CAB. XIX

1As loayr y Chiarn rish Moses, as rish Aaron, gra, 2Shoh oardagh y leigh ta’n Chiarn er harey, gra, Loayr rish cloan Israel, dy der ad lhieu hood colbagh ruy fegooish spot, as fegooish cron erbee, as nagh row rieau fo’n whing. 3As ver shiu ee da Eleazar y saggyrt, dy choyrt lesh ee cheu-mooie jeh’n champ, as bee ee er ny varroo ayns e enish. 4As nee Eleazar y saggyrt goaill jeh’n uill eck er e vair, as spreih eh shiaght keayrtyn, as e eddin lesh y chabbane-agglish. 5As nee ad lostey yn cholbagh kiongoyrt rish: bee’n cheh, as yn eill, as yn uill, marish yn eoylley eck, er ny lostey. 6As nee’n saggyrt goaill fuygh-cedar, as hyssop, as (ollan) scarleod, as ceau ad ayns mean yn aile raad va’n cholbagh losht. 7Eisht nee’n saggyrt niee e eaddagh, as nee eh faarkey e chorp ayns ushtey, as lurg shen hig eh gys y champ, as bee’n saggyrt neu-ghlen derrey’n astyr. 8As shegin dasyn ta lostey ee, niee e eaddagh, as e chorp ayns ushtey, as bee eh neu-ghlen derrey’n astyr. 9As nee dooinney glen chymsaghey leoie yn cholbagh, as tashtey seose eh cheu-mooie jeh’n champ ayns boayl glen, as bee eh freilt cour sheshaght chloan Israel, son ushtey-scarree: te ry-hoi glenney veih peccah. 10As nee eshyn ta chymsaghey leoie’n cholbagh, niee e eaddagh, as bee eh neu-ghlen derrey’n astyr: as bee shoh da cloan Israel, as da’n joarree ta cummal ny mast’ oc, son slattys kinjagh.

11Bee eshyn vennys rish corp marroo dooinney erbee, neu-ghlen shiaght laa. 12Nee eh glenney eh hene lesh (yn ushtey casherick) er yn trass laa, as er yn chiaghtoo laa bee eh glen: agh mannagh jean eh eh-hene y ghlenney er yn trass laa, eisht er yn chiaghtoo laa cha bee eh glen. 13Quoi-erbee vennys rish corp marroo erbee, as nagh vel glenney eh hene, t’eh an-chasherickey cabbane-agglish y Chiarn: as bee’n annym shen giarit magh veih Israel: son nagh row’n ushtey-scarree spreiht er, bee eh neu-ghlen; t’eh foast fo e neu-ghlennid. 14Shoh’n leigh, tra ta dooinney geddyn baase ayns cabbane; bee ooilley ta cheet stiagh ’sy chabbane, as ooilley ny t’ayns y chabbane neu-ghlen shiaght laa. 15As bee dy chooilley haagh foshlit, nagh vel coodagh erbee kianlt er, neu-ghlen. 16As quoi-erbee vennys rish fer t’er ny varroo lesh cliwe ’sy vagher, ny corp marroo, ny craue dooinney, ny oaie, bee eh neu-ghlen shiaght laa. 17As son persoon neu-ghlen, gowee ad jeh leoie yn cholbagh, va losht son glenney pheccah, as bee ushtey glen er ny chur huggey ayns saagh: 18As nee persoon glen goaill hyssop, as thummey eh ’syn ushtey, as spreih eh er y chabbane, as er ooilley ny siyn, as orroosyn va ayns shen, as ersyn venn rish craue, ny corp marroo, ny rish fer hooar baase, ny rish oaie: 19As nee’n persoon glen spreih (yn ushtey) ersyn ta neu-ghlen, er y trass laa, as er yn chiaghtoo laa: as er yn chiaghtoo laa nee eh glenney eh hene, as niee e eaddagh, as glenney e chorp ayns ushtey, as bee eh glen ec yn astyr. 20Agh y dooinney vees neu-ghlen, as nagh jean eh hene y ghlenney, bee’n persoon shen er ny yiarey magh veih mastey’n cheshaght: son dy vel eh er n’yannoo daanys er ynnyd casherick y Chiarn, cha row’n ushtey-scarree spreiht er, t’eh neu-ghlen. 21As bee shoh slattys kinjagh daue, dy jean eshyn ta spreih yn ushtey-scarree, niee e eaddagh, as dy bee eshyn vennys rish yn ushtey-scarree, neu-ghlen derrey’n astyr. 22As cre-erbee vennys y persoon neu-ghlen rish, bee eh neu-ghlen: as bee’n annym vennys rish neu-ghlen derrey’n astyr.