CAB. XVII

1As loayr y Chiarn rish Moses, gra, 2Loayr rish cloan Israel, as gow voish dagh dooinney jeu slattag, rere thie nyn ayrey, as veih ooilley ny princeyn oc, cordail rish thie nyn ayrey, daa latt jeig: scrieu uss ennym dagh dooinney er e latt. 3As nee oo scrieu ennym Aaron er slattag Levi: son un lattag vees son y fer syrjey jeh thie nyn ayrey. 4As ver oo ad ayns cabbane-agglish y cheshaght, roish arg y chonaant, raad ver-yms meeiteil diu. 5As hig eh gy-kione, dy jean slattag y dooinney, neem’s y reih, blaaghey: as ver-yms ny host yn trughanys ta cloan Israel, jannoo m’oï.

6As loayr Moses rish cloan Israel, as hug dagh fer jeh ny princeyn oc slatt y pheesh da, unnane son dagh prince, cordail rish thie nyn ayrey, ta shen, daa lattag jeig: as va slattag Aaron fud ny slattyn elley. 7As hasht Moses ny slattagyn oc fenish y Chiarn, ayns cabbane y chonaant. 8As haink eh gy-kione, laa-ny-vairagh, dy jagh Moses stiagh ayns cabbane y chonaant: as cur-my-ner, va slattag Aaron son thie Levi er chur magh blaa, as er vrishey magh ayns mess, as er ymmyrkey almondyn. 9As hug Moses lesh magh ooilley ny slattagyn veih fenish y Chiarn gys ooilley cloan Israel: as yeeagh ad, as ghow ad dagh dooinney e lattag.

10As dooyrt y Chiarn rish Moses, Cur lhiat slattag Aaron reesht, roish arg y chonaant, dy ve freilt son cowrey noi ny mee-viallee: as ver uss dy bollagh ny host yn trughanys oc m’oï, nagh vow ad baase. 11As ren Moses myr shen: myr hug y Chiarn sarey da, shen myr ren eh. 12As loayr cloan Israel rish Moses, gra, Cur-my-ner, ta shin stroit, ta shin cherraghtyn, ta shin ooilley cherraghtyn. 13Quoi-erbee ta goaill er dy heet coair cabbane casherick y Chiarn, bee eh er ny stroie: Vel shinyn (ooilley neesht) dy ve er ayn goyrt gy-baase?