eh seose yn daa cheead as jeih deiney as da-eed va chebbal incense.

36As loayr y Chiarn rish Moses, gra, 37Loayr rish Eleazar mac Aaron y saggyrt, dy gow eh seose ny censeryn ass y lossey, as skeayl uss yn aile ayns shid; son t’ad casherick. 38Censeryn ny peccee shoh noi ny anmeenyn oc hene, lhig daue ve jeant plaityn lhean dy choodaghey yn altar: son v’ad chebbit gys y Chiarn, shen-y-fa t’ad casherick: as bee ad son cowrey da cloan Israel. 39As ghow Eleazar yn saggyrt ny censeryn prashey, lhieu ren adsyn va losht chebbal; as v’ad jeant plaityn lhean son coodagh da’n altar: 40Dy ve son cooinaghtyn da cloan Israel, nagh jig joarree erbee, nagh vel jeh sluight Aaron, er-gerrey dy hebbal incense roish y Chiarn; nagh bee eh myr Korah, as e heshaght: myr dooyrt y Chiarn rish, liorish laue Voses.

41Agh laa-ny-vairagh, ren ooilley sheshaght cloan Israel plaiynt noi Moses, as noi Aaron, gra, Ta shiu er stroie pobble y Chiarn. 42As haink eh gy-kione, tra va’n cheshaght er nyn jaglym noi Moses as Aaron, dy ren ad jeeaghyn rish cabbane-agglish y cheshaght: as cur-my-ner, ren y bodjal coodaghey eh, as va gloyr y Chiarn ry-akin. 43As haink Moses as Aaron roish cabbane-agglish y cheshaght.

44As loayr y Chiarn rish Moses, gra, 45Scarr-jee shiu hene veih’n cheshaght shoh, dy jean-ym ad y stroie myr ayns tullogh: as huitt ad er nyn eddin.

46As dooyrt Moses rish Aaron, Gow censer, as cur aile ayn veih’n altar, as cur incense er, as immee dy tappee stiagh gys y cheshaght, as jean lhiasaghey er nyn son: son ta jymmoose er n’gholl magh veih’n Chiarn: ta’n chramp er ghoaill toshiaght. 47As ghow Aaron myr hug Moses sarey, as roie eh stiagh ayns mean y cheshaght; as cur-my-ner, va’n chramp er ghoaill toshiaght mastey’n pobble; as hug eh incense er, as ren eh lhiasaghey son y pobble. 48As hass eh eddyr ny merriu as ny bioee, as va’n chramp er ny chastey. 49Nish v’adsyn, hooar baase ’sy chramp, kiare thousaneyn jeig as shiaght cheead, cheu-mooie jeusyn hooar baase ayns cooish Chorah. 50As haink Aaron reesht gys Moses, gys dorrys chabbane-agglish yn cheshaght: as va’n chramp er ny chastey.